Kabhi News Channel Per Khabren Parhnay Wali Rabia Anum Aaj Kal Kuhd Kahbron Main Hain.
Adakar Mohsin Abbas Haider Ko Dekh Kar Show Chhor Kar Janay Par Koi Un Ki Tareef Kar Raha Hay Tou Koi Tanqeed.
Guzisha Dinon Geo News Ki Sabiq Anchor Rabia Anum Nida Yasir Ke Morning Show Se Uth Kar Chali Gayi Theen Kiunkay Show Main Adakar Mohsin Abbas Bhi Shareek Thay.
Mohsin Abbas Per Un Ki Sabiq Biwi Ne Tashaddud Ka Ilzam Lagaya Tha. Rabiya Anum Ne Show Main Mazeed Shareek Rehnay Se Ye Keh Kar Maazrat kar li Thi Ke Wo Gharelo Tashadud Ke Khilaf Hain. Is Liye Aisay Kisi Shakhs Ke Saath Show Main Shareek Nahi Ho Sakteen. Agar Unhen Pehlay Pata Hota Tou Wo Show Main Aati Hi Naheen.
Bohat Si Showbiz Shakhsiat Aur Social Media Sarfeen Ne Rabia Anum Ke Iqdam Ko Saraha Lekin Waheen Kai Celebrities aur Social Media Sarfeen Mohsin Abbas Ki Himayat Bhi Kar Rahay Hain. Bohat Se Logon Ne Rabia Anum Ke Stand Ko Publicity Stunt Qarar Diya.
Mathira Ne Rabia Anum Ko Mukhatib Kar Ke Likha Ye Bohat Ghalat Hay. Logon Ko Badlanay Ka Mauqa Dena Chahiye. Agar Rabia Ko Problem Thi Tou Bhi Is Tarah On Air Kisi Ki Tazleel Nahi Karni Chahiye Thi.
Unhon Ne Likha Ke Domestic Violence Ke Khilaf Awaz Uthana Achi Baat Hay Lekin Mohsin Ka Case Kahatm Huye Kai Saal Guzar Chukay Hain. Ab Un Ki Tazleel Karna Sahi Nahi. Kisi Ko Neecha Dikha Kar Khud Hero Bannay Ki Koshish Nahi Karni Chahiye.
Adakara Mishi Khan Ne Likha Rabia Anum On Air Honay Se Pehle Bhi Excuse Kar Sakti Theen. Makeup Room Main Un Ke Paas Waqt Hoga Ke Jaan Saken Ke Show Main Aur Kaun Kaun Shareek Hay.
Unhon Ne Mazid Likha Ke Ye Un Ke Manager Ka Idea Hoga Ye Stunt On Air Honay Ke baad Kiya Jaye Takay Is Ka Faaida Uthaya Ja Sakay.
Aamir Liaquat Hussain Ki Sabiq Biwi Syeda Bushra Iqbal Ne Sawal Kiya Ke Un Adakaraon Aur Khawateen Anchors Se Kaisa Sulook Hona Chahiye Jinhon Ne Dusri Khawateen Ki Zindagyan Barbad Keen. Un Per Bhi Pabandi Lagayen. Barabari Sab Ke Liye Honi Chahiye.
Deegar Kai Sarfeen Ne Bhi Rabia Anum Per Tanqeed Ki. Sarfeen Ne Purani Khabar Share Kar Rahay Hain Jis Main Mohsin Abbas Ko Adalat Ki Taraf Se Begunah Qarar Diya Gaya Tha. Shehrion Ne Likha Ke Adalat Ki Janib Se Be Qasoor Qarar Diye Janay Ke Ba Wajood Un Ki Tehqeer Ki Ja Rahi Hay. Rabia Anum Ko Guest List Dekh Kar Pehlay Inkar Kar Dena Chahiye Tha. Ye Sara Drama Karnay Ki Kiya Zarurat Thi.