Saal 2022 Ja Raha Hay, Aur Saal Ki Most Anticipated Movie Avatar: The Way Of Water Cinemas Mein Lagi Hui Hay. Khauf Bhi Hay Ke Itni Mehngi Movie Box Office Bomb Na Sabit Ho, Laikin Imkan Bhi Hay Ke History Ki Sab Say Zyada Kamanay Wali Movie Ban Jaey Gi. Khair, Abhi Hum Baat Karnay Walay Hain Saal 2022 Ki 10 Best Movies Ki.
Ye Saal Bhi Buhat Tezi Say Guzar Gaya Hay, Wo Bhi Mach 10 Ki Speed Say. Is Saal Hamaray Samnay Say Buhat Kuch Guzra. Kai Blockbusters Aaey, Jinhon Nay Dunya Ko Hila Kar Rakh Dia Aur Kai Nakaam Movies Bhi, Jin Ka Zikar Phir Kabhi Karain Gay. Filhaal Dekhtay Hain 2022 Ki 10 Best Movies:
RRR
RRR (Rise! Roar! Revolt!) Aik Zabardast Action Movie Hay. 1920s Kay India Ki Kahani Jis Mein Aik Soldier Aur Villager Aik Larki Aghwa Honay Kay Baad Goron Kay Khilaf Baghawat Kar Detay Hain. Action Kitna Hay? Sirf Ye Batana Kafi Hoga Ke Ye Baahubali Kay Director SS Rajamouli Nay Banai Hay. Is Mein Sab Kuch Hay: Tiger Say Larrai, Hathon Say Fighting Aur Sath Hi Bhaiyon Jaisi Dosti Bhi.
The Batman
The Batman Bhi Saal Ki Most Anticipated Movies Mein Say Aik Thi, Yani Jis Ka Sab Ko Intizar Tha. Dark, Grimy Aur Comics Ka ‘Asal Batman’ Hamain Isi Movie Mein Nazar Aaya. Robert Pattinson Say Itni Expectations Nahi Theen, Jitna Acha Unhon Nay Kirdaar Nibhaya. Paul Dano Nay Bhi Serial-Killer Riddler Kay Kirdaar Mein Kamaal Kardia Hay. Phir Catwoman Zoe Kravitz Bhi Behtareen Raheen.
Ye Aik Aisi Movie Hay Jo 2022 Mein Zaroor Dekhni Chahiye. Aur Agar Aap Christopher Nolan Ki Batman Trilogy Kay Fan Hain To Aap Ko Bruce Wayne Ka Naya Look Aur Gotham Ki Nai Feel Pasand Aaey Gi. Especially Batman Ki Entry Kay Kuch Scenes To Khatam Hain.
Prey
Lagta Hay Batman Ki Tarah Predator Franchise Bhi Kabhi Khatam Nahi Hogi. Silsilay Ki Pehli Movie 1987 Mein Aai Thi Aur Ab 2022 Mein Bhi Aik New Film Prey Release Hui Hay. Amber Midthunder Ko To Is Movie Nay Aatay Hi Hit Kardia, Jinhon Nay Aik Hunter Heroine Ka Zabardast Role Play Kia Hay.
Mazay Ki Cheez Is Movie Ki Period Setting Hay, Yani Is Mein Purana Zamana Dikhaya Gaya Hay. Movie Is Liay Bhi Achi Hay Ke Ye 10 Cloverfield Lane Jaisi Clever Movie Kay Director Dan Trachtenberg Ki Hay. Prey Nay Is Saal Bari Kamyabi Haasil Ki Aur Buhat Hit Hui.
Glass Onion: A Knives Out Mystery
Knives Out Yaad Hay? 2019 Ki Is Movie Nay Zabardast Kamyabi Haasil Ki Thi. Aur Ab 2022 Mein Rian Johnson Aur Daniel Craig Kay Saath Ye Movie Aik Baar Phir Wapis Aa Gai Hay. Glass Onion Is Silsilay Ki Last Movie Say Zara Light To Hay, Laikin Movie Mein Kami Koi Nahi. Edward Norton Nay Elon Musk Jaisa Aik Role Play Kia Hay Jo Aik Murder Mystery Party Host Karta Hay, Aik Real Murder Kay Liay. Twists, Turns Aur Entertainment, Is Mein Sab Kuch Hay.
Nope
Jordan Peele Aik Comedian Hain, Laikin Comedy Kay Ilawa Horror Movies Bananay Mein Bhi Ustaad Hain. Get Out Aur Us Kay Baad 2022 Mein As A Director Un Ki New Movie Aai Nope. Sci-Fi Aur Horror Ka Sangam Rakhnay Wali Ye Movie Aik Scary Alien Encounter Dikhati Hay. Trailer Hi Dekh Lain, Aap Ko Dehshat Aur Wehshat Ho Jaey Gi.
The Legend Of Maula Jatt
Agar Hum Ye Kahain To Ghalat Nahi Hoga Ke The Legend Of Maula Jatt 2022 Mein Pakistani Cinema Ka Sab Say Barra Shahkaar Thi. Aik Punjabi Movie Pakistan Mein Is Tarah Hit Hogi, Kis Nay Socha Tha? Laikin Maula Jatt Ka Intizar To Baray Arsay Say Ho Raha Tha. Aur Haqeeqat Ye Hay Ke Is Nay Sari Expectations Puri Bhi Kar Deen. Pakistan Ki History Ki Sab Say Mehngi Film, Sab Say Zyada 240 Crore Kamanay Wali Movie Bhi Bani. Waisay Fawad Khan Aur Hamza Ali Abbasi Nay Maula Jatt Aur Noori Nat Ka Kirdar Amar Kardia Hay.
All Quiet On The Western Front
World War I Mein Western Front Par Larrtay Aik Naujawan German Soldier Ki Kahani. Khushi Kay Mayoosi Aur Khauf Main Badalnay Ki Aik Dastan, Jis Mein Wo Apni Aur Doosron Ki Zindagi Bachanay Ki Koshish Karta Hay. Is Movie Mein Jang Apni Puri Khaufnaaki, Haibat Aur Wehshat Kay Sath Samnay Nazar Aati Hay. German Director Edward Berger Ki Ye Movie Waqai Saal Ki Best Movies Mein Gin’nay Kay Qabil Hay.
Everything Everywhere All At Once
Kamaal Comedy, Ajeeb Sci-Fi, Zabardast Action Aur Phir Jazbaat, In Sab Ko Mila Kar Banti Hay Aik Magical Movie, Jis Ka Naam Hay Everything Everywhere All At Once. Michelle Yeoh Nay Evelyn Ka Kirdar Kis Khoobi Say Nibhaya Hay, Dekh Kar Hairat Hoti Hay. Apni Zindagi Say Mayoos Aik Khatoon Ko Multiverse Mein Puhanchti Hay Aur Kya Kuch Karti Hay? Ye Is Movie Ki Kahani Hay.
Avatar: The Way Of Water
Wo Movie Jis Ka Sab Ko Shiddat Say Intizar Tha, Finally Saal Kay Last Month Mein Release Ho Gai, Avatar: The Way Of Water, 13 Saal Baad Avatar Ka Aanay Wala Sequel. James Cameron To Record Torrnay Aur Qaim Karnay Kay Liay Hi Movies Banatay Hain, Is Martaba Avatar Ko Aik Naey Scale Aur Level Par Lay Gaey Hain. Khandan, Colonization, Badla Aur Qurbani, Ye Sab Is New Movie Mein Hay. Ab Dekhna Ye Hay Ke Ye Sab Say Zyada Kamanay Wali Movie Ka Record Bana Pati Hay Ya Nahi.
Top Gun: Maverick
2022 Mein Ye Baat To Sabit Ho Gai Ke Top Gun Kay 36 Saal Baad, Aaj Bhi Tom Cruise Aik Icon Hain. Wo 3 Decades Kay Baad Maverick Ko Phir Aasmanon Mein Lay Aaey. Top Gun: Maverick Aik Aisi Movie Thi Jo Har Lihaz Say Original Top Gun Say Behtar Hay. Acting, Action Sequences, Story, Sab Kuch Zabardast. Aik Aisi Movie Jo Aap Ko Jazbati Kar Day Gi.
Kya Aap Is List Say Ittefaq Kartay Hain? Aap Kay Khayal Mein Kaunsi Movie Hay Jisay Is List Mein Shamil Hona Chahiye? Hamain Zarur Batayen.