T20 World Cup 2022 Ireland Nay Scotland Ko Hara Kar Apnay Super 12 Stage Kay Chances Ko Zinda Kardia Hay. 

Scotland West Indies Ko Haranay Kay Baad Khatarnaak Mood Main Tha, Balke 176 Runs Bhi Bana Liay Thay Laikin Ireland Kay Curtis Campher Aur George Dockrell Ki Shandar Batting Kay Samnay Surrender Kardia. 

Yun Michael Jones Kay 86 Runs Kisi Kaam Nahi Aaey. Unhon Nay Sirf 55 Balls Par 4 Sixes Aur 6 Fours Ki Madad Say Ye Behtareen Innings Kheli Thi. 

Laikin Shayad Batting Main Scotland Ireland Ko Final Blow Nahi Maar Saka. Last 4 Overs Main Us Kay Batsmen Sirf 39 Runs Bana Sakay. 

Khair, 177 Runs Aik Bara Target Tha, Jisay Chase Kartay Huay Ireland Ka Start Bhi Acha Nahi Tha. 5th Over Tak Experienced Paul Stirling Aur Captain Andy Balbirnie Out Ho Gaey. Balke 10th Over Main Hi 61 Par 4 Khilari Wapis Ja Chukay Thay. 

Yahan Ireland Ko Sirf 63 Balls Par 116 Runs Ki Zaroorat Thi. Scotland Match Par Chhaya Hua Tha, Jab Curtis Campher Aur George Dockrell Nay Apna Jadu Dikhaya. 

Donon Nay 5th Wicket Par 57 Balls Par 119 Runs Ki Zabardast Partnership Ki. 

Campher Nay 32 Balls Par 2 Sixes Aur 7 Fours Kay Sath 72 Runs Banaey, Aur Dockrell 27 Balls Par 39 Runs Kay Sath Not Out Wapis Aaey. 

Is Partnership Ki 2 Khaas Batein Theen, Aik To Har Over Main Boundary Aur Doosra Dot Balls Ka Na Hona. Darmiyan Main Donon Nay 5 Overs Main Sirf 2 Dot Balls Kheleen. Yaheen Say Match Palat Gaya. 

6 Wickets Ki Is Yaadgar Kamyabi Kay Sath Ireland Ki Super 12 Stage Tak Puhanchnay Ki Campaign Zinda Hay. Balke Is Jeet Nay To Group ‘B’ Main Mazedar Situation Bana Di Hay. Waja? West Indies Nay Zimbabwe Kay Khilaf Apna Important Match Jeet Lia Hay. Ab Group Main Sab Teams Kay 2,2 Points Hain Aur Zara Bhi Ghalti Hui, To World Cup Waheen Khatam Ho Jaey Ga.

Share.

Leave A Reply