Pakistan Super League Ka 8th Season Hoga To Aglay Saal, Laikin Is Ki Tayari Abhi Say Shuru Ho Chuki Hay. PSL Draft Kay Sath Next Season Ki Taraf Sab Say Bara Qadam Uth Chuka Hay. Kai Baray Naam Pehli Baar PSL Ka Hissa Banain Gay. Laikin Kis Team Mein Kitna Dam Hay? Ye Hum Aap Ko Bataen Gay.
Islamabad United
2 Martaba Ka Champion Islamabad Hamesha ‘Dimagh Se’ Khelta Hay, Is Baar Bhi Team Dimagh Say Banai Hay. Agar Ye Kahain To Ghalat Nahi Hoga Ke Next Season Ki Sab Say Balanced Team Islamabad Hi Ki Lagti Hay.
Flamboyant Openers Alex Hales Aur Rehmanullah Gurbaz, Phir Paul Stirling, Colin Munro, Sohaib Maqsood Aur Azam Khan Jaisay Batsman, Neechay Asif Ali Jaisa Hitter. Allrounders Bhi Dekhain To Captain Shadab Khan Aur Mighty Moeen Ali. Bowlers Mein Roti Gang+ Kay Members Hasan Ali, Faheem Ashraf, Rumman Raees Aur Waseem Junior To Hain Hi, Unhain Afghan Sensation Fazal Haq Farooqi Aur ‘Man Of The Moment’ Abrar Ahmed Ka Sath Bhi Hasil Hay. Batayen Aur Kya Chahiye?
| 🟥 Islamabad United | |
|---|---|
 Alex Hales | Abrar Ahmed |
 Rahmanullah Gurbaz |  Colin Munro |
| Shadab Khan |  Paul Stirling |
| Asif Ali | Rumman Raees |
| Fazal Haq Farooqi | Sohaib Maqsood |
| Wasim Jr. | Hassan Nawaz |
| Azam Khan | Zeeshan Zamir |
| Faheem Ashraf | Moeen Ali |
| Hasan Ali | Mubasir Khan |
Karachi Kings
Stars To Karachi Kay Paas Hamesha Hotay Hain, Bus Performance Ki Umeed Nahi Hoti. Laikin Is Baar Lagta Hay Unhon Nay Apni Kamzori Ka Pata Chalanay Ki Kuchh Serious Effort Ki Hay, Isi Liay Platinum Pick Mein Hi South Africa Kay Imran Tahir Ko Lia Hay. Phir Mathew Wade Ki Pick To ‘Karachi Lahore Rivalry’ Ko Aik Naey Level Par Lay Gai Hay. Sochain Zara Ke Karachi-Lahore Match Mein Shaheen Afridi Bowling Kar Rahay Hon Aur Mathew Wade Khel Rahay Hon, Puri History Peechay Hogi.
Yahi Nahi Is Martaba To Muhammar Amir Aur Babar Azam Ki Battle Bhi Dekhnay Wali Hogi.
Khair, Imran Tahir Ka Sath Denay Kay Liay Supplementary Pick Tabraiz Shamsi Ki Li Gai Hay. Imad Wasim To Captain Hain Hi, Yani Spin Power Karachi Nazar Aaey Ga.
Kings Nay PSL Draft Mein James Vince Ko Aik Baar Phir Select Kia Hay, Aur Shoaib Malik Bhi Wapis Aaey Hain. Laikin Sab Ki Nazrain Hain New Look Rakhnay Walay Sharjeel Khan Aur Hyder Ali Par. To Hum Keh Saktay Hain Ke Karachi Season Mein Jaisa Bhi Perform Karay, Laikin Karachi-Lahore Rivalry Ab Naey Urooj Par Nazar Aaey Gi.
| 🟦 Karachi Kings | |
|---|---|
| Haider Ali | Aamer Yamin |
 Imran Tahir | Mir Hamza |
 Matthew Wade | Mohammad Akhlaq |
| Imad Wasim | Sharjeel Khan |
| James Fuller | Tayyab Tahir |
| James Vince | Irfan Khan Niazi |
| Andrew Tye | Qasim Akram |
| Mohammad Amir | Mohammad Umar |
| Shoaib Malik | Tabraiz Shamsi |
Lahore Qalandars
Defending Champion Lahore Qalandars Nay Wohi Kia Jo Usay Karna Chahiye Tha. PSL Draft Mein First Pick Par Hi ‘Apna Banda’ Fakhar Zaman Wapis Lia Aur Youn Us Ki Team Taqreeban Wohi Hay, Jis Nay Last Years Tareekh Badal Di Thi. Wohi Shaheen Afridi Aur Haris Rauf Fast Bowling Mein, Wohi Rashid Khan Spinners Kay Sath. Phir Harry Brook Aur Sikandar Raza Batting Mein Aur Liam Dawson All-Rounders Main. Yani Team To Buhat Achi Hay, Laikin Title Defend Karna Aik Art Hay. Lahore Is Art Ka Artist Kaisay Banay Ga? Ye Aanay Wala Waqt Bataey Ga.
| 🟩 Lahore Qalandars | |
|---|---|
| Fakhar Zaman | Ahmad Daniyal |
| Rashid Khan | Dilbar Hussain |
| Shaheen Shah Afridi | Harry Brook |
 Dawid Wiese | Kamran Ghulam |
| Hussain Talat | Mirza Tahir Baig |
| Haris Rauf | Shawaiz Irfan |
| Abdullah Shafique | Zaman Khan |
| Liam Dawson | Jalat Khan |
 Sikander Raza | Jordan Cox |
Peshawar Zalmi
PSL Draft Mein Peshawar Zalmi Ki Platinum Picks To Kisi Ko Samajh Nahi Aaeen. Babar Azam Ko Captain Bananay Ka Ailan Karnay Kay Baad Unhon Nay Platinum Mein Pehli Pick Li Rovman Powell Ki, Aur Phir Sri Lanka Kay Asian Champion Bhanuka Rajapaksa Ko Select Kia. Chalain Bhanuka Ki Phir Bhi Samajh Aati Hay Laikin Powell? Khair, Dekhtay Hain Ye “Platinum Pick” Peshawar Kay Liay Kia Lati Hay?
Waisay Team Mein To Dam Hay. Especially Supplementary Pick Jimmy Neesham Trump Card Sabit Ho Saktay Hain. Phir Bowling Department Buhat Mazboot Hay. Experienced Wahab Riaz Kay Sath Aamer Jamal, Arshad Iqbal Hon Gay Aur Spin Department Mein Mujeeb Ur Rehman Ko Pick Kia Gaya Hay. World Cup Mein Tehlka Machanay Walay Mohammad Haris Bhi Peshawar Ka Hi Hissa Hain. Dekhtay Hain Babar Ki Kaptaani Peshawar Ki Title Kay 3 PSL Finals Haarnay Ka Gham Ko Khatam Kar Sakay Gi Ya Nahi.
| 🟨 Peshawar Zalmi | |
|---|---|
| Babar Azam | Aamer Jamal |
 Rovman Powell | Tom Kohler-Cadmore |
 Bhanuka Rajapaksa | Saim Ayub |
| Mujeeb Ur Rehman | Salman Irshad |
| Sherfane Rutherford | Usman Qadir |
| Wahab Riaz | Haseebullah Khan |
| Arshad Iqbal | Sufyan Muqeem |
| Danish Aziz | Jimmy Neesham |
| Mohammad Haris |
Multan Sultans
Is Baar Multan Sultans Ki Batting Mein To Buhat Dam Nazar Aata Hay, Laikin Bowling ‘So-So’ Hay. PSL Draft Mein Multan Nay Platinum Pick Mein David Miller Ko Lia Jabke Team Kay Paas Rilee Rossouw Aur Tim David To Pehlay Say Hain. Laikin Bowling Dekhain: Shahnawaz Dahani Kay Sath Anwar Ali Aur Sameen Gul. Hamain To Supplementary Pick Mein Adil Rashid Kay Ilawa Koi World Class Bowler Nazar Nahi Aata. West Indian Akeal Hosein Kya Kar Saktay Hain Ye To Waqt Hi Bataey Ga. Khair, Mohammad Rizwan Aik Fighting Kaptaan Hain, Wo Team Ko Kisi Bhi Dushman Say Larranay Ki Salahiyat Rakhtay Hain. Ab Dekhna Ye Hay Ke Last Years Final Ki Haar Ko Is Baar Jeet Mein Badal Saktay Hain Ya Nahi.
| 🟦 Multan Sultans | |
|---|---|
| David Miller | Anwar Ali |
| Josh Little | Sameen Gul |
| Mohammad Rizwan | Sarwar Afridi |
| Khushdil Shah | Usama Mir |
| Rilee Rossouw | Usman Khan |
| Shan Masood | Abbas Afridi |
| Akeal Hosein | Ihsanullah |
| Shahnawaz Dahani | Adil Rashid |
| Tim David | Arafat Minhas |
Quetta Gladiators
First 4 Seasons Mein 3 Finals Khelnay Wala Quetta Pichlay 3 Saal Say Struggle Kar Raha Hay. Laikin Is Martaba Picks Buhat Achi Li Hain Aur Lagta Hay Hamain PSL 8 Mein Naya Balke Wohi ‘Purana’ Wala Quetta Nazar Aaey Ga. World No. 1 Bowler Wanindu Hasaranga Ko Platinum Category Mein Pick Kar Kay Gladiators Nay Apni Intentions Zahir Kar Di Hain. Phir Team Mein Fan Favourite Naseem Shah, Mohammad Hasnain Aur Mohammad Nawaz Kay Ilawa Naveen-Ul-Haq Aur Umaid Asif Bhi Bowling Line Mein Hain.
Phir Batting Bhi Kam Nahi: Jason Roy, Odean Smith Aur Supplementary Pick Martin Guptill, Middle Order Mein Iftikhar Ahmed Kay Sath Umar Akmal Aur Captain Sarfraz Ahmed Hon Gay.
Yani On Paper To Quetta Gladiators Behtareen Team Lag Rahi Hay, Laikin Maidan Mein Kya Hoga? Ye Aanay Wala Waqt Bataey Ga.
Aap Kay Khayal Mein Kaun Si Team Pakistan Super League 2023 Mein Title Kay Liay Favourite Hay?
| 🟪 Quetta Gladiators | |
|---|---|
| Mohammad Nawaz | Mohammad Zahid |
| Naseem Shah | Naveen-ul-Haq |
| Wanindu Hasaranga | Umar Akmal |
| Iftikhar Ahmed | Umaid Asif |
| Jason Roy | Will Smeed |
| Odean Smith | Aimal Khan |
| Ahsan Ali | Abdul Wahid Bangalzai |
| Mohammad Hasnain | Martin Guptill |
| Sarfaraz Ahmed | Omair Bin Yousuf |