Fans Chahay Film Stars Kay Hon Ya Cricketers Kay. Kabhi Kabhi Hadd Kar Detay Hain, Balke Har Hadd Paar Kar Detay Hain. India Kay Virat Kohli Bhi Aik Fan Ki Aisi Hi Harkat Samnay Laey Hain, Jo Seedha ‘Kohli Ki Kholi’ Maina Hi Ghuss Gaya.

Indian Batsman Nay Instagram Par Aik Video Share Ki Hay Jis Main Dikhaya Gaya Hay Ke Aik Fan Nay Kohli Kay Hotel Room Ki Detailed Video Banai Hay. Jis Ka Caption Hay “King Kohli’s Hotel Room”. Unhon Nay Isay Privacy Breach Qarar Dia Hay.

Kohli Nay Ye To Nahi Bataya Ke Ye Video Kahan Aur Kab Banai Gai, Laikin Andaza Hay Ke Ye 8 October Ko Team India Kay Australia Puhanchnay Kay Foran Baad Perth Kay Crown Towers Hotel Main Banai Gai Hogi. Fan Nay Ye Video Tik Tok Par Upload Bhi Ki Thi. Hotel Management Nay Maafi Mangnay Kay Sath Sath Ye Video Bhi Delete Karwa Di Hay.

Apni Is Instagram Post Main Virat Kohli Kehtay Hain Ke

“Mujhay Andaza Hay Ke Fans Apnay Favourite Players Ko Dekh Kar Aur Un Say Mil Kar Buhat Khush Aur Jazbati Ho Jatay Hain. Main Hamesha Unhain Appreciate Karta Hun. Laikin Ye Video To Holnaak Hay. Is Nay Mujhay Apni Privacy Kay Hawalay Say Pareshan Kardia Hay.”

Kohli Nay Mazeed Kaha Ke:

“Agar Mujhay Apnay Hotel Room Main Bhi Privacy Na Milay To Main Kahan Jaun? Main Aisay Jazbati-Pan Aur Privacy Invasion Ko Bilkul Pasand Nahi Karta. Doosron Ki Privacy Ka Khayal Rakhain Aur Unhain Apni Entertainment Ka Samaan Na Samjhain.”

Kohli Aur In Ki Biwi Anushka Ko Paparazzi Photographers Ka Bhi Samna Raha Hay. Apnay Pehlay Bachay Ki Pedaish Say Pehlay Donon Ki Aik Tasveer Samnay Aai Thi. Jis Main Donon Apnay Ghar Ki Balcony Main Bethay Hain. Is Par Bhi Couple Nay Sakht Reaction Bhi Dia Tha. Laikin Ye Photo Aaj Bhi Apni Jaga Mojood Hay.

Share.

Leave A Reply