PTI Ke Chairman Imran Khan Ne Wazir Abad Main Khud Per Honay Walay Qatilana Hamlay Ke Hawalay Se Sansani Khez Ilzamat Lagaye Hain.

Imran Khan Nay Wazir Abad Qatilana Hamlay Main Dusray Afsar Ke Bhi Mulawis Honay Ka Ilzam Aaid Kiya Hay.

Imran Khan Ne Twitter Post Main Likha Ke Mere Qatal Ki Sazish Ka Mujhe 2 Mahinay Pehlay Pata Chal Gaya Tha. Main Ne 24 September Ko Rahim Yar Khan Aur 7 October Ko Mianwali Main Us Sazish Ko Be Naqab Kar Diya Tha. Wazir Abad Main Honay Wala Hamla Usi Script Ke Tehat Kiya Gaya.

Dusray Tweet Main Unhon Ne Likha Kay Main Us Dusray Afsar Ka Naam Bhi Saamnay Laaun Ga. Wo Afsar Bhi Dopehr 12 Se Sham 5 Bajay Tak Control Room Main Maujud Raha. Un Dono Ne Qatliana Hamlay Ke Plan Per Amal Ki Monitoring Ki.

Imran Khan Ne Jalson Main Kiya Kaha Tha

Imran Khan Ne Rahim Yar Khan Aur Mianwali Jalson Main Khud Per Hamlay Ka Zikar Kiya Tha. Un Ka Kehna Tha Ke ‘4 Logon Ne Band Kamray Main Faisla Kiya Kay Mujhe Qatal Karwa Diya Jaye. Maryam Aur Javed Latif Se Press Confernce Karai Gayi Hay Ke Imran Khan Ne Mazhab Ki Tauheen Ki Hay. In Ki Koshish Hay Ke Agar Mere Khilaf Koi Bhi Wardat Ho Tou Kahen Ge Ke Ji Mazhabi Junooni ne Kar Diya. Kisi Deeni Inteha Pasand Ne In Ko Maar Diya. Ye In Ka Plan Hay. Imran Khan Ne Kaha Tha Ke Is Ke Ba Wajood Main Puray Pakistan Main Phir Raha Hun. Kyunke Mujhe Apni Jaan Se Zyada Pakistan Ki Azadi Ki Fikar Hay. Aur Mera Iman Hay Ke Jab Tak Allah Na Chahe Koi Dunya Se Nahi Jata.’

Jalsay Main Un Ka Kehna Tha Ke ‘Main Ne Aik Tape Bana Kar Rakhi Hay. Jab Bhi Mujhe Kuch Hua Wo Tape Aa Jaye Gi. Aur Un 4 Logon Ke Naam Puri Qaum Ke Samnay Aa Jayen Ge Jinhon Ne Band Kamray Main Ye Faisla Kiya Hay.’

Share.

Leave A Reply