Karachi Main LB Elections Aik Baar Phir Multawi Kar Diye Gaye.
Election Commision Ne Karachi Main 23 October Ke Baldiyati Intikhabat Multawi Karne Ka Faisla Sindh Hukumat Ki Darkhwast Par Kiya.
Sindh Hukumat Ka Kehna Hay Ke Elections Ke Liye Security Faraham Karnay Ke Liye Usay 16 Hazar Police Ehalkaron Ki Kami Ka Saamna Hay.
Election Commission Ne Wizarat-e-Difaa Ko Ye Batanay Ki Hidayat Ki Ke Kia Wo 16 Hazar Security Ehalkar Faraham Kar Saktay Hain Ya Nahi. Udhar Secretary Defence Ne Pehlay Hi Army Aur Rangers Ehalkaron Ki Tayynati Se Maazrat Kar Li Thi.
Sindh Hukumat Ke Mutabiq Elections Ke Liye 5 Hazar Polling Station Qaaim Kiye Jayen Ge Jin Main Se Taqreeban 1300 Intehai Hasas Aur Taqreeban 3700 Hassas Qarar Diye Gaye Hain.
Sindh Hukumat Ki Darkhwast Per Election Commision Ne LB Elections Multawi Karnay Ki Manzuri De Di.
LB Election Ke Nayi Tareekh Ka Faisala 15 Din Baad Honay Walay Ijlas Main Kiya Jaye Ga.