Wazir-e-Dakhla Rana Sana Ullah Ka Kehna Hay Ke PM House Ki Audio Leaks Main Koi Mulki Ya Dushman Agency Mulawais Nahi. Amlay Ke Kuch Logon Ne Paison Ke Liye Infiradi Taur Per Kaam Kiya.
Aik TV Program Main Baat Kartay Huye Un Ka Kehna Tha Ke Audio Leaks Ki Tehqiqat Mukammal Ho Gayi Hain. Wazir-e-Azam Faisla Karen Ge Ke Tehqiqat Ke Nataij Kahan Paish Kiye Jayen.
Rana Sana Ne Kaha Ke Hukumat Ke Khilaf Is Muhim Ke Zimmedaron Ke Khilaf Suboot Jama Kar Liye Hain, Un Ke Khilaf Karrawai Hogi.
Rana Sana Ka Ye Bayan Us Waqt Samnay Aaya Hay Jab Chairman PTI Imran Khan Ne Elan Kiya Hay Ke Wo Audio Leaks Ki Tehqiqat Ke Liye Adalat Se Rujoo Karen Ge.