Tosha Khana Case Main Imran Khan Ki Na Ehali Ke Faisla Aanay Par Hukumran Ittehad Khushi Say Nihal Ho Gaya Hay.
Wazir-e-Azam, Wazir-e-Qanoon Aur Wazir-e-Kharja Hon Ya Aam Leader, Koi TV Par Qanoon Ki Fatah Ke Taranay Ga Raha Hay Tou Koi Twitter Par Naveed-e-Mussarat Suna Raha Hay.
Aisa Lag Raha Hay jaisay Pakistan Kay Saray Mas’alay Goya Isi Case Say Wabasta Thay Aur Imran Khan Ki Disqualification Ka Baad Ab Mulk Tarraqi Ke Safar Par Sarpat Dornay Lagay Ga. Mehngai Bhi Khatam Ho Jaye Gi, Doodh Aur Shehad Ki Nehrain Behnay Lagain Gi Aur Har Taraf Amn o Sukoon Ka Daur Daura Ho Ga.
Election Commision Ne Insaf Kiya, Shehbaz Sharif
Wazir-e-Azam Shehbaz Sharif Sahib Farmatay Hain Kay Election Commision Nay Tausha Khana Case Main Insaaf Kiya. Qaum Nay Dekh Liya Kay Corrupt Practice Kar Kay Wazir-e-Azam Kay Mansab Ko Zati Aamdan Ka Zariya Banaya Gaya. Sadaqat o Amanat Ka But Paash Paash Ho Gaya.
Unhon Nay Naam Liye Baghair Imran Khan Ko Mashwara Diya Kay, “Qanoon Say Larnay, Golian Danday Chalanay, Fasadi Jathay Lanay Kay Bajaye Qanoon Kay Samnay Sar Jhukayen. Koi Qanoon Say Bala Nahi Hay.
Certified Chor Anjam Ko Pohncha, Maryam Nawaz
Twitter Par Jari Video Pegham Main Maryam Nawaz Ne Kaha Ke ‘Allah Ka Shukar Hay Kay Aik Certified Chor Apne Anjaam Ko Pohncha, Jo Doosron Ko Chor Chor Kehta Tha, Aaj Us Par Na Sirf Chori Saabit Ho Gayi Hay Bulkay Jo Suboot Hain Woh Na Qabil-e-Tardeed Hain.’
Unhon Ne Kaha Ke ‘Wo Suboot Kay Sath Pakistan Ka Sanad Yafta Chor Hay, Jis Tarha Ki Chori Us Ki Pakri Gayi Hay, Is Par Sirf Na-Ehli Kaafi Nahi Hay, Is Ke Khilaaf Jaisay ECP Nay Kaha Kay Mujrimana Karrawai Shuru Honi Chahiye.'
Imran Khan Rangay Hathon Pakray Gaye, Bilawal
Wazir-e-Kharja Bilawal Bhutto Zardari Nay Tweet Main Likha 'Election Commission Of Pakistan Nay Imran Khan Ko Corrupt Sargarmion Ka Mujrim Qarar Diya Hay, Woh Ab Na Ehal Ho Chukay Hain.'
Unhon Ne Mazeed Kaha Ke ' Jis Nay Apnay Siyasi Mukhalfeen Kay Khilaaf Alleged Corruption Kay Baray Main Jhoot Phelaya, Is Ko Rangay Hathon Pakra Gaya Hai.'
Qaum Ko Mubarak Ho, Fazal-ur-Rehman
Chairman JUIF Aur PDM Kay Sarbarah Maulana Fazal-Ur-Rehman Ne Islamabad Main Miedia Se Guftgu Kartay Huye Kaha Ke ‘Hum Pehlay Din Say Keh Rahay Hain Kay Imran Khan Ko Pakistan Ki Siyasat Main Feed Kiya Gaya Hay, Is Kay Peechay International Establishment Hay. Imran Khan Ki Amanat Aur Dayanat Ka Pol Khul Gaya Hay.’
Unhon Nay Mazeed Kaha Kay Hum Nay Imran Khan Ko Iqtidar Say Nikala Hay Aur Aaj Mulk Ki Siyasat Say Bahar Kar Diya Hay. Ye Hamari Fatah Hay, Qaum Ki Fatah Hay Jis Par Puri Qaum Ko Mubarakbad Deta Hun.
Na Ehli 5 Saal Ke Liye Hui Hay, Azam Nazir Tarar
Wazir-e-Qanoon Azam Nazeer Tarar Nay Islamabad Main Press Conference Kartay Huye Kaha Kay Imran Khan Ki Na Ehli Article 63 A Kay Tehat 5 Saal Ke Liye Hui Hay. Election Commission Nay Imran Khan Kay Criminal Case Ko Trial Kay Liye Bhej Diya Hay.
Unhon Nay Mazeed Kaha Kay Imran Khan Ko Qanoon Ka Samna Karna Chahiye. Jathay Lay Kar Laathi Goli Chalana, Logon Ki Zindagi Ajeeran Karna Ye Kisi Qaumi Rehnuma Ko Zaib Nahi Deta.