Hattrick Aur Aik Incredible Catch Bhi United Arab Emirates Ko T20 World Cup Main Apni Pehli Jeet Nahi Dila Saka. Balkay Sri Lanka Kay Hathon 79 Runs Ki Buri Shikast Nay Usay Tournament Say Hi Bahar Kardia Hay.
First Round Main Group A Kay Is Important Match Main Sri Lanka Nay 152 Runs Banaey Aur UAE Ko Sirf 73 Par All Out Kardia. Yoon Namibia Kay Hathon Upset Shikast Kay Baad Sri Lanka Super 12 Ki Race Main Wapis Aa Gaya Hay.
UAE Ki Dawat Par Pehlay Batting Kartay Huay Sri Lanka Aik Achhay Start Ka Faida Nahi Utha Saka. Pathum Nissanka Ki 60 Balls 74 Aur Dhananjaya De Silva Ki 21 Balls 33 Runs Ki Innings Kay Baad Koi Batsman Jam Kar Nahi Khel Saka. Bhanuka Rajapaksa, Charith Asalanka Aur Captain Dasun Shanaka (C) To Consecutive 3 Deliveries Par Out Ho Gaey. Ye Karthik Meiyappan Thay Jinhon Nay Hattrick Karkay Tehlka Macha Dia Hay.
Phir Basil Hameed Nay Wanindu Hasaranga Ka Jo Catch Lia, Aisa Lag Raha Tha Ke Aaj To UAE Ka Din Hay. Aur Wo Namibia Kay Steps Par Chaltay Huay Asian Champion Sri Lanka Ko World Cup Say Hi Bahar Kar Day Ga.
Laikin Sri Lankan Bowlers Nay Aisa Nahi Honay Dia. Unhon Nay To UAE Ki Batting Line Ko Saans Hi Nahi Lainay Dia. Koi Khilari 20 Runs Bhi Nahi Bana Saka, Yahan Tak Ke 18th Over Main Poori Team 73 Runs Par All Out Ho Gai.
Ab Group Main Buhat Mazay Ki Situation Ban Chuki Hay. Namibia Ka Last Match UAE Kay Saath Hi Hay, Jahan Jeet Namibia Kay Chances Main Izafa Kar Day Gi. Sri Lanka Ko Netherlands Say Khelna Hoga, Jahan Kamyabi Usay Super 12 Main Puhancha Day Gi.