Dead Rubber Tha To Pakistan Aasani Say Jeet Gaya, Laikin Semi Final Ka Pressure Green Shirts Ko Lay Dooba. Pakistan Women’s Asia Cup Kay Semi Final Main Sri Lanka Kay Hathon Sirf 1 Run Say Haar Gaya. Yani Pak-India Final Dekhnay Ki Umeed Khatam Hogai.

Agar Ye Kahain To Ghalat Nahi Hoga Ke Pakistan Nay Jeeta Hua Match Haara. Last 4 Overs Main Pakistan Ko Sirf 23 Runs Ki Zarurat Thi. Captain Bismah Maroof Is Say Pehlay 2 Fours Bhi Laga Chuki Theen, Laikin Is Kay Baad Pakistan Aik Boundary Tak Nahi Laga Saka.

Sri Lanka Nay Toss Jeetnay Kay Baad Pehlay Khud Batting Ka Faisla Kia Tha, Aur Pakistan Ko 123 Runs Ka Target Dia. Jisay Chase Kartay Huay Pakistan Nay Bohat Tez Start Lia. Openers Nay 3 Overs Main Hi 31 Runs Bana Liay. Wicket Keeper Muniba Ali 10 Balls Par 18 Runs Bana Kar Out Hueen.

Yahan Captain Bismah Maroof Khelnay Aaeen Aur Jab Tak Crease Par Raheen, Pakistan Match Main In Tha. Laikin 18th Over Main Un Kay Out Hotay Hi Match Palat Gaya. Phir Nida Dar Ki Mojoodgi Bhi Pakistan Ko Jitwa Nahi Saki.

Match Ka Sub Say Important Over Achini Kulasuriya Nay Kia, Jinhon Nay Last Over Main Sirf 9 Runs Defend Kiye. Last Ball Par Jab 3 Runs Ki Zarurat Thi To Nida Dar Winning Shot Nahi Laga Sakeen Aur Run Out Ho Gayeen, Yoon Pakistan Match Ko Super Over Main Lay Janay Main Bhi Nakam Ho Gaya.

India 1st Semi Final Main Thailand Ko 74 Runs Say Hara Kar Aik Baar Phir Final Main Pohanch Chuka Hay. Wo Aaj Tak Honay Walay 7 Asia Cup Tournaments Main Say 6 Jeeta Hay.

Sri Lanka 2004 Say 2008 Kay Beech 4 Baar Asia Cup Ka Final Khela, Aur Har Martaba India Say Haara. Dekhtay Hain Pakistan Kay Baad India Say Bhi Badla Lay Sakay Ga Ya Nahi.

Share.

Leave A Reply