David Wiese Ki Toofani Batting Bhi Namibia Ko T20 World Cup 2022 Kay Super 12 Round Main Nahi Puhancha Saki. United Arab Emirates Khud To Tournament Say Bahar Tha Hi, Namibia Ko Bhi Kar Gaya. Yoon T20 World Cup Kay Group ‘A’ Say Sri Lanka Aur Netherlands Nay Super 12 Kay Liay Qualify Karlia Hay.
World Cup Main Super 12 Round Say Pehlay Hi Kai Super Matches Milay, Jin Main Aaj Namibia Aur UAE Ka Match Bhi Shamil Tha. 149 Runs Chase Kartay Huay Namibia Sirf 69 Runs Par 7 Wickets Day Chuka Tha. Target Buhat Door, Pooray 80 Runs Door, Tha. Jab David Wiese Ka Balla Chal Gaya.
Wiese Nay Sirf 36 Balls Par 55 Runs Banaey. Un Ki 3 Sixes Aur Itnay Hi Fours Ki Ye Innings Match Hi Khatam Kar Deti, Laikin Last Over Main, Finishing Touch Say Pehlay Wo Out Ho Gaey Aur Namibia 141 Runs Par Hi Khara Reh Gaya.
Ye World Cup History Main UAE Ki Pehli Jeet Thi, Jis Main Un Kay Batsmen, Bowler Aur Fielders, Sub Ka Apna Bohat Important Kirdar Tha. Mohammad Waseem Ki Fifty, Chundangapoyil Rizwan Ki Captain Innings, Aakhir Main Basil Hameed Kay Kararay Chakkay, Un Donon Kay Last 5 Overs Main Banaey Gaey 51 Runs Aur Phir Zahoor Khan Ka Zabardast 2 Wicket Over. Aakhri Waar Kia Alishan Sharafu Kay Catch Nay Jinhon Nay Pressure Situation Main Wiese Ka Boundary Line Par Aik Buhat Achha Catch Lia.
Laikin Namibia Kay Sath Sath Ye Lahore Qalandars Fans Kay Liay Bhi Mayoosi Ka Din Tha, David Wiese Ka Is Tarah Rona Unhain Bhi Rula Gaya.
Mazay Ki Baat Ye Hay Ke Match Khatam Honay Par UAE Players Say Ziada Stadium Main Mojood Dutch Fans Khush Thay. Aur Akhir Kyun Na Hotay? Aaj Ka Match Haar Kar Bhi Super 12 Ka Ticket Mil Gaya.