Thailand Main Aik Day Care Center Per Firing Se Bachon 22 Samait 34 Afrad Halak Ho Gaye.
Marne Walon Main Zyada Tar Bachon Ki Umrain 5 Saal Se Kam Hain.
Nong Bua Lamphu Subay Ke Aik Day Care Center Main Waldain Jab Subah Apne Bachon Ko Chor Kar Gaye Tou Un Ke Wehm-o-Guman Main Bhi Nahi Tha Ke Wo Apne Bachon Ko Aakhri Baar Dekh Rahe Hain.
Thai Media Ke Mutabiq Hamla Awar Muqami Waqt ke Mutabiq Dopehr 12:30 Per Utthai Sawan Town Ke Nursery Center Main Ghusa. Us Ke Paas Shotgun, Pistol Aur Khanjar Tha.
Hamla Awar Aik Sabiq Policeman Tha Jisay Guzishta Saal Drugs Istemal Karne Ke Ilzam Main Nikala Gaya Tha.
Hamlay Main Bach Jane Wali Teacher Ne Bataya Ke Hamla Awar Ka Bacha Bhi Wahan Parhta Tha Aur Wo Aam Tour Per Khush Ikhlaq Nazar Aata Tha. Hamlay Ki Wajuhat Ka Pata Ab Tak Nahi Chal Saka.
Media Ke Mutabiq Bohat Se Bachon Ki Umar 2 Saal Se Bhi Kam Thi, Wo Day Care Center Main Soye Huye Thay Jab Unhen Maut Ke Ghaat Utar Diya Gaya.
Hamla Awar ne Pehlay Day Care Center Ke Amlay Per Firing Ki, Un Main Aik 8 Maah Ki Hamila Teacher Bhi Shamil Thi. Us Ke Baad Mulzim Us Kamray Main Dakhil Hua Jahan Bachay So Rahay Thay, Whan Us Ne Bachon Ko Golion Aur Khanjar Ke War Se Qatal Kiya.
Police Ke Mutabiq 34 Sala Mulzim “Panya Kamrab” Hamlay Ke Baad Gari Main Farar Hua Aur Jatay Huye Kai Logon Ko Kuchal Kar Zakhmi Bhi Kar Gaya.
Waqaye Ke Baad Police Ne Twitter Per Warning Aur Mulzim Ki Talash Ka Ishtehar Jari Kiya.
Police Ke Mutabiq Hamla Awar Ne Ghar Pohnch Kar Apne Bachay Aur Biwi Ko Qatal Kar Ke Khudkashi Kar Li.
Hamlay Ke Baad Day Care Center Per Qayamat khez Manazir nazar Aaye. Waldain Apni Nanhy Bachon Ki Laashon Ko Seenay Se Laga Kar Dharen Maar Kar Rotay Rahay. Zakhmi Aur Dehshat Zada Bachon Ki Cheekh-o-Pukar Bhi Dilon Ko Dehlati Rahi. Muqami Afrad Ke Mutabiq Is Dil Kharash Waqiye Ko Wo Kabhi Nahi Bhula Saken Ge.