Aaj Us Shakhs Ki Barsi Hai Jo Kehta Tha
Ab Koi Mujh Ko Tokta Bhi Nahi
Yahi Hota Hai Khandan Mein Kya
Khandano Mein Waqai Aisa Nahi Hona Chahiye. Lekin Jaun Ke Sath Yahi Hua, Bhaiyon Ko Allah Nay Bula Lia, Biwi Chorr Kar Chali Gayi. Bachay Bhi Khafa. Jaun Ki Aakhri Umr Doston Aur Shagirdon Ke Saharay Guzri, Aakhri Ayyaam Musavvir Shahid Rassam Kay Ghar Katay.
Dunya Nay, Maddahon Nay, Shagirdon Nay Jaun Ko Buhat Mohabbat Di, Phir Bhi Woh Mohabbat Ko Tarastay Rahay, Taraptay Rahay. Inhen To Wisal Mein Bhi Judai Ki Soojhti. Farmatay Hain
Bohat Nazdeek Aati Jarahi Ho
Bicharnay Ka Irada Karliya Kya
Jaun Sahib Sirf La-Ubali, Hawaas Bakhta Aur Aashiq Pesha Sha’ir Hi Nahi Thay, Mosoof Barray Parhay Likhay Aadmi Bhi Thay. Farsi, Urdu To Khair Ghutti Mein Pari Hui Thi, Lekin Qibla Ko Arbi Aur Hairat Angez Taur Par Ibrani (Hebrew) Par Bhi Khasa Uboor Tha. Pedaishi Taur Par to Amroha Ke Shia Thay Lekin Poora Khandan Hi Bara Wasee-ul-Mashrab Aur Maranjan-Maranj. Jaun Ne Arbi Kahin Aur Say Nahi Balkay Deoband Kay Aik Molvi Sahib Se Parhi Thi. Apne Majmoay ‘Shayad’ Ke Debachay Mein Dharallay Se Is Ka Izhar Bhi Kia.
Jaun Ne Aga Khan Foundation Ke Liye Arabi Aur Ibrani Ke Makhtootat Par Bhi Kaam Kya. Aik Risalay Mein Siyasi Aur Samaji Mazmoon Bhi Likhte Rahay. Lekin Awwal-o-Akhir Thay Sha’ir Hi.
Lambi Bhikri Zulfein, Munhani Tan-o-Taush Lekin Tawana Aur Buland Aawaz. Parhte To Musha’ira Loot Letay. Shair Mein Mohabbat Ki Kasak Bhi Hoti, Falsafay Ki Chamak Bhi. Nafsiat Ki Ghirhein Bhi Jinsiyat Ki Uljhanein Bhi. Aisay Aisay Shair Bhi Kahe Jo Sehl-e-Mumtana Ki Misaal Hain, Sehl-e-Mumtana Aisay Shair Ko Kehtay Hain Jis Ko Nasar Mein Likha Jaye Tou Bhi Lafzon Ki Tarteeb Wohi Rahay Gi.
Baatein Bohat Huien, Ab Jaun Ke Kuch Shair Sun Len:
Yeh Jo Takta Hai Aasman Ko Too
Koi Rehta Hai Aasman Mein Kya
Yeh Mujhe Chain Kyun Nahi Parta
Aik Hi Shakhs Tha Jahan Mein Kya
Kitni Dilkash Hai Too Kitna Diljoo Hoon Mein
Kya Sitam Hai Ke Hum Log Mar Jaen Ge
Suna Hay Jaun Ne Marnay Se Aik Raat Pehlay Yeh Shair Kaha Tha:
Jaun Kya Waqia Hay Honay Ko
Jee Bohat Chahta Hai Ronay Ko
