Sab Ka Khwab Hota Hay Apna Business. Laikin Karobar Kay Liay Sirf Investment Hi Nahi Management Skills Bhi Chahiyen. Team Main Aap Kay Members Kay Roles Define Hon Tou Aap Ki Business Grow Honay Kai Sath Aap Ki Buhat Si Mushkilat Bhi Khatam Hojati Hain. Kisi Business Ko Kamyab Bananay Kay Liay Aap Ko Sirf 5 Logon Ki Zarurat Hoti Hay. Kaun Say? Aaen Aap Ko Batatay Hain.
Numbers Ka Ustad
Business Shuru Kartay Huay Pehla Banda Rakhain Accounts Ka Cheeta. Jo Business Funds Ko Manage Kerna Janta Ho. Tax Records Ko Sanbhalnay Kay Saath Financial Reports, Balance Sheets, Profit And Loss Statements Bhi Manage Kernay Ki Ability Rakhta Ho.
Analytical Master
Aap Ki Company Main Aisa Banda Ya Koi Aisa Experienced Member Zaroor Hona Chahiye Jo Complexed Documents Parh Ker Samjh Sakay. Business Needs Ko Samnay Rakhtay Huay, Forms Aur Contracts Per Theek Say Response Day Sakay. Yeh Team Member Business Attorney Hoga, Jo Aap Ko Buhat Si Jaghon Per Faida Day Sakta Hay.
Aik Artist
Team Main Aisa Aik Member Bhi Lazmi Hona Chahiye Jo Artistic Talent Rakhta Ho. Us Ko Flyers Aur Broachers Say Lai Ker Logo Aur Websites Kay Items Design Kernay Aatay Hon. Aisay Member Say Pora Office Benefit Hasil Ker Sakta Hay. Photoshop Aur Doosray Graphic Design Software Main Proficiency Company Kay Liye Asset Hogi. Artistic Role Walay Member(S) Ko Outsource Bhi Kia Jasakta Hay. Online Bhi Aisay Laug Mil Saktay Hain Jin Say Aap Kay Business Ko Buhat Faida Hasil Hoga.
Tech Guru
New Tech Trends Qubool Karna Kisi Bhi Company Aur Business Ki Success Main Eham Hota Hay. Is Liay Aap Ki Team Main Aisay Fard Ka Hona Buhat Zaruri Hay Jo Technology Ka Mahir Ho.
Aaj Computer Har Office Ki Zarurat Hay. Aap Ka Member Technological Sound Ho Aur Email Say Lay Ker Hardware Tak, Sab Kaam Daikh Sakta Ho, To Aap Kay Liay Kai Mushkilain Aasan Ho Jaen Gi.
Yeh Tech-Talented Member Aap Ki Company Ki Website Bhi Sanbhal Sakta Hay. Waisay Website Kay Design Aur Sanbhalnay Kay Liye Kaam Initially Outsource Bhi Kia Ja Sakta Hay. Is Kay Baad, Internally Team Member Kay Zariye Bhi Is Ko Update Kiya Ja Sakta Hay.
Sales Ka Mahir
Pehlay Din Say Hi Aap Ki Team Main Aisa Member Hona Chahiye Jo Sales Grow Karnay Ka Mahir Ho. Sales Ka Banda Aap Ki Marketing Ko Bhi Dekh Sakta Hay Kyun Kay Dono Aik Jaisi Fields Hain. Customer Relations Main Strong Skills Kisi Bhi Company Kay Liye Buhat Zaruri Hain.
Multitalented Employees Kisi Bhi Company Kay Liye Asset Ka Darja Rakhtay Hain. Agar Aap Ka Team Member Kai Skills Jaanta Ho Tou Yeh To Bachat Ka Bara Zariya Ban Sakta Hai, Aur Company Bhi Direction Main Grow Bhi Kar Sakti Hay.