Kya Hum Ab Tak Daur-e-Jahiliat Mein Ji Rahay Hain. Jahan Qabeeley Ke Sardar, Waderay, Khan, Nawab Aur Chaudhry Jeetay Jagtay Insanon Ko Apna Ghulam Aur Qaidi Bana Kar Rakhtay Hain. Jab Chahtay Hain Kisi Chewnti Ki Tarha Masal Kar Un Ki Zindagi Ka Khtama Kar Detay Hain? Yeh Sawalaat Har Kuch Arsay Baad Pakistan Ke Awam Ke Zehnon Mein Peda Hotay Hain. Balochistan Ke Zilla Barkhan Mein Khatoon Aur 2 Bachon Ke Qatal Par Bhi Yahi Sawal Uth Rahay Hain.
Mein Kis Ke Haath Per Apna Lahu Talash Karun?
Chand Din Pehlay Social Media Par Aik Video Viral Hui Thi Jis Mein Aik Khatoon Quran Haath Mein Utha Kar Apni Aur Apnay Bachon Ki Rihayi Ke Liye Bheek Maang Rahi Thi. Granaz Keh Rahi Theen Ke Wo, Un Ki Beti Aur 6 Betay Sardar Abdul Rehman Khetran Ki Niji Jail Mein Qaid Hain Jahan Un Ke Sath Ghair Insani Sulook Aur Tashadud Kya Jata Hay.
Video Social Media Par Viral Hui Magar Kisi Ka Dil Na Dehla. Kisi Munsif, Kisi Hukmaran Ne Koi Notice Nahi Liya. Niji Jail Se Azadi Chahanay Wali Be Bas Khatoon Aur Is Ke 2 Bachon Ko Zindagi Ki Qaid Hi Se Azadi Mil Gayi. Granaz Aur Un Ke 2 Bachon Ki Lashain Barkhan Mein Kunvey Se Mileen. Khatoon Ki Laash Aisay Maskh Ki Gayi Thi Ke Dard-e-Dil Rakhnay Walon Ki Rooh Kanp Jaye. 15 Saal Ke Abdul Qadar Aur 22 Saal Ke Mohammad Nawaz Marri Ki Laashon Par Bhi Shadeed Tashadud Ke Nishanaat Thay. Tenu Afraad Ko Tashadud Ke Baad Golian Maar Kar Qatal Kya Gaya Tha.
Barkhan Ke Mazloom Khandan Ki Be Basi
Granaz Ke Shohar Khan Mohammad Marri Biwi Bachon Ki Rihayi Ke Liye Bohat Arsay Se Darbadar Bhatak Rahay Thay. Un Ka Kehna Hay Ke Wo Barkhan Mein Sardar Abdul Rehman Khetran Ke Mulazim Thay, 2019 Mein Sardar Ne Unhein Apne Betay Inaam Khetran Ke Khilaaf Jhooti Gawahi Dainay Ke Liye Kaha. Inkaar Par Un Ke Biwi Bachon Ko Niji Jail Mein Qaid Kardiya Aur Un Ko Aik Jhutay Case Mein Phansa Diya. Khan Mohammad Marri Ke Mutabiq Wo Us Jhutay Case Mein 3 Saal Jail Mein Rehne Ke Baad Ba Izzat Buri Hogaye Lekin Sardar Abdul Rehman Khetran Un Ko Dhamkian Detay Rahay Ke Jhooti Gawahi Na Di Tou Biwi Bachon Ko Rihayi Nahi Milay Gi.
Mohammad Khan Marri Kehtay Hain Ke Jaan Ke Khauf Ki Wajah Se Woh Barkhan Nahi Jasaktay Thay. Unhon Ne Biwi Bachon Ki Rihayi Ke Liye Mutaliqa Hukkaam Ke Darwazay Khatkhataye Lekin Kahin Shunwai Nahi Hui. Chand Din Pehlay Marri Ittehaad Tehreek Ki Janib Se Quetta Mein Ehtajaji Muzahira Bhi Kya Gaya Tha.
Biwi Aur 2 Bachon Ki Lashain Milnay Ke Baad Mohammad Khan Marri Par Qayamat Guzar Gayi Hay. Unhon Ne Aala Hukam Se Darkhwast Ki Ke Un Ki Beti Aur 4 Bachon Ko Rihayi Dilae Jaye Jo Ab Bhi Sardar Abdul Rehman Khetran Ki Jail Mein Hain .
Khan Muhammad Marri Ki Biwi Aur 2 Beton Ki Namaz-e-Janaza Kohlu Mein Ada Ki Gayi Jis Ke Baad Un Ki Laashon Ko Quetta Laa Kar Wazeer-e-Aala House Ke Qareeb Chowk Par Rakh Kar Ehtijaj Kya Gaya.
Muzahreen Ne Kaha Ke Jab Tak Un Ke Mutalibaat Poooray Nahi Hon Ge Tadfeen Nahi Ki Jaye Gi. All Pakistan Marri Ittehad Ke General Secretary Ne Khan Muhammad Marri Ke Deegar Bachon Ki Rehai Ke Liye Ro Kar Appeal Ki.
Sardar Abdul Rehman Khetran Kiya Kehtay Hain?
Balochistan Awami Party Ke Rehnuma Aur Subai Wazeer Sardar Abdul Rehman Khetran Kehte Hain Ke Ilzamaat Jhutay Aur Un Ki Saakh Kharab Karne Ki Saazish Hain. Khatoon Aur Un Ke Bachay Un Ki Qaid Mein Nahi Thay Nah Un Ki Koi Niji Jail Hai.
Abdul Rehman Khetran Ke Mutabiq Unhein Pehlay Bhi Niji Jail Aur Deegar Ilzamaat Mein Girftar Kya Gaya Tha Aur Wo 2018 Mein In Ilzamaat Se Bari Ho Gaye Thay.
Udhar Police Ne Abdul Rehman Khetran Ke Barkhan Aur Quetta Walay Gharon Par Chaapay Maaray Hain Taham Police Ko Koi Qaidi Ya Niji Jail Nahi Mili.
Wazeer e Aala Balochistan Ne Tehqiqaat Ke Liye JIT Bana Di Hay. Balochistan Assembly Aur Senate Ke Arkaan Bhi Awaz Utha Rahay Hain. Ab Dekhna Ye Hay Ke Mutasira Khandan Ko Insaaf Mil Paye Ga Ya Maazi Ke Waqeat Ki Tarha In Be Gunaahon Ka Khoon Bhi Waqt Ki Dhool Talay Chhup Jaye Ga.