Lahore High Court Mein Aisa Manzar Tha Jaisay Tamil Filmon Mein Dikhaya Jata Hai Ke" Bhai" Anay Wala Ho Aur Is Ki Entry Se Pehlay Poora Mahol Banaya Jata Yai. Aisa Hi Kuch Sabiq Wazeer e Azam Aur Chairman Tehreek Insaaf Imran Khan Ki Lahore High Court Mein Paishi Se Pehlay Aur Baad Mein Dekhnay Ko Mila.
Imran Khan Ki High Court Mein Entry Aur Kamrah Adalat Mein Paish Honay Tak Poora Suspense Rakha Gaya, Lekin Hua Bilkul" Bhai" Ki Mansha Ke Ain Mutabiq.
Do Alag Alag Adalten Theen. Justice Ali Baqar Najafi Ki Sarbarahi Mein 2 Rukni Bench Ke Samnay Interim Bail Ke Liye Jahan Imran Khan Ko Khud Paish Hona Tha Wahein Justice Tariq Raheem Sheikh Ke Samnay Apnay Dastakhat Ki Tasdeeq Ke Liye Bhi Paishi Thi. Samaat Muqarrar Ki Gayi Thi Peer Dopehr 2 Bajay. Is Se Qabal 2 Samaatain Ho Chuki Theen.
Sabiq Wazeer e Azam Ko Paish Honay Ke Liye Baar Baar Tareekh Aur Waqt Bhi Agay Karna Para. Yahan Tak Ke Justice Tariq Saleem Sheikh Ne Aik Samaat Ke Dauran Yeh Remarks Bhi Diye Ke Ambulance Pa Ya Stretcher Par Jaisay Bhi Ho Imran Khan Khud Paish Hon. Woh Siyasi Mulaqaten Karte Phirtay Hain Lekin Adalat Nahi Aatay. In Saaray Remarks Aur Muamlay Ka Talluq Bhai Ki Entry Aur Mahol Se Hi Tha.
Imran Khan Ki Jaan Ko Khatra
Peer Ko Imran Khan Ki Legal Team Ne Darkhwast Di Ke Imran Khan Ki Jaan Ko Khatra Hai Lehaza Un Ki Gaari Ko Kamrah e Adalat Ke Samnay Tak Anay Diya Jaye. Darkhwast Mustard Kar Di Gayi. Phir Police Ki Bhaari Nafri Ke Sath Lohay Ki Jalyon Ki Hifazati Baar Banai Gayi Jis Ka Wukla Ki Parking Se Justice Tariq Saleem Sheikh Ke Kamrah e Adalat Tak Taqreeban 300 Meter Ka Faasla Bantaa Hai. 2 Bujey Samaat Shuru Hui, Imran Khan Paish Nah Huay. Shaam 5 Bajay Tak Samaat Multawi Kar Di Gayi. Jis Ke Baad Mahol Banna Shuru Hua.
Doosri Janib Zaman Park Se Lahore High Court Tak Tehreek Insaaf Ke Tarane Gunjnay Shuru Ho Gaye. Jab Maloom Hua Ke Bhai Adalaton Ka Ehtram Karte Hain Aur Adalat Uboori Zamanat Ke Liye Paishi Ke Liye Ja Rahay Hain. High Court Ke Tamam Darwazay Band Kar Diye Gaye. Tab Tak PTI Ke Karkun High Court Ke Har Konay Mein Pahonch Chuke Thay. Kuch Ne To Wukla Wala Libaas Pehna Hua Tha.
Yahan Se Forward Karkay Justice Baqar Najafi Ke Kamrah e Adalat Ka Mahol Aap Ko Batatay Hain. 4 Bujey Ke Baad Imran Khan Qaafley Ki Soorat Zaman Park Se Rawana Huay. Siyasat Aur Sahaafat Ka Aik Adna Talib-e-Ilm Bhi Jaanta Yai Ke Itnay Rush Mein Waqt Par Khan Nahi Pohnch Payen Ge. Magar Mahol Bhi Tou Banana Tha. Aisay Mein Brigadier Roy Ejaaz Shah Kamrah e Adalat Mein Pohanche. Phir 5 Bajay Ke Baad Shah Mahmood Qureshi, Asad Umar Aur Shibli Faraz Pohanche. Lekin Bhai Nah Pohnche.
Imran Khan Qaflay Ke Saath Pohnchay
Imran Khan Ke Wukla Ne Adalati Amlay Ko Darkhwast Ki Ke Rush Ziyada Hai Aur Imran Khan Rastay Mein Kuch Takheer Ho Gi. 5 Se 6 Baj Gaye. Farakh Habib Ki Bhi Kamrah e Adalat Entry Hui. Is Dauran Hamari PTI Ke Aik Ahem Rehnuma Se Baat Hui Jis Ne Kaha" Kisi Ki Wicket Par Nahi Khelna Chahiye" Asal Mein Woh Samjhaana Chaah Rahay Thay Ke Har Shakhs Ki Apni Aik Alag Rajdhani Hoti Hai. Judges Bhi Un Mein Se Aik Hain. Phir Kisi Ne Aakar Bataya Chairman Tehreek e Insaaf Imran Khan Ki Gaari GPO Chowk Walay Gate Se Adalat Ke Ahatay Mein Daakhil Ho Chuki Hai.
Waqt Guzar Raha Tha. Kamrah e Adalat Mein Tehreek Insaaf Ke Rehnumao Ne Mahol Banaya. Imran Khan Ke Wukla Khwaja Raheem Aldeen Aur Azhar Seddiq Ko Shah Mahmood Qureshi Ne Kaha Ke Imran Khan Aa Chukay Hain. Judges Sahib Se Darkhwast Karkay Woh Gaari Mein Hi Tasdeeq Kar Len Security Ka Issue Hai, Police Taawun Nahi Kar Sakti Aisay Mein Imran Khan Nahi Asaktay. Un Ki Taang Zakhmi Hai Koi Dhaka Lag Gaya To Nuqsaan Hoga. Muaziz Judge Ne Zabani Darkhwast Mustard Kar Di.
6 Baj Kar 50 Minute Yani Aik Ghanta 50 Minute Ki Takheer Se Samaat Shuru Hui. Justice Ali Baqar Najafi Jo 2 Rukni Bench Ke Sarbarah Thay Kamrah e Adalat Mein Paish Huay. Unhon Ne Istafsaar Kya Ke Petitioner Kahan Hain? Wukla Ne Kaha Woh Gaari Mein Baithy Hain Security Ki Wajah Se Nahi Aa Rahay. Kher SP Ko Bulaya Gaya. Unko 10 Minute Ka Waqt Diya Gaya Security Clear Karanay Ka.
Aisay Mein Judge Ke Samnay Khwaja Raheem ud Deen Ne Aik Jazbati Taqreer Kar Di Imran Khan Ke Haq Mein Jis Mein Dalail Kam Aur Jazbaat Ziyada Thay. Ali Baqar Najafi Ne Remarks Diye Ke Imran Khan Ko Adalat Ke Samnay Paish Tou Hona Paray Ga. Unhon Ne Phir 15 Minute Ka Waqt Diya Aur Samaat Multawi Kar Di. Phir Kya Tha Wukla Bahar Gaye, Police Bahar Maujood Thi.
Achanak Naaron Ke Sath Bhai Yani Imran Khan Ki Kamrah e Adalat Mein Entry Hui. Chand Minton Baad Ali Baqar Najafi Aaye Tou Imran Khan Kharay Hogaye Aur Bolay Ke Un Ki Jamaat Ka Naam Hi Tehreek e Insaaf Hai Aur Woh Qanoon Ka Ehtram Karte Hain. Justice Baqar Najafi Ne Sarahtay Huay Unhein 3 March Tak Interim Bail Day Di. Adhay Ghantay Tak Is Ke Baad Bhai Kamrah e Adalat Mein Baithtay Rahay. Police Aur Adalti Amla Selfian Banata Raha. Phir Bhai Naaron Ki Goonj Mein Justice Tariq Saleem Sheikh Ki Adalat Mein Chal Kar Gaye Aur Wahan Se Bhi Relief Mil Gaya.