Supreme Court Of Pakistan Ke Justice Sayyed Mazahar Ali Naqvi Ke Khilaaf Code Of Conduct Ki Mubayyana Khilaaf Warzi Ke Ilzamaat Ke Tehat Reference Supreme Judicial Council Mein Daair Kar Diya Gaya Hay.

Darkhwast Guzaar Mian Dawood Advocate Ki Janib Se Daair Karda Reference Mein Justice Mazahar Naqvi Par Mubayyana Misconduct, Bad Unwani, Tax Tafseelaat Mein Rad o badal, Aqarba Parwari Aur Aik Siyasi Jamaat Ke Liye Naram Gosha Rakhnay Jaisay Ilzamaat Lagaye Gaye Hain.

Yeh Shikayat Aaeen Pakistan Ke Article 209 (5) Ke Tehat Chairman Supreme Judicial Council (Chief Justice Of Pakistan) Ke Office Mein File Ki Gayi Hay.

Secretary Supreme Judicial Council Ko Bhejay Gaye Reference Mein Darkhwast Ki Gayi Hay Ke Supreme Judicial Council Justice Mazahar Akbar Naqvi Aur Un Ke Ahal-e-Khanah Ke Asason Ki Tehqiqaat Keray.

Justice Mazahar Per Kya Kya Ilzam Lagaye Gaye Hain?

Reference Mein Muaqqif Ikhtiyar Kya Gaya Hay Ke Justice Mazahar Akbar Naqvi Ke Asasay 3 Arab Rupay Se Zayed Maliyat Ke Hain. Mian Dawood Ne Justice Mazahar Naqvi Ki Mukhtalif Shehron Mein Mubayyana Jayidadon Ki Tafsilaat Bhi Di Hain.

Is Reference Mein Justice Mazahar Naqvi Ki Alleged Audios Kay Transcript Bhi Diye Gaye Hain. Aik Audio Ke Mutaliq Daawa Kya Gaya Tha Ke Us Mein Sabiq Wazeer e Aala Punjab Parvez Ellahi Aur Justice Mazahar Naqvi Guftagu Kar Rahay Hain.

Justice Mazahar Naqvi
Justice Mazahar Naqvi Aik Taqreeb Se Khitab Kartay Huay

Ye Audio Samnay Anay Ke Baad Pakistan Muslim League (N) Ne Justice Mazahar Naqvi Ki Ghair Janibdari Par Sawalaat Uthaye Thay. Wazeer e Dakhla Rana Sanaullah Ne Kaha Tha Ke PMLN Ke Wukla Supreme Court Se Darkhwast Karen Ge Ke Un Ki Party Se Mutaliqa Cases Sunney Walay Benchon Mein Justice Mazahar Ali Ko Shaamil Nah Kya Jaye.

Mubayyana Audio Leak Samnay Aanay Ke Baad Pakistan Bar Council Ne Bhi Kaha Tha Ke Woh Justice Mazahar Ke Khilaaf Supreme Judicial Council Mein Reference Daair Karen Ge. Pakistan Bar Council Ne Justice Mazahar Naqvi Ko Resign Dainay Ke Liye Aik Haftay Ki Mohlat Di Hay.

Mian Dawood Advocate Ne Is Ki Mukhalfat Karte Huay Kaha Tha Ke Justice Mazahar Naqvi Ko Istefay Ka Mehfooz Rastaa Dena Pakistan Par Azeem Zulm Hoga. Audio Scandal Ki Shafaaf Inquiry Karani Chahiye Aur Haqaiq Saabit Honay Par Unhein Hathkaryan Laga Kar Girftar Karna Chahiye. Un Ke Aur Un Ki Family Ke Asasay Zabt Karkay Yatimon Mein Taqseem Karne Chahiyen.

Reference Daair Karne Walay Mian Dawood Kaun Hain?

Mian Dawood Advocate Lahore High Court Ke Wakeel Hain. Wo Imran Khan Par Qatilana Hamlay Ke Mulzim Ki Bhi Wakalat Kar Rahay Hain. PTI Walay Unhein Noon League Ka Wakeel Qarar Detay Hain. Pichlay Mahinay Raftar Ko Interview Detay Huay Unhon Ne Is Ilzaam Ko Mustard Kya Tha. Un Ka Kehna Tha Ke Chairman PTI Par Qatilana Hamla Nahi Hua Balkay Wo Planted Hay, Yani PTI Ne Drama Rachaya Hay.

Mian Dawood Advocate Social Media Par Bhi Khasay Active Hain. Wo Fauj Ke Kayi Sabiq Aur Haazir Service Afsaraan Aur Supreme Court Ke Maujooda Cheif Justice Samait Kai Sabiq Justice Sahiban Ko Mulk Ke Patri Se Utrnay Ka Zimmedar Qarar Detay Hain.

Waisay Tou Mian Dawood Ki Ziyada Tar Tweets PTI Aur Imran Khan Ke Khilaaf Hoti Hain Lekin Kabhi Kabhar Woh Noon League Par Tanqeed Karte Bhi Nazar Atay Hain.

شیئر

جواب لکھیں