Chairman PTI Imran Khan Ne Mulk Ki Tamam Assemblion Se Istefay Dainay, Punjab Aur KP Assemblyan Tehleel Karne Ka Ailan Kardiya.

Sabiq Wazieer-e-Azam Imran Khan Ne Kaha Ke Hum Ne Faisla Kya Hai Ke Saari Assemblion Se Nikalny Lagay Hain.

Rawalpindi Mein Long March Ke Shurka Se Khitaab Karte Huye Imran Khan Ne Kaha Ke Hum Bajaye Apne Mulk Mein Tor Phor Karen. Is Se Behtar Hai Ke Hum Is Corrupt Nizaam Se Bahar Nikleen Aur Is System Ka Hissa Na Banen. Jidhar Ye Chor Beth Kar Har Roz Apne Arbon Rupay Ke Case Muaf Karwa Rahay Hain.

Un Ka Kehna Tha Ke Mein Ne Wazeer-e-Aala Se Baat Ki Hai, Parliamentary Party Se Bhi Mushawarat Kar Raha Hon. Aanay Walay Dinon Mein Ailan Karen Ge Ke Kis Din Hum Saari Assemblion Se Bahar Nikal Rahay Hain.

Dharna Nahi Den Gay, Imran Khan

Unhon Ne Mazeed Kaha Ke Meri Poori Koshish Rahi Ke Mulk Mein Kisi Qisam Ka Inteshaar Peda Na Karoon. Agar Tor Phor Shuru Hui To Sab Ke Haath Se Game Nikal Jaye Ga, Faisla Kya Hai Ke Dharnay Ke Liye Islamabad Nahi Ja Rahay.

Imran Khan Ne Kaha Ke Apne Daur-e-Hukoomat Mein Sirf Aik Jagah Fail Hua Ke Taqatwar Ko Qanoon Ke Neechay Nahi La Saka. Is Ki Wajah Ye Thi Ke NAB Mere Control Mein Nahi Tha. Woh Establishment Ke Neechay Tha. NAB Walay Mujhe Kehte Thay Ke Saaray Case Tayyar Hain Lekin Hukum Nahi Araha. Jin Ke Paas Control Tha Wo Hukum Nahi Day Rahay Thay. Wo In Choron Ko Jailon Mein Daalnay Ke Bajaye In Se Deal Kar Rahay Thay.

Imran Khan Speech In PTI Long March

Sabiq Wazeer-e-Azam Ka Kehna Tha Ke Mujhe Baar Baar Jawab Aata Tha Ke Imran Sahib, Aap Economy Per Tawajah Den. Ehatasab Ko Bhool Jayen, Mujhe Kayi Baar Yeh Kaha Gaya Ke In Ko NRO Day Den, NAB Ke Qanoon Badal Den. Mujhe Zaleel Karne Ki Bohat Koshish Ki Gayi, Meri Kirdaar Kushi Ki Gayi Kyunkay Mein Inhen Chor Kehta Tha.

PTI Ke Chairman Imran Khan Ne Kaha Ke Mujhe Afsos Se Kehna Parta Hai Ke Hamaray Idaray Kyun Purani Ghaltion Se Nahi Seekhtay?

Election Ke Siwa Koi Rasta Nahi, Chairman PTI

Long March Ke Shrka Se Khitaab Karte Hue Un Ka Kehna Tha Ke Aik Mulk Aur Insaan Aur Idaara Usi Waqt Taraqqi Karta Hai, Jab Apni Ghaltion Se Sekhe.

Imran Khan Ne Kaha Ke Mein Aaj Yahan Is Liye Pressure Daalnay Aaya Tha Ke Aap Ke Paas Election Karwanay Ke Ilawa Koi Rasta Nahi Hai. Mulk Agar Default Ki Taraf Chala Gaya Tou Khatraat Barh Jayen Ge. Jab Aap Ki Muashi Security Girti Hai Tou National Security Gir Jati Hai. Jab Soviet Union Ki Muashi Security Giri To Soviet Union Toot Gaya. Tou Hum To Aaj Usi Taraf Ja Rahay Hain.

Wazirabad Main 1 Nahi 3 Shooter Thay, Imran Khan

Imran Khan Ne Wazirabad Hamlay Ke Hawalay Se Kaha Ke Wahan Par 3 Bandooq Walay Thay. Aik Ne Hamaray Oopar Fire Kiye, Aik Ne Samnay Se Golian Chalayein Jo Hamaray Oopar Se Nikal Gayeen, Aur Aik Ne Shooter Ko Qatal Karna Liye Goli Chalai. Jis Tarha Liauqat Ali Khan Ko Jis Ne Qatal Kya Tha us Ko Wahein Mara Gaya Taakay Wo Bata Hi Na Sakaya. Lekin Rastay Mein Muazzam Aa Gaya Aur Shaheed Ho Gaya.

Unhon Ne Mazeed Kaha Ke Mein Ne Mout Ko Bohat Qareeb Se Dekha Hai. Agar Mein Girta Nahi To Golion Ka Dosra Round Mujhe Lag Jata, Jab Mein Gira Usi Waqt Mujhe Pata Chal Gaya Ke Allah Ne Mujhe Bacha Liya. Container Par 12 Logon Ko Golian Lageen Lekin Shukr Hay Sab Bach Gaye.

Share.

Leave A Reply