Qaumi Salamti Say Juray Muamlaat Ka Fori Notice Lain, Imran Khan Ka Sadar Arif Alvi Ko Khat.
Chairman PTI Nay Sadar-e-Mumlikat Arif Alvi Ko Aham Khat Likha Hay.
Qatal Ka Mansuba 3 Logon Nay Banaya, Imran Khan
Unhon Nay Khat Main Kaha Hay Kay Qaum Meri Haqeeqi Pukar Par Uth Khari Hui Hay. Party Ko Jhootay Ilzamat, Harasani, Bila Jawaz Griraftarion Aur Hirsat Main Tashadud Jaisay Hathkandon Ka Samna Hay.
Unhon Nay Daawa Kya Kay Wazir-e-Azam Shehbaz Sharif, Wazir-e-Dakhla Rana Sanaullah Aur Aala Fauji Afsar Ki Janib Se Mujhe Qatal Karne Ka Mansooba Mere Ilm Main Laya Gaya. Guzishta Haftay Hamaray Haqeeqi Azadi March Ke Dauran Is Mansoobay Par Amal Ki Koshish Ki Gayi. Allah Taala Nay Mujhe Bcha liya Aur Mere Qatal Ki Koshish Nakaam Rahi.
Zimmedaron Kay Khilaf Karrawai Ki Jaye
Sarbarah-e-Riasat Aur Supreme Commander Kay Tor Par Aap Say Durkhawast Hay Kay Qaumi Salamti Say Juray In Muamlaat Ka Fori Notice Lain. Apni Qayadat Main Zimadaron Ko Samany Lanay Kaliye Tahqeeqat Aur Un Kay Muhasbay Ka Ehtimam Karain.
Unhon Nay Likha Hay Kay Wazir-e-Azam Kay Tor Par Unki, COAS Aur DG ISI Kay Sath Guftgu Media Ko Jari Kar Kay Official Secret Act Ki Khalaf Warzi KI Gai Hay. Mahfooz Guftagu Par Kis Nay Naqab Lagayi? Ye Qaumi Salamti Ka Aala Tareen Muamla Hay.
Imran Khan Nay Arif Alvi Say Mutalba Kiya Kay Afwaj-e-Pakistan Kay Supreme Commander Kay Tor Par Aap ISPR Ki Hudood Kay Taiyun Ka Amal Shuru Karain.
Unhon Nay Kaha Kay Aap Sarbarah-e-Mumlikat Hain Lehaza Aap Ko Jamhuriat Aur Aaeen Ka Tahaffuz Karna Chahiye. Koi Bhi Fard Ya Idaara Mulk Kay Qanoon Say Balatar Nahi.
Imran Khan Ka Khat Main Mazeed Kehna Tha Kay Riyasti Idaron Kay Andar Kuch Shrpasand Anasir Shehrion Say Baray Paimanay Par Budsulooki Kar Rahay Hain. Shehrion Ko Hirasati Tashadud Ka Nishana Aur Ighwa Kiya Jata Hay. Main Aap Se Darkhwast Karta Hun Kay Taaqat Kay Ghalat Istemaal Aur Hamaray Qawaneen Aur Aaeen Ki Khilaaf Warzion Ko Roknay Ke Liye Bhi Kaam Karen.