World Cup Hamesha Captains Kay Liay Bhaari Hota Hay. Trophy Aik Ko Milti Hay, Baqi Sab Ko To Apni Kaptaani Kay Laalay Parr Jatay Hain. Laikin Ye T20 World Cup To Captains Kay Liay Khaas Taur Par Mushkil Laya Hay. Pooray Tournament Main Ab Tak 31 Matches Ho Chukay Hain, Aur 12 Main Say Sirf 4 Captains Nay Koi 50+ Ki Innings Kheli Hay.
Australia Kay Aaron Finch Nay Aaj Ireland Kay Khilaf 44 Balls Par 63 Runs Banaey. 42 Runs Ki Jeet Par Unhain Man Of The Match Ka Award Bhi Mila. Laikin Is Say Zyada Khushi Ki Baat Ki Rahi Kay Finch Ka Balla Chal Parra. Kufr Toota Khuda Khuda Karkay!
Finch Nay Is Say Pehlay Sri Lanka Kay Khilaf 42 Balls Par 31 Runs Ki Disappointing Innings Kheli Thi. Jis Par Unhain Sakht Criticism Ka Nishana Banaya Gaya Tha. New Zealand Kay Against Super 12 Kay Pehlay Match Main Bhi Wo Sirf 13 Runs Par Out Ho Gaey Thay.
Babar-e-Azam Ki Azmat Khatam?
Sab Say Pehlay Apnay Babar-E-Azam Hi Ko Lay Lain. Lagta Hay Australia Ja Kar Batting Karna Bhool Gaey Hain. India Kay Khilaf Most Important Match Main 0, Aur Phir Zimbabwe Aur Netherlands Jaisi Kamzor Teams Kay Khilaf Bhi Sirf 4,4 Runs Ki Innings. Ab To Babar Par Aik Barri Innings Udhar Ho Gai Hay. Laikin Lagta Hay Buhat Dair Ho Chuki Hay. Pakistan Ki World Cup Campaign Taqreeban Khatam Hay.
Aaron Finch Say Hut Kar Dekhain To Sirf India Kay Rohit Sharma, Ireland Kay Andy Balbirnie Aur Zimbabwe Kay Craig Erwine Hi Koi Fifty Bana Sakay Hain. Rohit Ki Fifty To Khair Netherlands Kay Khilaf Thi. Laikin Balbirnie Nay England Kay Against 47 Balls 62 Runs Ki Zabardast Innings Kheli Thi, Jis Par Unhain Man Of The Match Bhi Mila Tha.
Baqi Sab Captains Haal Say Bay Haal Hain. Khud Dekh Lain:
T20 World Cup 2022 Aur Captains
| M | R | HS | SR | |
|---|---|---|---|---|
 Andy Balbirnie | 6 | 123 | 62 | 125.51 |
 Aaron Finch | 3 | 107 | 63 | 110.30 |
 Craig Ervine | 5 | 96 | 58 | 97.95 |
 Dasun Shanaka | 6 | 75 | 35 | 113.63 |
 Scott Edwards | 6 | 74 | 21 | 81.31 |
 Rohit Sharma | 3 | 72 | 53 | 120.00 |
 Shakib al Hasan | 3 | 31 | 23 | 93.93 |
 Kane Williamson | 2 | 31 | 23 | 86.11 |
 Jos Buttler | 2 | 18 | 18 | 90.00 |
 Temba Bavuma | 3 | 14 | 10 | 60.86 |
 Babar Azam | 3 | 8 | 4 | 53.33 |
 Mohammad Nabi | 1 | 3 | 3 | 60.00 |