Pak-Zimbabwe ‘Rivalry’ Aur ‘Pak Bean’ Controversy Kia Hay? Ye Batanay Ki Zarurat Nahi Kyunke Sab Hi Jantay Hain. Balke Ab To ‘Gal Wadh Gai Ae Mukhtaria!’ Aur Yahan Tak Puhanch Gai Hay Ke Donon Mulkon Ki Governments Involve Ho Gai Hain.
Perth Main Pakistan Kay Khilaf Zimbabwe Ki Tareekhi Kamyabi Par Zimbabwe Kay President Emmerson Mnangagwa Nay Tweet Kia, Aur Team Ko Mubarakbad Di. Laikin Sath Hi Pakistan Say Kaha Ke Next Time Real Mr. Bean Bhejna!
Abhi Is Tweet Ka Maza Hi Kam Nahi Hua Tha Ke Kuchh Dair Baad Wazir-e-Azam Pakistan Shehbaz Sharif Bhi Maidan Main Aa Gaey.
Unhon Nay Zimbabwean President Ko Jawab Detay Huay Kaha Ke Hamaray Paas Asli Mr. Bean To Nahi Lekin Asal Cricket Spirit Zaroor Hay. Hum Bounce Back Kartay Hain.
Shehbaz Sharif Nay Zimbabwe Kay President Ko Mubarakbaad Bhi Di Aur Kaha Ke Aap Ki Team Buhat Achhi Kheli.
Ab Dekhna Ye Hay Ke Pakistan Cricket Team Shehbaz Sharif Kay Claims Par Poora Utarti Hay Ya Mr. Bean Ka Bhoot Unhain World Cup Say Hi Bahar Kar Day Ga.