Pakistan Super League 2023 Mein Aik Aur Super Din, Jis Mein Hua Aik Super Muqabla, Aur KK v PZ Game Of Rivalries Mein Peshawar Zalmi Jeeta Sirf 2 Runs Say.

Mohammad Amir Babar Azam Ka Kuch Nahi Bigaar Sakay, ‘Kaptaan’ Nay 68 Runs Ki Innings Kheli, Jabke Din Ki Sab Say Bari 92 Runs Ki Innings Kheli Tom Kohler-Cadmore Nay. Phir Karachi Kings Ki Innings Mein Shoaib Malik Aur Imad Wasim Ki Hundred Partnership Hui, Jo Jitwa To Nahi Saki Laikin Match Ko Zaroor Phansa Gai.

Pakistan Super League 2023

Karachi Kings vs Peshawar Zalmi

14 February 2023

National Stadium, Karachi, Pakistan

Result: Peshawar 2 Runs Say Jeet Gaya

🟨 PZ199-5
Tom Kohler-Cadmore92 (50)
Babar Azam68 (46)
KK BowlingOMRW
Mir Hamza20131
Ben Cutting30291
🟦 KK (T:200)197-5
Imad Wasim80* (47)
Shoaib Malik52 (34)
PZ BowlingOMRW
James Neesham40262
Wahab Riaz40342

Babar 1:0 Amir

Babar-Amir Showdown Ka To Sab Ko Intezar Tha. Amir To Aaj Angry Young Man Banay Nazar Aaey. Match Ki First Ball Par Mohammad Haris Say Choka Kha Kar Un Ka Para Aik Dam Charh Gaya. Phir Babar Azam Say Trademark Cover Drive Par Four Para To Amir Aisay Derail Huay Ke Phir Aik Wicket Bhi Nahi Lay Sakay.

Amir Ko Apnay 4 Overs Mein 42 Runs Paray. Babar Azam Nay Amir Ki 5 Balls Face Keen Aur 2 Fours Kay Sath Sabit Kia Ke Un Ka Game Up Hay. Khair, Donon Teams Ka Abhi At Least Aik Aur Muqabla Hoga, Dekhtay Hain Amir Kaisay Respond Kartay Hain.

King+Prince

Innings Kay 2nd Over Mein 2 Wickets Girnay Kay Baad Peshawar Ki Innings Phans Sakti Thi, Laikin Yahan Babar Nay Tom Kohler-Cadmore Kay Sath Mil Kar Kamal Kardia. Especially TKC Nay Jis Tarah Aik Hi Over Mein Match Ka Momentum Shift Kia, Wo Dekhnay Wala Tha. Unhon Nay Imad Wasim Ko Aik Hi Over Mein 3 Consecutive Sixes Aur Phir Babar Nay Bhi 4 Laga Kar Zakhmon Par Namak Chhirak Dia. 23 Runs Loot Kar Donon Nay Zalmi Innings Ki Tone Set Kardi.

Babar Aur TKC Nay 81 Balls Par 139 Runs Ki Partnership Ki, Jis Mein TKC Sirf 50 Balls Par 92 Runs Banaey Jabke Babar 46 Balls Par 68 Runs Bana Kar Out Huay.

Last 5 Overs Mein 44 Runs Bana Kar Peshawar 199 Tak Puhanch Gaya, Jo Aik Acha Total Tha. Laikin Zalmi Bowling Lineup Dekhain To Kya Ye Kafi Thay? Ye Aik Bara Sawal Tha.

Worst Possible Start

200 Runs Ka Target Haasil Karnay Kay Liay Karachi Kings Nay Worst Possible Start Lia. Peshawar Ki Kamzor Batting Line Ko Shuru Mein Hi Exploit Kia Ja Sakta Tha, Laikin Jo Ye Kaam Sab Say Acha Kar Sakta Tha, Wohi 0 Par Out Ho Gaya.

Sharjeel Khan Golden Duck Kay Sath Wapis Aaey. Aur Phir Powerplay Mein Khatam Honay Kay Sath Hi Sirf 46 Runs Par 4th Wicket Gir Gai. Sharjeel Kay Baad Matthew Wade Bhi Aur Haidar Ali Sab Gaey.

Aik Aur 100+ Partnership

Yahan Par Shoaib Malik Aur Imad Wasim Nay Wo Partnership Ki Jis Nay Match Ko Buhat Dilchasp Bana Dia. Donon Experienced Players Nay Peshawar Zalmi Ki Bowling Line Ko Udhair Kar Rakh Dia. 74 Balls Par 131 Runs Ki Partnership To Samjhain Match Nikaal Gai Thi.

Zalmi Bowlers Aur Fielder Kay Haath Pair Phool Gaey. Fielders Catch Chhor Rahay Thay, Jab Pakar Rahay To Thay To No-Ball Ho Jati. 18th Over Mein To KK Nay 18 Runs Loot Liay, 1 Six, 2 Chokay Aur Phir No-Ball Bhi. Baqi 2 Overs Mein 24 Runs Bachay Aur Jis Tarah Shoaib-Imad Batting Chal Rahi Thi, Kuch Bhi Ho Sakta Tha.

KK v PZ Final Moments

Aur Yahan Wahab Riaz Nay Shoaib Malik Ko Out Kardia. Eventful 19th Over Mein Pehlay Ben Cutting Ka Aasan Catch Chhoota, Phir Jab Haris Nay Zabardast Catch Lay Lia To Wo No-Ball Ho Gai. Yahan Tak Ke Last Over Mein 16 Runs Ka Target Reh Gaya Aur Ball Pakrai Gai Khurram Shahzad Ko. Jinhon Nay Siwaey Aik No-Ball Kay Aur Koi Ghalti Nahi Ki.

Imad Aur Cutting Innings Ko Finishing Touch Nahi Day Sakay. Aur Last Ball Par Six, Aik Full House Aur Stadium Mein Karachi Kay Haq Mein Lagnay Walay Zabardast Naaray Bhi Kings Ko Jitwa Nahi Sakay.

شیئر

جواب لکھیں