Main, Aap Balke Sub Intezar Kar Rahay Thay 2 Players Kay Aamnay Samnay Aanay Ka. Har Rivalry Ko Maidan Mein Janam Laina Chahiye Laikin Ye “Dushmani” Ground Say Bahar Paida Hui Hay. Karachi Kings Aur Peshawar Zalmi Kay Match Mein Mohamad Amir Babar Azam Ko Clean Bowled Nahi Kar Sakay, Balkay Babar Nay Apni Dominance Sabit Kar Di. Unhon Nay Amir Ki 5 Balls Ko Face Kia Aur 2 Fours Bhi Lagaey. Laikin Season Mein Abhi At Least 1 Aur Samna To Hoga.
Laikin, PSL Sirf Amir-Babar Taakray Ka Naam Nahi. Aur Bhi Kai Players Hain Jin Ka Showdown Sub Dekhna Chahtay Hain. Jaisa Ke Wahab Riaz Aur Iftikhar Ahmed Ka.
PSL 8 Kay Exhibition Match Mein ‘Ifti Chacha’ Nay Wahab Riaz Ko Aik Over Mein 6 Sixes Laga Diay Thay. Peshawar Zalmi Aur Quetta Gladiators Kay Matches To Season 1 Say Aaj Tak Un Kay Extra Ordinary Hotay Hain. PSL History Mein 1 Run Say Jeetay Gaey Pehlay 5 Matches Quetta Kay Hi Thay Aur Un Mein Say 3 Aisay Thay Jo Peshawar Kay Khilaf Khelay Gaey.
Smallest Victories in PSL History
| Winner | vs | Margin | Target | Ground | Season |
|---|---|---|---|---|---|
| Quetta | Peshawar | 1 run | 134 | Dubai | 2016 |
| Islamabad | Quetta | 1 run | 166 | Dubai | 2017 |
| Quetta | Peshawar | 1 run | 201 | Sharjah | 2017 |
| Peshawar | Quetta | 1 run | 158 | Lahore | 2018 |
| Karachi | Quetta | 1 run | 191 | Karachi | 2019 |
| Islamabad | Karachi | 1 run | 192 | Lahore | 2022 |
| Lahore | Multan | 1 run | 176 | Multan | 2023 |
Ab Is Saal Wahab Riaz Aur Iftikhar Ahmed Ki Rivalry Ka Tarka Bhi Lag Gaya Hay, Yani Maza To Ab Aaey Ga.
Iftikhar Ka Aik Aur "Purana Yaarana" Hay Mohammad Amir Say. Yani Donon Player Aik Nahi 2 Clashes Rakhtay Hain. In Ka ‘Phadda’ Hua PSL 6 Mein, Jab Iftikhar Islamabad United Ki Taraf Say Khel Rahay Thay. Mohammad Amir Aik Four Khanay Kay Baad Sledging Par Utar Aaey. Tab ‘Ifti Chacha’ Bhateejay Ko Kahan Bardasht Kartay? Aisay Jawab Diay Ke Maidan Garam Kardia.
Phir Is Saal Karachi-Lahore Rivalry Mein Bhi Aik Naya Rung Aaya Hay. Matthew Wade Ye Season Karachi Kings Say Khel Rahay Hain, Wohi Wade Jinhon Nay 2021 T20 World Cup Semi Final Mein Shaheen Afridi Ko 3 Sixes Laga Kar Pakistan Ka World Cup Dream Torr Dia Tha. Wade Pakistanion Kay Liay Tab Say Villain Ban Gaey, Waisay Hi Jaisay 2010 T20 World Cup Semi Final Mein Michael Hussey Banay Thay. Tab Nishana Thay Saeed Ajmal, 11 Saal Baad Hadaf Par Aaey Shaheen Afridi.
Waisay PSL 8 Mein Multan Sultan Aur Islamabad United Ka Match Bhi Dekhnay Wala Hoga. Especially David Miller Aur Faheem Ashraf Ka Muqabla. 2021 Mein Pakistan South Africa 3rd T20i Mein Miller Nay Faheem Ko Aik Over Mein 4 Sixes Lagaey Thay. Pakistan Match Aur Series To Jeet Gaya Tha Laikin Ye Last Over Sixes Buhat Say Logon Ko Yaad Hay. 19th February Ko Multan Mein Hamain Donon Ka Taakra Dubara Dekhnay Ko Milay Ga. To Dekhtay Hain Ab PSL Mein Kaun Hero Banay Ga Aur Kaun Villain?