Highest Totals In PSL History

Kis Nay Socha Tha Ke First 5 Overs Mein Sirf 27 Runs Bananay Wali Team Aakhir Mein Runs Ka Pahaar Khara Kar Day Gi? Lahore Qalandars Nay Peshawar Zalmi Kay Against Aisa Kar Dikhaya Hay. LQ v PZ Match Kay Last 5 Overs Mein Lahore Nay 82 Runs Bana Kar Apna Total 241 Runs Tak Puhancha Dia, Jis Mein Fakhar Zaman Ki Toofani Batting, Abdullah Shafiq Ki Yadgaar Innings Aur Aakhir Mein Sam Billings Kay Zabardast Shots Khoob Kaam Aaey.

Fakhar Zaman Unlucky Rahay Aur Apni Hundred Na Bana Sakay. Wo 45 Balls Par 10 Sixes Aur 3 Fours Kay Sath 96 Runs Bana Kar Out Huay. Abdullah Shafiq Nay 41 Balls Par 75 Aur Billings Nay 23 Balls Par Not Out 47 Runs Score Kiay Aur Lahore Ko Puhancha Dia 241 Runs Par. Ye Abdullah Aur Billings Ki PSL Season 8 Mein Pehli Innings Theen, Jo Buhat Hi Impactful Sabit Hueen.

Sawal Ye Hay Ke Kya Ye PSL History Ka Sub Say Bara Total Hay? Bilkul Nahi! Ye To 2^nd Number Par Bhi Nahi.

Highest Total In PSL History Ka Record Hay Islamabad United Kay Paas. Us Nay PSL 2021 Mein Peshawar Zalmi Kay Bowlers Ko Hi Dhoya Tha, Aisa Ke 247 Runs Bana Dalay. Is Mein Lion’s Share Tha Usman Khawaja Ki Hundred Ka. Unhon Nay 56 Balls Par 13 Fours Aur 3 Sixes Ki Madad Say Not Out 105 Runs Banaey. Colin Munro Kay 28 Balls 48, Brandon King Kay 22 Balls Par 46 Aur Asif Ali Kay Sirf 14 Balls Par 43 Runs Nay Bhi Apna Role Play Kia Aur Islamabad Ko Puhanchaya Is Unbelievable Total Par. Mazay Ki Baat Ye Hay Ke Jawab Mein Peshawar Nay Bhi 232 Runs Bana Diay Thay. Jeet To Nahi Saka Laikin Runs Ka Anbaar Zarur Lag Gaey.

Un Kay Baad Naam Aata Hay Multan Sultans Ka. Last Year Yani 2022 Mein Quetta Gladiators Kay Against Unhon Nay 245 Runs Bana Dalay Thay. Wo Bhi Lahore Kay Isi Gaddafi Stadium Par. Is Mein Sab Say Share To Mohammad Rizwan Kay 83 Runs Ka Tha Laikin Asal Impactful Innings Thi Rile Rossouw Ki Sirf 26 Balls Par 71 Runs Ki. Is Innings Mein Unhon Nay 4 Sixes Aur 9 Fours Lagaey Thay. Runs Ki Ganga Mein Shan Masood Bhi 38 Balls Par 57 Runs Bana Gaey. Khair, Multan Nay Sirf 3 Wickets Par 245 Runs Banaey Aur PSL History Ka 2^nd Biggest Total Khara Kar Dia.

Ab Hay Lahore Qalandars Ki 241 Runs Ki Ye Performance. Waisay Is Say Pehlay PSL Mein Lahore Ka Best Total Tha 209 Runs, Jo Us Nay March 2020 Mein Isi Gaddafi Stadium Par Quetta Gladiators Kay Khilaf Banaya Tha. Is Match Mein Ben Dunk Nay Aik Unforgettable Innings Kheli Thi, Jis Mein Unhon Nay Sirf 43 Balls Par 10 Sixes Aur 3 Fours Lagaey Thay Aur 93 Runs Bana Kar Out Huay. Us Din Hamain Boom Boom Bubble Ki Asal Taqat Ka Andaza Hua Tha 😁

Highest Totals In PSL History