پاکستان سپر لیگ اپنے اختتام کو پہنچی اور اب ایک مرتبہ پھر انٹرنیشنل کرکٹ کی تیاریاں شروع ہو گئی ہیں۔ جہاں رمضان کے مہینے کے ساتھ پاک-افغان ٹی ٹوئنٹی سیریز شروع ہوگی، وہیں اس مبارک مہینے میں نیوزی لینڈ بمقابلہ پاکستان سیریز بھی دیکھنے کو ملے گی۔
نیوزی لینڈ دسمبر 2022 میں بھی پاکستان کے دورے پر آیا تھا، اور دو ٹیسٹ اور تین ون ڈے انٹرنیشنل میچز کھیلے تھے۔ اب دوبارہ آنے کا مقصد ہے 2021 میں سیریز سے اچانک دستبرداری کی تلافی کرنا۔ نیوزی لینڈ تب پاکستان کے دورے پر آیا تھا اور پہلے ون ڈے کے دن اچانک سکیورٹی خدشات کو وجہ بتاتے ہوئے دورہ ختم کرنے کا اعلان کر دیا تھا۔
نیوزی لینڈ نے نیو ایئر 2023 یہیں گزارا تھا اور اب یہ 'تلافی سیریز' کھیلنے کے لیے رمضان میں پھر آ رہا ہے۔ یہ سیریز پانچ ون ڈے اور اتنے ہی ٹی ٹوئنٹی میچز پر مشتمل ہوگی۔ دورے کا آغاز 14 اپریل سے ہوگا، جب لاہور میں پہلا ٹی ٹوئنٹی کھیلا جائے گا۔ سیریز کے ابتدائی تینوں مقابلے قذافی اسٹیڈیم میں ہوں گے جس بعد باقی ماندہ دو میچز 20 اور 24 اپریل کو راولپنڈی میں ہوں گے۔ یعنی بالکل عید الفطر کے دنوں میں۔
عید کے بعد راولپنڈی اسٹیڈیم ہی 26 اپریل کو پہلے ون ڈے انٹرنیشنل کی میزبانی کرے گا۔ جس کے بعد یہ سیریز کراچی منتقل ہو جائے گا۔ 30 اپریل سے 7 مئی کے دوران نیشنل اسٹیڈیم میں آخری چار ون ڈے انٹرنیشنلز کھیلے جائیں گے۔
نیوزی لینڈ کا دورۂ پاکستان 2023 - مکمل شیڈول
| بمقابلہ | بمقام | بتاریخ | ||
|---|---|---|---|---|
 پاکستان |  نیوزی لینڈ | پہلا ٹی ٹوئنٹی | لاہور | 14 اپریل 2023 |
| پاکستان | نیوزی لینڈ | دوسرا ٹی ٹوئنٹی | لاہور | 15 اپریل 2023 |
| پاکستان | نیوزی لینڈ | تیسرا ٹی ٹوئنٹی | لاہور | 17 اپریل 2023 |
| پاکستان | نیوزی لینڈ | چوتھا ٹی ٹوئنٹی | راولپنڈی | 20 اپریل 2023 |
| پاکستان | نیوزی لینڈ | پانچواں ٹی ٹوئنٹی | راولپنڈی | 24 اپریل 2023 |
| پاکستان | نیوزی لینڈ | پہلا ون ڈے | راولپنڈی | 26 اپریل 2023 |
| پاکستان | نیوزی لینڈ | دوسرا ون ڈے | کراچی | 30 اپریل 2023 |
| پاکستان | نیوزی لینڈ | تیسرا ون ڈے | کراچی | 3 مئی 2023 |
| پاکستان | نیوزی لینڈ | چوتھا ون ڈے | کراچی | 5 مئی 2023 |
| پاکستان | نیوزی لینڈ | پانچواں ون ڈے | کراچی | 7 مئی 2023 |
یہ ون ڈے سیریز پاکستان کی ایشیا کپ اور ورلڈ کپ 2023 کی تیاریوں کے لیے بہت اہم سمجھی جا رہی ہے جبکہ ٹی ٹوئنٹی مرحلہ بھی اگلے سال ٹی ٹوئنٹی ورلڈ کپ کی تیاریوں کا آغاز ہوگا۔
ابتدائی شیڈول کے مطابق نیوزی لینڈ کا یہ دورہ 13 اپریل سے 5 مئی کے دوران ہونا تھا لیکن اس میں معمولی سی تبدیلیاں ہوئی ہیں، جن کی تصدیق پاکستان کرکٹ بورڈ نے کی ہے۔
نیوزی لینڈ اِس وقت سری لنکا کی میزبانی کر رہا ہے، جس میں دو ٹیسٹ میچز کی سیریز مکمل ہو چکی ہے جبکہ تین ون ڈے اور اتنے ہی ٹی ٹوئنٹی انٹرنیشنلز ابھی باقی ہیں۔ اس سیریز کے فوراً بعد بلیک کیپس پاکستان کے لیے روانہ ہو جائیں گے۔