Cricket

Asal Cricket To Test Cricket Hay, Laikin ‘Kamaanay Wala Larka’ T20 Hay. Franchise Cricket Main Itna Paisa Hay, Itna Paisa Hay Ke Ab Test Ko To Koi Ghaas Hi Nahi Daal Raha Aur One Day Cricket Ko Apni Jaan Kay Laalay Paray Gaey Hain. Kiunkay Buhat Say Log Keh Rahay Hain Ke 50 Overs Cricket Ko Khatam Kar Daina Chahiye Aur Kuchh Kehtay Hain Zamanay Kay Sath Odi Cricket Ko Bhi Badalna Chahiyay.

Baat Yahan Tak Puhanch Gai Hay Ke Buhat Say Players Odi Cricket Say Apni Jaan Chhura Rahay Hain. Aik Taraf England Kay Ben Stokes Nay Odi Say Retirement Announce Kar Di Hay To Doosri Taraf New Zealand Kay Trent Boult Nay Apnay Central Contract Wapis Kar Dia Hay. Australia Kay Aaron Finch Bhi Odi Cricket Chhor Chukay Hain. Lagta Hay Aisay Buhat Say Players Aur Bhi Aaen Gay. Kia Pata Kuchh Dinon Main Virat Kohli Aur Kane Williamson Bhi Odi Cricket Chorr Dain?

Yani Hum Keh Saktay Hain Ke Cricket Dunya Main Aik “Inqilab” Aa Raha Hay, Aur Is Main Odi Cricket Ki Koi Jaga Nazar Nahi Aati. Is Say Andaza Lagaen Ke Odi Ka Last World Cup 2019 Main Hua Tha, Us Kay Baad 2 Saal Main Sirf 250 Odis Khailay Gaey. In Main Say 100 Matches Aisay Thay Jo Non-Test Countries Nay Khailay, Yani Top 10 Countries Nay Nahi. Ab Zara T20 International Matches Daikhain, In 2 Saalon Main Approx. 900 Matches Huay.

Yahi Nahi Test Cricket Bhi Odis Say Aagay Nazar Aai. 2 Years Main 121 Test Matches Khailay Gaey, Jo 605 Days Ki Cricket Banti Hay, Yani Odis Sa Approx. 3 Guna Ziyada.

Nahi, Nahi Odis Ko Khatra Test Say Nahi, Na Hi T20i Internationals Say Hay, Jo Asal Khauf Hay, Wo Hay Franchise Cricket Ka. Pakistan Say West Indies Aur Australia Say England Tak Phhaili Hui League Cricket Ka. Saal Ka Koi Bhi Maheena Utha Lain, Kaheen Na Kaheen Koi League Chal Rahi Hoti Hay. Phir Jo Pakistan Super League Main Khailta Nazar Aata Hay, Wohi Player Big Bash League Main, The Hundred Main Aur Indian Premier League Main Bhi Hota Hay. Is Soorat-E-Haal Main Do New Aur Barri Leagues Saamnay Aa Rahi Hain, Aik South Africa Ki Sa T20 Aur Doosri Uae Ki International League T20. Shayad Yahi Waja Hay Ke Kuchh International Players Tak Keh Rahay Hain Ke Odi Cricket Is Too Long And Boring!

To Kiya Odi Cricket Waqai Khatam Ho Jaey Gi? Jitni Bhi Baatein Hon, Jo Bhi Kaha Jaey, Haqeeqat Ye Hay Ke Jab Tak ICC Aur Cricket Broadcasters Zinda Hain, Aisa Nahi Ho Sakta. Kiunkay Odi Main Un Kay Liay Bara Maal Hay. T20 Sirf 3 Ghantay Ka Khail Hay, Laikin One Day Approx. 8 Hours Ka Hota Hay, Yani Ads Dikhanay Kay Liay Buhat Ziyada Duration Milti Hay. Is Baat Say Andaza Lagaen Ke ICC Nay 2013 Aur Phir 2017 Main Bhi Champions Trophy Khatam Karnay Ka Faisla Kar Liya Tha, Laikin Donon Martaba Broadcasters Nay Aisa Nahi Honay Dia.

Yoon ODI Format Main Aaj Bhi 2 Baray Tournaments Khailay Jaatay Hain: Aik World Cup, Doosra Champions Trophy.

Phir Jo Players ODI say Retire Ho Rahay Hain, Ya Honay Ki Baatain Kar Rahay Hain, Un Ko Daikhain, Sab Buhat Ameer Kabeer Players Hain. Un Kay Liay Kisi Bhi Format Ko Chhornay Ka Ailan Karna Mushkil Nahi, Wo Afford Kar Saktay Hain Laikin Kia Aik Aam Players, Maslan Koi Pakistani Player Aisa Soch Sakta Hay. Is Ki Income To Waisay Hi Doosray Countries Kay Players Say Buhat Kam Hay. Agar Nakhray Karnay Laga To Is Income Say Bhi Jaey Ga.

Haan! Ye Ho Sakta Hay Odi Cricket Main Kuchh Badlao Aa Jaey. Overs 50 Say Kam Kar Kay 40 Kar Diay Jaen. Ya 20,20 Overs Ki 2,2 Innings Ho Jaen. Kuchh Bhi Ho Sakta Hay Laikin Ye Baat Confirm Hay Ke Odi Cricket Filhaal Kaheen Nahi Jaa Rahi. Agar Waqai Odi Cricket Mar Rahi Hoti To Sab Say Pehlay Is Main Say Paisa Nikalta Hua Nazar Aata. Laikin Hamain To Aisa Kuch Dikhai Nahi Day Raha. Aglay 3 World Cup Main Say 2 India Main Hon Gay, Yani Sab Say Bari Cricket Market Main, To Tension Kis Baat Ki Bhaiya?

Share.

Leave A Reply