Aik Bukhar Hay Jo Pooray Pakistan Ko Apni Lapait Mein Lainay Wala Hay: PSL Fever. Pakistan Super League Ka 8th Title Kaun Jeetay Ga? Ye To Waqt Hi Bataey Ga. Filhaal Hum Sirf On Paper Hi Dekh Saktay Hain Ke PSL 2023 Mein Kis Mein Kitna Dam Hay?
Ghaur Say Dekhain To Koi Aisi Team Nazar Nahi Aati Jisay Hum Keh Sakain Ke Wo Title Ki Race Mein Shamil Nahi. Sab Aik Say Barh Kar Aik Hain. Aayen PSL 8 Ki Teams Ka Jaiza Laitay Hain:
Islamabad United
Pakistan Super League Ki Wahid Team Jis Nay 2 Titles Jeetay Hain. Aik Zamana Tha Islamabad United Ko Harana Mushkil Hi Nahi, Namumkin Tha. Laikin Ab Haal Ye Hay Ke 4 Seasons Say Team Aik Final Tak Nahi Khel Saki.
Kya ‘Roti Gang’ Is Jinx Ko Taur Paey Ga? Team Mein Shadab Khan, Asif Ali, Hasan Ali Balke Azam Khan Aur Mohammad Wasim Bhi Hain. Yani Ye To ‘Roti Gang Pro Max’ Ho Gaya. 😁
Yahi Nahi Team Islamabad Mein Alex Hales, Colin Munro Aur Moeen Ali Bhi Hain. Moeen Ki Partial Replacement Bhi Dekhain: Russie Van Der Dussen. Yani Team To Dabang Hay Ustad!
Islamabad Hamesha #Dimaghse Khelta Hay. Is Martaba Dimagh Kay Sath Zara Sa Dil Bhi Laga Lay To Ho Sakta Hay Aik Baar Phir Title Jeet Jaey.
Peshawar Zalmi
Peshawar Zalmi Hamesha Say Favourite Title Contender Raha Hay. Ye PSL History Mein Sab Say Zyada 43 Matches Jeetnay Wali Team Hay, Aur Record 4 Baar Final Khel Chuki Hay. Is Martaba Peshawar Kay Captain Hain Babar Azam, Jo Haal Hi Mein Kai ICC Awards Jeet Chukay Hain.
Zalmi Squad Mein Kaptan Ko Milain Gay TKC Yani Tom Kohler-Cadmore Aur New Zealand Kay James Neesham, West Indian Jori Rovman Powell Aur Sherfane Rutherford. Experienced Wahab Riaz Aur Haris Sohail Bhi Zalmi Ka Hissa Hain Aur Young Sensation Mohammad Haris Aur Aamer Jamal Bhi. Yani Zalmi Mein Dam To Hay!
Bus Babar Last Year Wali Kaptani Na Kar Dain, Jab Karachi Kings Un Ki Kaptani Mein Consecutive 9 Matches Haara Tha. 😐
Karachi Kings
Is Saal Karachi Kings Kay Aik Faislay Nay PSL Mein Naya Josh Bhar Dia Hay, Wo Hay Matthew Wade Ko Pick Karnay Ka Faisla. 19th February Ko National Stadium Mein Jab Matthew Wade Aur Shaheen Afridi Ka Aamna Samna Hoga To Aag To Lagay Gi Boss! 🔥
Sirf Wade Hi Nahi, Karachi Kay Paas Imad Wasim Bhi Hain, Mohammad Amir, Sharjeel Khan, James Vince, Tabraiz Shamsi, Mir Hamza Aur Sab Say Barh Kar ‘Sadabahar’ Shoaib Malik Bhi Hain.
Phir 14 February Ko Amir Aur Babar Ka Taakra Bhi Hoga, Jis Sub Ko Intizar Hay.
On Paper To Ye Zabardast Team Lagti Hay, Laikin Masla Hay Form Ka, Aur Sath Hi Game Changer Players Ka. Kaun Hoga Jo Karachi Ki Qismat Badlay Ga?
Kya Imad Wasim Last Season Mein 10 Mein Say 9 Matches Mein Shikast Khanay Wali Team Ko Transform Kar Sakain Gay?
Lahore Qalandars
Ye Hay Lahore Qalandars! Wo Team Jis Ka Kabhi Mazaq Uraya Jata Tha, Aaj Defending Champion Hay. Shaheen Afridi Aur Haris Rauf Jaisa Khatarnak Bowling Pair Hay Is Kay Paas. Phir Fakhar Zaman Jaisa Destructive Batsman, World No. 1 Bowler Rashid Khan, Phir Harry Brook, Sam Billings, Liam Dawson, Kusal Mendis Aur Sikandar Raza. Opponents Ko Darr To Lag Raha Hoga.
Lahore Aasani Say Trophy Haath Say Janay Nahi Day Ga.
Multan Sultans
On Paper Most Dangerous Team Hay Multan Sultans Ki. Kaptaan Mohammad Rizwan Ki Team Mein Hain Master Blasters Ki Trio David Miller, Rillee Roussow Aur Tim David, Sath Hi Team Mein Kieron Pollard, Khushdil Shah, Shan Masood Aur Anwar Ali Bhi Hain.
Bowlers Mein Adil Rashid, Shahnawaz Dahani Aur Usama Mir Hon Gay. Phir Multan Musalsal 2 Saal Final Khela Hay., Aur Is Martaba Bhi Final Kay Liay Favourite Nazar Aata Hay. Dekhna Ye Hay Ke Sultans Apnay Plans Kis Tarah Execute Kartay Hain?
Quetta Gladiators
Jab Say PSL Mukammal Taur Par Pakistan Shift Hui Hay, Quetta Ki Performance Ko Nazar Lag Gai Hay. Pehlay Donon Seasons Ka Runner Up Aur 4th Season Mein Title Jeetnay Wala Quetta Phir Kabhi Play Off Tak Nahi Khel Saka.
Kaghaz Par To Is Saal Bhi Team Quetta Achi Nazar Aati Hay. Bowling Mein Dam Dikhai Deta Hay, Kyunke Team Mein Hain: Naseem Shah, Mohammad Hasnain, Mohammad Nawaz, Naveen Ul Haq Aur World No. 2 Bowler Wanindu Hasaranga. Batting Bhi Kam Nahi, Jason Roy, Odeon Smith, Will Smeed Aur Martin Guptill Tabahi Pher Saktay Hain.
Phir Sab Say Barh Kar Iftikhar Ahmed Hain. #Iftimania To Is Waqt Chhaya Hua Hay. Quetta Mein Honay Walay Exhibition Match Mein Iftikhar Nay Peshawar Zalmi Kay Wahab Riaz Ko 6 Balls Par 6 Sixes Laga Kar Pre-Season Hi Mahaul Bana Dia Hay. Ab To Sab Intizar Kar Rahay Hain 20 February Ka, Jab National Stadium Mein Donon Players Aik Baar Phir Aik Doosray Ka Saamna Karain Gay.
To On Paper Dekhain To Last 3 Seasons Ki Best Performers Lahore Aur Multan Hi Sab Say Mazboot Teams Nazar Aati Hain. Laikin Ye PSL Hay Boss! Keh Nahi Saktay Ke Is Baar Champion Kaun Banay Ga. Aap Kya Kehtay Hain?