Pakistan Super League Mein Khelti Teams Ki Kits To Aap Nay Dekhi Hongi. Karachi Kings Ki Kit Par Bara Bara 1xBAT Likha Hua Hay. Quetta Gladiators Kay Kapron Par bj Sports, Multan Kay Seenay Par Wolf777 News To Lahore Qalandars Ki Back Par MelBat Printed Hay.
Ye Kaun Si Companies Hain Bhai? Aur Un Ki Product Kya Hay?
Agar Aap Samajh Rahay Hain Ke Ye Sports Ka Samaan Banati Aur Bechti Hain To Aap Buhat Hi Masoom Hain.
Ye Asal Mein Betting Companies Hain. Laikin Pakistan Mein To Betting Aur Gambling Illegal Hay, Balke Aisa Karnay Par To Saza Milti Hay. To Ye Companies Kaisay Kaam Kar Rahi Hain? Wo Bhi Pakistan Kay Sab Say Baray Sport Event Mein Sponsors Ban Kar?
Ye Kaun Si Strategy Hay?
Is Strategy Ko Kehtay Hain: Surrogate Advertising, Jo Aisi Product Ki Hoti Hay Jis Ka Ad Chalanay Par Asal Mein Pabandi Ho. To Main Product Ka Naam Use Kar Kay Kisi Doosri "Product" Pesh Ki Jati Hay, Jo Ho Sakta Hay Asal Mein Wujood Hi Na Rakhti Ho, Ya Ho Bhi To Asal Maqsad Usay Bechna Na Ho.
PSL Kay In Sponsors Kay Naam Dekhain: Bet Ki Jaga Bat Ka Lafz Use Kia Gaya Hay Aur Ye Koshish Ki Gai Hay Ke Asal Mein Wo Sports Equipment Bech Rahi Hain, Halanke Haqeeqat Ye Nahi.
Surrogate Advertising Mein Companies Ko Apni Main Product Ki Brand Building Mein Madad Milti Hay Aur Us Ki Indirectly Advertisement Ho Jati Hay.
Surrogate Advertising Ki Example
Aap Ko Wo Famous Indian TV Commercials Zarur Yaad Hongay Jin Mein Tagline Thi ‘Men Will Be Men’. Zahir To Ye Kia Jata Tha Ke Ye Music CDs & Cassettes Kay Ads Hain, Laikin Asal Mein Ye Imperial Blue Whisky Ka Ad Hota Tha. Kyunke India Mein Sharab Kay Ads Par Pabandi Hay, Is Liay Wo Apni Brand Building Aur Main Product Ki Brand Recognition Barhanay Kay Liay Surrogate Advertising Ki Technique Use Kartay Thay.
Khud PSL Management Bhi
Afsos Ki Baat Ye Hay Ke PSL Mein Total 6 Teams Khel Rahi Hain, Jin Mein Say 4 Ki Kit Par Aisi Betting Companies Kay Logo Lagay Huay Hain. Yahi Nahi Balke Khud PSL Kay Main Sponsors Mein DafaNews Shamil Hay Jo Asal Mein DafaBet Ko Surrogate Advertising Hay. Sirf Islamabad United Aur Peshawar Zalmi Aisi Teams Hain Jin Ki Kit Par Kisi Betting Company Ka Logo Nahi.
Pakistan Cricket Board Aur Pakistan Super League Ki Management Itni Desperate Ho Chuki Hay Ke Ab Wo Betting Companies Ko Bhi Qubool Karnay Ko Tayar Hay. Agar Kal Kisi Sharab Bananay Wali Company Nay Is Tarah Apni Surrogate Advertising Shuru Kardi To Wo Un Kay Ads Lainay Ko Bhi Tayar Ho Jayen Gay?