Itnay One-Sided Match Ki To Hamain Bilkul Umeed Nahi Thi. Laikin Apna Last Match 67 Runs Say Haarnay Walay Qalandars Nay Apna Sara Ghussa Quetta Gladiators Par Utar Diya Hay. QG v LQ Match Mein 63 Runs Ki Buhat Bari Kamyabi Unhain Points Table Par 2nd Spot Par Lay Aai Hay. Is Match Mein Haris Rauf Nahi Chalay To Kya Hua? Shaheen Afridi Nay To Wo Bowling Spell Karwaya Ka Lahori Karachi Kay Hathon Haar Ka Gham Bhi Bhool Gaey Hongay.
Pakistan Super League 2023
Quetta Gladiators vs Lahore Qalandars
21 February 2023
National Stadium, Karachi, Pakistan
Result: Lahore 63 Runs Say Jeet Gaya
| 🟩 LQ | 198-6 | |
|---|---|---|
| Shai Hope | 47 (32) | |
| Sikandar Raza | 32 (16) |
| QG Bowling | O | M | R | W |
|---|---|---|---|---|
| Qais Ahmed | 4 | 0 | 36 | 2 |
| Odean Smith | 4 | 0 | 41 | 2 |
| 🟪 QG | (T:199) | 135-8 |
|---|---|---|
| Jason Roy | 48 (30) | |
| Mohammad Hafeez | 25 (22) |
| LQ Bowling | O | M | R | W |
|---|---|---|---|---|
| Shaheen Afridi | 4 | 0 | 22 | 3 |
| David Wiese | 4 | 0 | 23 | 3 |
Clash Of Titans
Pakistan Super League Mein Ye Bowlers Ka ‘Clash Of Titans’ Tha. Aik Taraf Shaheen Afridi Aur Haris Rauf To Doosri Taraf Naseem Shah Aur Mohammad Hasnain. Wo Alag Baat Ke Lahore Qalandars Puri Tayari Kay Sath Maidan Mein Aaey. Unhon Nay Sarfaraz Ahmed Kay Kuch Faislon Ka Poora Poora Faida Uthaya Aur Jaisa Ke First Over Mohammad Hafeez Ko Dainay Ka. Jis Mein Tahir Baig Kay Toofani Shots Nay Momentum Lahore Kay Haq Mein Kardia.
Quetta Nay Powerplay Mein Hi Donon Openers Ko Out To Kardia Laikin Tab Tak Wo 65 Runs Bana Chukay Thay Aur Match Ki Tone Set Ho Chuki Thi. Baad Mein Wicket Keeper Batsman Shai Hope Ki 47 Aur Aakhir Mein Sikandar Raza Ki 16 Balls Par 32 Runs Ki Innings Lahore Ko 198 Runs Tak Puhancha Gaeen. Bawujood Is Kay Ke Last 3 Overs Mein Sirf 28 Runs Banay.
Naseem Shah Kay Liay Ye Buhat Disappointing Din Tha. Un Kay 4 Overs Mein 47 Runs Paray Aur Aik Wicket Tak Nahi Mili. Albatta Mohammad Hasnain Nay Buhat Achi Bowling Ki.
Shaheen Ki Parwaz
Gladiators Nay Apnay Faislay Kay Mutabiq Target Chase Karna Shuru Kia Aur Shaheen Afridi Kay Hathay Charh Gaya. Unhon Nay First Over Mein Mandatory Wicket Haasil Ki Aur Phir Jason Roy Ko ‘Tigni Ka Naach’ Nacha Dia. Wo Girtay Partay, Reviews Say Bachtay Kisi Na Kisi Tarah Survive Kar Gaey Laikin Shaheen Ka Ye Fiery Spell Arsay Tak Yaad Rakha Jaey Ga.
9 Overs Mein 68 Runs Kay Sath Quetta Chase Ki Taraf Rawan Tha, Laikin Phir Apna Pehla Match Kheltay Rashid Khan Nay Decisive Blow Lagaya. Unhon Nay 30 Balls Par 48 Runs Bananay Walay Jason Roy Ko Clean Bowled Kardia. Match Yaheen Say Lahore Ki Taraf Tilt Ho Gaya Aur Finally Qalandars Hi Nay Jeeta.
Jis Tarah Gladiators Kay Naseem Shah Nahi Chalay, Waisay Hi Ye Lahore Kay Haris Rauf Ka Din Nahi Tha. Un Kay Sirf 3 Overs Mein 43 Runs Paray Jin Mein 5 Sixes Bhi Shamil Thay. Jin Mein Say 3 Jason Roy Nay Aik Over Hi Mein Laga Diay Thay.
Wiese Factor
Aaj Aik Aur Factor Kaam Kar Gaya, David Wiese, Jinhon Nay Martin Guptill, Iftikhar Ahmed Aur Mohammad Hafeez Ki Bari Wickets Leen. In Ko Mila Kar Lahore Nay 7 Players Say Bowling Karwai Jis Say Un Ki Bowling Strength Ka Andaza Lagaya Ja Sakta Hay.
Consecutive 2 Match Haar Ka Quetta Aik Baar Phir Points Table Par Aakhri Number Par Chala Gaya Hay. Sarfaraz Ahmed Ki Kaptaani Par Ab Bara Question Mark Lag Gaya Hay. Ab Dekhna Ye Hay Ke Lahore Is Jeet Say Kitna Hausla Pakarta Hay. Waisay Lagta To Hay Ke Wo Karachi Kings Kay Hathon Milnay Wali Bari Haar Kay Sadmay Say Nikal Gaya Hay.
Pakistan Super League Points Table
20 February 2023
| M | W | L | PT | NRR | |
|---|---|---|---|---|---|
| 🟦 MS | 4 | 3 | 1 | 6 | 2.107 |
| 🟩 LQ | 3 | 2 | 1 | 4 | -0.050 |
| 🟨 PZ | 3 | 2 | 1 | 4 | -0.632 |
| 🟦 KK | 4 | 1 | 3 | 2 | 0.499 |
| 🟥 IU | 2 | 1 | 1 | 2 | -0.832 |
| 🟪 QG | 4 | 1 | 3 | 2 | -1.635 |