Australian Cricket Team To India Puhanch Gai Laikin Usman Khawaja Peechay Reh Gaey Hain. Kyun? Kyunke India Nay Un Ko Abhi Tak Visa Issue Nahi Kia Hay. Is Par To Aik Aur Kyun Paida Hota Hay. Laikin Is Kyun Ka Jawab Hamaray Paas Nahi, Haan! Kuch Andaza Zarur Hay. Us Par Baat Karnay Say Pehlay Ye Dekhtay Jayen, Usman Khawaja Nay Instagram Par Ye Meme Share Ki Hay:
Australia Player Ka Pehla Group Allan Border Medal Ceremony Mein Shirkat Kay Baad Mangal Ko Sydney Say Rawana Hua Tha. Doosri Flight Budh Ko Gai Laikin Usman Khawaja In Donon Mein Nahi Thay.
Waisay Usman Is Waqt Apni Best Form Mein Hain, Balke Allan Border Medal Night Mein Australia Kay Test Player Of The Year Bhi Banay. Last Year Unhon Nay 67 Say Zyada Kay Average Say 1080 Runs Banaey Thay. Aur Ab Un Ka Naya Imtehan Hoga India Mein, Jahan Australia 9 February Say 4 Test Matches Khelay Ga.
Ye Pehla Mauqa Nahi Hay Ke Usman Khawaja Ko India Jatay Huay Visa Problems Ka Samna Hua Ho. 2011 Mein Champions League T20 Kay Liay Ja Rahay Thay Tab Bhi Yahi Hua Tha.
Ab Australian Officials To Keh Rahay Hain Ke Visa Issues Ki Waja Usman Khawaja Ka Pakistan Mein Paida Hona Nahi. Laikin Jab 2011 Mein Aisa Hua Tha To Usman Khawaja Nay Tweet Kia Tha Kay
“Indian Visa Department Ko Apnay Issues Solve Karnay Ki Zarurat Hay. Wo Mujhe As A Australian India Ka Safar Karnay Nahi Day Rahay Kyunke Mein Yahan Paida Nahi Hua, Wah."
36 Saala Usman Khawaja 1986 Mein Islamabad Mein Paida Huay Thay. Jab 4 Saal Kay Thay To Family Australia Shift Ho Gai Thi. Ab To Wo Australia Kay Rung Mein Rung Gaey Hain Laikin India Ko Phir Bhi Masla Hay.