Kia Aap Nay The Legend Of Maula Jatt Dekhi Hay? Ager Nahi Tou Pehlay Say Samajh Lain Kay Yeh Movie Sirf 2 Months Main Box Office Per 230 Crore Rupay Say Ziada Ka Business Ker Chuki Hay. Ye Buhat Bari Raqam Lagti Hay, Laikin Aik Minute! Picture Abhi Baqi Hai Meray Dost.
Avatar Ka Naam Suna Hay Na Aap Nay? James Cameron Ki Is Movie Ka Naya Sequel 16 December Say Araha Hay. 400 Million Dollars Say Ban'nay Wali Yeh Movie Box Office Per Ab Tak Ki Sab Say Zyada Business Kernay Wali Movie Bhi Ban Sakti Hay.
Maula Jatt Kis Number Par?
Punjabi Movie The Legend Of Maula Jatt October Main Aai, Aur Aatay Hi Chha Gaei. Jis Nay Ye Movie Dekhi Woh Is Ka Fan Hogaya. Yeh Movie 50 Crore Say 55 Crore Rs. Kay Budget Say Banai Gaei Thi Aur Is Waqt Yeh Domestic Aur International Market Main Pakistan Ki Sab Say Ziada Business Kernay Wali Film Ban Chuki Hai. Aur Yeh Sab Sirf 2 Months Mai Hoa Hay.
Maula Jatt Nay Pakistan Main 90 Crore Rs. Say Ziada Ka Business Kiya Hay. Mulk Say Bahar Is Movie Nay 140 Crore Rs. Ka Hasil Kiay. Is Say Pehlay Kisi Pakistani Movie Nay 200 Crore Rs. Tou Kia, 150 Balkay 100 Crores Ka Business Tak Nahi Kia Tha.
TLMJ Say Pehlay Yeh Record 2018 Main Ban'nay Wali Movie Jawani Phir Nahi Ani 2 Nay Banaya Tha. Is Movie Nay Worldwide 73 Crore Rs. Ka Business Kiya Tha.
Dunya Ki Kamiyab Tareen Movie
Laikin Ye Paisa Kuch Bhi Nahi, Agar Is Ka Muqabla Bahar Kia Jaey. Hollywood Ki Baat Karain Tou James Cameron Ki 2009 Main Banai Gaei Movie Avatar Nay Dunya Bhar Main 2.92 Billion Dollar Ka Business Kia Tha. Yeh Film 237 Million Dollar Kay Budget Say Bani Thi. Yani History Ki Sab Say Highest Grossing Film, Aur Yeh Record Aaj Bhi Qaim Hay. 13 Saal Baad Bhi!
Doosray Number Per Avengers: Endgame Hay Jis Nay 2019 Main Release Kay Bad 2.79 Billion Dollar Ka Worldwide Business Kia. James Cameron Hi Ki Titanic Nay 1997 Main 2.18 Billion Dollars Hasil Kiay Thay Aur Ye Movie 3rd Number Per Hay.
Star Wars: The Force Awakens (2.06 Billion Dollars) Aur Avengers: Infinity War (2.04 Billion Dollars) Kay Kay Sath Is List Main Bil Tarteeb 4th Aur 5th Number Per Hain.
Kya Avatar 2 Kamyab Hogi?
Ab To Avatar Ke Sequel Avatar: The Way Of Water Kay Charchay Hain, Laikin Abhi Is Ki Success Kay Baray Main Kuch Kehna Qabal-Az-Waqt Hoga. Film Ki Tayari Par 350 Million Dollar Say 400 Million Dollars Ki Laagat Aai Hai. Yani Yeh Film Industry Ki History Ki Mehngi Tareen Movie Hogi. Aur Is Kay Paas Hit Honay Kay Ilawa Doosra Koi Raasta Nahi. Commercial Success To Rehnay Dain, Shayad Isay Break Even Kay Liay Bhi Isay Kai Records Tornay Parain. Haan! Agar Yeh Movie Hit Hogai To Film Industry Main Aik History Create Hojaey Gi, Aur Aanay Walay Years Main Aisi Mazeed Films Theater Main Daikhnay Ko Mil Sakain Gi. Laikin Aisa Na Ho Saka To Ya Tareekh Ka Sab Say Bara Box Office Bomb Hoga.
