Pakistan Ki Tareekh Main Aik Ajab Waqia Hua. Mulk Ki Khufia Agency Kay Sarbarah Manzar-e-Aam Par Aa Gaye Aur DG ISPR Lt. General Babar Iftikhar Kay Saath Aik Press Conference Kar Dali.
ISI Chief Lt. General Nadeem Anjum Nay PTI Se Shikwon Ka Daftar Khol Diya. Nadeem Anjum Ka Kehna Tha Kay Wo Apnay Liye Nahi Bulkay Idaray Kay Liye Samnay Aaye Hain. Mere Idaray Kay Jawano Par Jhootay Ilzamat Lagaye Gaye. Jhoot Say Fitna o Fasad Ka Khatra Hou Tou Such Ko Chup Nahi Rehna Chahiye.
Nadeem Anjum Nay Imran Khan Ka Naam Liye Baghair Un Par tanqeed Ki Kay Agar Aap Ka Sipah Salar Ghaddar Hay Tou Mazi Main Un Ki Tareefon Kay Pul Kiun Bandhtay Thay? Unhon Nay Dawa Kiya Kay Tehreek-e-Adam Etimad Nakaam Bananay Kay Liye Army Chief Ko Ghair Muyyana Muddat Tak Extension Ki Paish Kash Ki.
Unhon Nay Shikwa Kiya Kay Imran Khan Raat Ko Band Kamray Main Army Chief Say Mulaqaten Kartay Hain, Ghair Aaeeni Farmaishen Kartay Hain Aur Din Main Un Par Ilzam Lagatay Hain.
Unhon Nay Kaha Kay Neutral, Mir Jaffer, Mir Sadiq Aur Ghaddar Is Liye Kaha Ja Raha Hay Kiun Kay Hum Nay Ghair Qanooni Kaam Say Inkar Kiya. Idaray Nay Mutaffiqa Taur Par Apolitical Rehnay Ka Faisla Kiya.
DG ISI Nay Ye Bhi Dawa Kiya Kay Arshad Sharif Ko Koi Khatra Nahi Tha, Arshad Sharif Ka Idaray Say rabta Tha Aur Wo Pakistan Wapas Aana Chahtay Thay.
DG ISPR Lt General Babr Iftikhar Nay Bhi Kaha Kay Hum Say GhaltiaN Ho Sakti Hain Magar Hum Sazishi Aur Ghadar Nahi Hain.
Babar Iftikhar Ka Kehna Tha Kay Cipher Par Bhi Man Gharat Kahani Sunai Gai. ISI Ko Cipher Par Kisi Sazish Kay Suboot Nahi Milay Thay.
DG ISI Aur DG ISPR Kay Shikwon Par PTI Ka Jawab-e-Shikwa Kuch Hi Dair Main Samnay Aa Gaya.
Lahore Main PTI Kay Rehnumaon Nay Press Conference Ki. Sabiq Wazir-e-Kharja Shah Mehmood Qureshi Nay Kaha Kay Cipher Man Gharat Bayaniya Nahi Bulkay Haqiqat Hay. Kamra Main Hum Ko Kaha Gaya Tha Kay Cipher Serious Issue Hay. Shah Mehmood Qureshi Nay Sawal Uthaya Kay Agar Cipher Kahani Thi Tou Safeer Ko Demarche Kiun Kiya Gaya?
Shah Mehmmod Qureshi Nay Ye Bhi Kaha Kay DG ISI Aur DG ISPR Ki Press Conference Banti Nahi Thi, Wo Agar Apolitical Hain Tou Un Ko Saamnay Nahi Aana Chahiye Tha, Hukumat Ko Apna Bayanya Khud Paish Karna Chahiye.
Asad umar Nay Kaha Kay Imran Khan Nay March Main Extension Ki Paishkash Khas Tanzur Main Ki Thi. PDM Extension Ka Keh Rahi Thi Tou Kaha Extension Hum De Detay Hain. Asad Umar Nay Mazeed Kaha Kay Band Kamron Ki Baaten Band Kamron Main Rahen Tou Behtar Hay.
Asad Umar Ka Mazeed Kehna Tha Kay Fauj Aaeeni Kirdar Main Rehna Chahti Hay Ye Achi Baat Hay. Imran Khan Yaqeen Rakhtay Hain Kay Mulk Kay Liye Mazboot Fauj Zaruri Hay. Imran Khan Nay Kabhi London Ya Washington Ja Kar Fauj Ko Badnam Nahi Kiya.
Shireen Mazari Nay Kaha Kay DG ISPR Kay Bayan Par Afsos Hua Kay Arshad Sharif Ko Koi Khatra Nahi Tha. Arshad Nay Mujhay Message Bheja Kay ‘They have sent assassins after me’.
Fawad Chaudhry Ka Kehna Tha Kay DG ISPR Ki Press Conference Say Dhachka Pohncha. Hum Siyasi Mukhalfeen Ko Jawab Day Saktay Hain Idaray Ko Kesay Jawab Dain.