Karachi Main Bilawal House Clifton Say Chand Qadam Kay Fasalay Par..,

Muhammad Umar Hath Main Khilonay Pakray Soch Raha Tha Kay Woh In Ko Baich Baich Kar Aik Roaz  Itnay Paisay Jama Kar Lay Ga Kay Aik Rikshaw Lay Sakay Ga.

Phir Woh Apnay Baap Ka Bojh Kam Karay Ga, Aur Maan Ko Apnay Paison Say Kuch Na Kuch Lay Kar Khilaya Karay Ga.

Wo Yeh Soch Hi Raha Tha Kay 2 Golian Chalnay Ki Awaz Aai Aur Aik Dum Andhera Chha Gaya.

Ye Andhera Sirf Umar Ki Zindagi Main Chaya Tha. Maut Ka Andhera!

Umar 2 Golian Lagnay Say Itna Zakhmi Hua Ke Maut Kay Farishtay Asmaan Say Chal Paray.

Golian Marnay Wala Kon?

Umar Aik Pizza Shop Kay Samany Khilonay Baichnay Ka ‘Jurm’ Kar Raha Tha. Itnay Baray Jurm Par Maut Kay Ilawah Kia Saza Di Jati?

Malikon Ki Thapki Kay Bina Tu Security Guard Kisi Ko Pistol Dikha Nahi Sakta, Tu Chalaey Ga Kaisay? Aur Umar Khilonay Baich Kar Pizza Shop Kay Saray Karobar Ko Bhi To Kharab Kar Raha Tha Na.

Security Guard Nay Umar Ku Roka Bhi Tha Magar Usay Pakka Yaqeen Tha Kay Kuch Bhi Hojaye Security Guard Goli Nahi Chalaye Ga.

Us Masoom Ko Kia Pata Tha Ke Yeh Shahrukh Jatoi Ka Shehar Hay, Jahan Qatil Ka Tahaffuz Riasat Ki Zimmedari Hoti Hay.

Security Guard Nay Umar Ko Neem Murda Halat Main Uthaya Aur Weeran Jaga Par Phaink Kar Bhag Gaya. Jahan Umar Nay Zindagi Ki Baqi Chand Sansain Lain, Aur Umar Ki Umar Khatam.

Police Ka Anokha Moaqqaf  

 Jab Case Police Kay Pass Puhancha To Shakal Hi Badal  Gai, Waja “Quaid-e-Azam” Ya Kuch Aur…?

SHO Thana Boat Basin Kehtay Hain Kay Security Guard Pistol Ki Safai Kar Raha Tha Kay Fire Ho Gaya. Magar Media Reports Kay Mutabiq Bachay Ku Tu 2 Golian Lagi Hain, 2 Golian!

Ho Sakta Hay Security Guard Say Aik Kay Baad Doosri Ghalti Fori Ho Gai Ho. Yeh Bhi Ho Sakta Hay Security Guard Jiss Shop Par Kaam Karta Tha, Us Kay Malkaan Nay Police Kay Pass Janay Main Zara Bhi Dair Naa Ki Ho.

Security Guard Jab Lash Thikanay Laganay Bhaga To Police Nay Usay Masoosm Qarar Daitay Hoye Kaha Kay Security Guard Tu Bachay Ko Hospital Lay Ja Raha Tha. Rasatay Main Bachay Ki Death Ho Gai Aur Woh Shayad Dar Kar Bhag Gaya.

Media Ki Rawayati Reporting

Muhammad Umar Kay 3 Ya 4 Bhai Mukhtalif Shops Par Kaam Kartay Thay, Aur Baap Rikhshaw Chalata Tha. Halat Itnay Buray Tu Kisi Surat Nahi Thay Kay Umar Ko Hath Phailana Paray. Magar Police Aur Ilaqay Kay  Sahib-e-Sarwat Afrad Ki Taraf Say Mili “Malomaat” Kay Baad Media Nay Umar Ku Bhikari Bacha Qarar Day Dia. Aur Case Aur Kamzor Ho Gaya.

Shahrukh Jatoi Ka Adalati Nizam

Goli Ghalti Say Chali, Bacha Bheek Mangta Tha, Security Guard Nay To Hospital Lay Janay Ki Koshish Bhi Ki….

 In ‘Man-Gharrat Haqaiq’ Kay Bad Umar Ka Case Utna Hi Kamzor Hay Jitna Umar 2 Golian Lagnay Kay Baad Ho Gaya Tha. Baap Kay Paas To Wakeel Ki Fees Kay Paisay Nahi To Karay Ga Kaisay? Aur Sarkari Wakeel Par To Adalatain Yaqeen Nahi Karteen, To Hum Kaya Yaqeen Karain?

Riyasat Pahlay He Itni Bojhal Hay Ke Woh Ghareeb Ko Insaaf Dilanay Ka Mazeed Bojh Nahi Utha Sakti.

Aisay Main Bus Yahi Likha Jaa Sakta Hay Kay Shehar Main Aik Aur Ghareeb Ka Bacha “Hadsati Maut” Ka Shikar Ho Gaya.

Tamam Aala Afsran, Hukmaran, Qanoondan Bohat Dukhi Hain Aur Khandaan Kay Sath Izhar-e-Hamdardi Kartay Hain.

Is Say Zyada Umar Kay Baap Ko Tawaqqu Bhi Nahi Rakhni Chahiye.  

Share.

Leave A Reply