Wazir-e-Azam Shehbaz Sharif London Ka Khandani Daura Kar Kay Watan Wapis Puhanch He Gaye. Wahan Pahlay Din To Khandan Kay Logon Nay Mil Baith Kar Khaya Piya, Aur Gup Shup Ki. Phir Wazir-e-Azam Nay Sabiq Wazir-e-Azam Mian Nawaz Sharif Say Mashwara Kia Ke Ainda Chief Kis Ku Lagain?
To In Mulaqaton Kay Baad Khalisatun Merit Par Wazir-e-Azam Laganay Ka Faisala Kia Gia. Ab Dekhain London Say Liay Gaye “Khalisatun” Merit Kay Mashwaray Main Islamabad Puhanch Kar Kya Kya Milawat Hoti Hay.
Siyasatdaan Jo Union Council Kay Chairman Ka Ticket Merit Par Nahi Day Patay, Woh Army Chief Kaisay “Khalisatun” Merit Par Lagain Gay? Isi Liye Hum Nay Socha Kay Faisla Wazir-e-Azam Ka, Marzi Wazir-e-Azam Ki, Magar Hum “Mulk Kay Wasee-Tar Mafad” Main Shehbaz Sharif Sahib Ko Aik Muft Mashwara Day Dain.
Aik Muft Mashwara
Janab-e-Wazir-e-Azam! Aap Mian Nawaz Sharif Kay Mashwaray Say Chief Lagana Chahtay Hain? Wohi Mian Nawaz Sharif Jinhon Nay General Pervez Musharraf Ko Chief Of Army Staff Lagaya, Phir Mushraf Sahib Nay Sari Party Ko Agay Lagaya, Balkay Saray System Ko Hi Agay Laga Dia.
Mojooda Chief Saab Ko Bhi Mian Nawaz Sharif Nay Lagaya Aur Us Kay Baad “Mujhay Kyun Nikala?” Ka Nara Bhi Lagaya.
Mian Nawaz Sharif Kay General Raheel Sharif, General Jahangir Karamat, General Abdul Waheed Kakar Kay Sath Bhi Ta’lluqat Misali Nahi Rahay. Aur Jo Ta’lluqat Misali Rahay Bhi, Wo Chand Lamhon Kay Liye Hi Rahay, Us Kay Baad Army Chief Naa Rahay. Jee Haan! Main Baat Kar Raha Hoon General Ziauddin Butt ki.
Ab Is Track Record Kay Sath Aap Mian Nawaz Sharif Kay Sath Mashwara Karain Gay To Kia Faisla Karain Gay?
Doosri Taraf Aap Ko Aik Aur Sabiq Wazir-e-Azam Imran Khan Mashwara Day Rahay Hain. COASs Kay Sath Ta’lluqat Main Un Ka Track Record Mian Sahib Say Kafi Behtar Hay. Opposition Kay Sath Sath Hukoomat Main Rehtay Huay Bhi Un Kay COASs Kay Ta’lluqat Achhay Hi Rahay. Nikalay Janay Par Bhi Na Corruption Kay Cases, Na Mulk-Badri, Balkay abhi Bhi Kabhi Kabhi Koi Paigham Mil Hi Jata Hay Un Ko.
Agar Halat Aap Ki Marzi Kay Huay To Koi Aap Ko Credit Lainay Say Koi Nahi Rok Sakata, Magar Halat Aap Ki Marzi Kay Na Huay To Aap Kam-Az-Kam Siyasi Taur Par Ilzam Imran Khan Par Daal Saktay Hain Kay Aap To Merit Par Lagana Chahtay Thay, Magar Imran Khan Ki Maan Kar Aisa Kia.
Sub Ki Sunain Laikin...
Imran Khan Ki Bhi Sun Lain! Ho Sakta Hay Un Kay Pas Bhi Koi Acha Mashwara Ho. Balkay PMLQ Ko Sunain, Jamat-e-Islami Ko Sunain. Har Aik Ki Sunain. Aslam Halwai Ki Sunain, Rasheed Hajjam Ki Sunain, Akbar Darzi Ki Sunain. Sab Ki Sunain Magar ‘Barray Mian Sahib’ Ko Na Sunain.
Is Main Koi Doosri Raey Nahi Ke Aap Un Ki Buhat Izzat Kartay Hain, Ehtaram Ka Aik Rishta Hay. Magar Chief Laganay Main Unka Tajurba Kuchh Aisa Hay Kay “Maraz Barhta Gaya Joon Joon Dawa Ki.”
Agar Aap Nay Phir Bhi “Khalisatun Merit” Ka Hi Faisla Karna Hay Aur Kisi Ki Nahi Sun’ni To Bas Aik Darkhwast Hay Kay Pehlay “Khalisatun” Ko Kisi forensic Lab Say Test Karwa Lain. Kahin Koi Masla Na Ho.
Baad Main Kaheen Aisa Na Ho Kay Aap Bhi Sabiq Wazir-e-Azam Ki Tarah Apnay Raag Main Gaa Rahay Hon:
“Mujhay Kyun Nikala?”