PTI Ke Chairman Imran Khan Kehtay Hain Ke Jo Bhi In Choron Ko NRO De Raha Hay Wo Mulk Ka Ghaddar Hay.
Mardan Main Jalsay Se Khitab Main Un Ka Kehna Tha Ke Allah Ne Achai Burai Main Neutral Honay Ki Ijazat Nahi Di. Apnay Bachon Se Puchen Kiya Nawaz Sharif Aur Asif Zardari Imandar Hain? 2 Khandan Mulk Ko 30 Saal Se Loot Rahe Hain. Apne Dil Par Haath Rakh Kar Batayen Ke Kiya Ye 2 Khandan Imandar Hain?
Imran Khan Ne Kaha Ke Ye Log Mulk Se Paisa Chori Kar Ke Bahar le Ja Rahay Thay, Is Liye Siyasat Main Aaya. In Ki Chori Par Kitaben Likhi Hui Hain, Filmen Bani Huui Hain. Main Challenge Karta Hun Ke Kisi Wazir-e-Azam Ne Itna Paisa Nahi Bachaya Jitna Main Ne Wazir-e-Azam Ke Taur Per Bachaya. Agar Mujh Per Muqadmat Banaye Gaye Aur Jail Main Dala Gaya Tou Aur Zor Se Muqabla Karun Ga.
Sabiq Wazir-e-Azam Imran Khan Ne Kaha Ke Har Roz Mujh Per FIR Kati Jati Hain, Har Roz Zamanat Ke Liye Adalat Jata Hun, Main Kiun Nahi Bahar Jata. Agar Main Corrupt Hota Tou Nawaz Sharif Ki Tarha Dum Daba Kar Bahar Bhag Jata.
Imran Khan Ka Kehna Tha Ke Shahbaz Gil Ke Baad Azam Swati Per Bhi Barhana Kar Ke Tashadud Kiya Gaya. Tamam Idaron Se Kehta Hun Ke Ghalat Fehmi Main Na Rahen Ke Tashadud Kar Ke Izzat Kara Lain Gay.
Unhon Ne Mazeed Kaha Ke Swat Aur Qabaili Elaqon Main Garbar Ki Zimmedar Wifaqi Hukumat Hay. Sarhaden Wifaq Ke Control Main Hain, Un Elaqon Main Dehshatgardon Ko Kiun Aanay Dia Ja Raha Hay?