Hum To #IftiMania Ka Intezar Kar Rahay Thay Par Ye To #AzamMania Aa Gaya! 42 Balls Par 97 Runs Ki Innings Aur Us Mein Lagaey Gaey 8 Sixes, Uff! QG v IU Match Mein To Goya Aag Lag Gai. Bus Last Ball Par Anti-Climax Ho Gaya, Jis Par Azam Khan Ko Apni Pehli PSL Hundred Kay Liay Sirf 3 Runs Ki Zarurat Thi Laikin Wo Usi Ball Par Clean Bowled Ho Gaey.

Khair, Ye Toofani Innings Islamabad United Ko Is Season Kay Sab Say Baray Total 220 Tak Puhancha Dia. Jo Quetta Kay Liay Kafi Say Zyada Tha.

Pakistan Super League 2023

Quetta Gladiators vs Islamabad United

24 February 2023

National Stadium, Karachi, Pakistan

Result: Islamabad 63 Runs Say Jeet Gaya

🟥 IU220-6
Azam Khan97 (42)
Asif Ali42 (24)
QG BowlingOMRW
Odean Smith40412
Mohammad Hasnain40522
🟪 QG(T:221)157
Mohammad Hafeez48 (26)
Sarfaraz Ahmed41 (36)
IU BowlingOMRW
Fazalhaq Farooqi3.10283
Hasan Ali41393

Azam Khan Ki Is Innings Ki Khaas Baat Ye Thi Ke Ye Buhat Crucial Stage Par Kheli Gai. Islamabad United Nay Toss Jeet Kar Pehlay Ki Laikin Last Match Kay Heroes Rahmanullah Gurbaz Aur Rassie Van Der Dussen Donon Shuru Mein Hi Out Ho Gaey, Balke Powerplay Guzartay Hi Captain Shadab Khan Ki Wicket Bhi Chali Gai. Aur Jab Aadhi Innings Yani 10 Overs Ka Khel Mukammal Hua To Score Board Par Sirf 71 Runs Thay.

AA Battery

Yahan Par Quetta Kay Bowlers ‘AA’ Yani Azam Khan Aur Asif Ali Kay Hathay Charh Gaey. Donon Nay Innings Ko Aisay Par Lagaey Ke Score Aasman Tak Ja Puhancha. Last 10 Overs Mein Islamabad Nay 143 Runs Ka Izafa Kia Jis Mein Aakhri 5 Overs Mein Banaey Gaey 92 Runs Bhi Shamil Thay. Andaza Laga Lain Ke Kaisi Khaufnaak Hitting Hui Hogi. Donon Nay 45 Balls Par 98 Runs Ki Partnership Ki.

Azam Went Ballistic

Azam Nay Sirf 29 Balls Par 50 Ki Aur Phir Next Next 13 Balls Par Score Ko 97 Tak Lay Gaey. Mohammad Hasnain Kay Against To He Went Ballistic. 19th Over Mein Azam Nay Hasnain Ko Consecutive 3 Sixes Lagaey, Jin Main Last Six To Aisa Tha Ke Aik Baar Dekho, Baar Baar Dekho, Hazaar Baar Dekho!

Anti-Climax

Last Over Shuru Hua To Azam Khan 87 Runs Par Khel Rahay Thay. Yahan Faheem Ashraf Nay First Three Balls Khel Leen, Balke Un Par Aik Six Aur Aik Four Bhi Lagay. Ab Azam Ko Hundred Kay Liay 3 Balls Par 13 Runs Bananay Thay. Unhon Nay Aik Six Lagaya, Next Ball Par Four Mila Aur Aakhri Gaind Par Sirf 3 Runs Reh Gaey. Poora Ground Hundred Ka Mutazir Tha Ke Odean Smith Ki Slow Delivery Ko Azam Misjudge Kar Gaey. Un Kay Clean Bowled Kay Sath Lakhon Dil Toot Gaey!

Worst Reply

221 Runs Ka Target To PSL Ki History Mein Kabhi Chase Nahi Hua, To Quetta Kahan Say Karta? Wo To Itnay Baray Target Kay Bhoj Talay Hi Dab Gaya. Powerplay Meni Hi Martin Guptill, Will Smeed Aur Jason Roy Out Ho Gaey. Us Kay Baad Bhala Kya Reh Gaya Tha?

Mohammad Hafeez Aur Sarfaraz Ahmed Nay Situation Control Karnay Ki Koshish Ki Laikin Quetta Ko Kisi Phenomenal Performance Ki Zarurat Thi Jo Koi Nahi Dikha Saka. Hafeez 26 Balls Par 48 Runs Bana Kar Out Huay Aur Sarfaraz 36 Balls Par41 Runs Kay Sath. Baad Mein Iftikhar Ahmed Nay 27 Balls Par 39 Runs Banaey Aur Ye Sub Mil Kar Bhi Gladiators Ko 157 Runs Say Aagay Nahi Lay Ja Sakay. Team Last Over Ki First Ball Par All Out Ho Gai. Last 6 Wickets Sirf 30 Runs Kay Izafay Say Gireen.

Ye Is Season Mein Quetta Ki Consecutive Third Aur 5 Matches Mein 4th Defeat Hay. Jis Kay Baad Ab Gladiators Kay Paas Ghalti Ki Koi Gunjaish Nahi. Unhain Ab Extraordinary Performance Dena Hogi Warna Is Season Mein Bhi Last Number Par Aayen Gay.

Pakistan Super League Points Table

24 February 2023

MWLPTNRR
🟦 MS54181.722
🟥 IU43161.049
🟩 LQ3214-0.050
🟨 PZ4224-1.137
🟦 KK51420.364
🟪 QG5142-1.977
شیئر

جواب لکھیں