Ye Islamabad United Ka Hasan Ali Ko Khilanay Ka Faisla Tha Ya Ye Babar Azam Ka Brain Fade Tha Jis Nay Peshawar Zalmi Ko Jeet Say Door Kardia. PZ v IU Aik Buhat Important Match Mein Islamabad United Nay Babar Ki Peshawar Zalmi Ko 6 Wickets Say Buri Tarah Shikast Di Hay, Is Tarah Ke 31 Balls Ka Khel Abhi Baqi Tha.
National Stadium Karachi Mein Honay Walay Match Mein Toss Jeeta Islamabad United Nay Laikin Us Say Bhi Pehlay 2 Aisay Faislay Kiay, Jo Game Changing Sabit Huay. Mohammad Wasim Ki Jaga Hasan Ali Ko Bulanay Aur Paul Stirling Ko Replace Kar Kay Rahmanullah Gurbaz Ko Lanay Ka, Kyunke Aaj Kay Match Winner Yahi Donon Thay.
Pakistan Super League 2023
Peshawar Zalmi vs Islamabad United
23 February 2023
National Stadium, Karachi, Pakistan
Result: Islamabad 6 Wickets Say Jeet Gaya
| 🟨 PZ | 156-8 | |
|---|---|---|
| Babar Azam | 75 (58) | |
| Mohammad Haris | 40 (21) |
| IU Bowling | O | M | R | W |
|---|---|---|---|---|
| Hasan Ali | 4 | 0 | 35 | 1 |
| Mubasir Khan | 1 | 0 | 5 | 1 |
| 🟥 IU | (T:157) | 159-4 |
|---|---|---|
| Rahmanullah Gurbaz | 62 (31) | |
| Rassie van der Dussen | 42 (29) |
| PZ Bowling | O | M | R | W |
|---|---|---|---|---|
| James Neesham | 2 | 0 | 21 | 1 |
| Arshad Iqbal | 3.5 | 0 | 38 | 1 |
Heroic Hasan
Hasan Ali Nay PSL 2023 Mein Apna Pehla Over Phenka Aur 17 Runs Kha Gaey. Lag Raha Tha Aaj Wo United Ki Bowling Line Ka Weak Link Sabit Hongay. Laikin Hasan Ali Wapis Aaey, Aur Is Tarah Aaey Ke Tarzan Ki Bhi Kya Wapsi Hogi! Unhon Nay Aik Hi Over Mein Tom Kohler-Cadmore Aur Rovman Powell Ko Clean Bowled Kia Aur Phir Next Over Mein Jimmy Neesham Ko Out Kar Kay Zalmi Ki Kamar Hi Torr Di. Is Bowling Spell Nay Un Kay Kai Critics Kay Moun Band Kar Diay Hain.
Aur Ye Sub Hasan Nay Us Waqt Kia Jab Peshawar First 7 Overs Mein 76 Runs Bana Chuka Tha, Wo Bhi Baghair Koi Wicket Diay. Tab Shadab Khan Nay Mohammad Haris Ko Out Kia Aur Phir Mubasir Khan Nay Apnay Only Over Mein Saim Ayub Ko Aik Aur Nakaam Din Dikha Dia. Phir Hasan Ali Aaey, Aur Game Hi Palat Dia.
PZ v IU: 76-0 Say 99-5 Tak
Hasan Ali Kay Tabahi Spell Ki Waja Say Peshawar 76-0 Say 99-5 Tak Puhanch Gaya Aur Phir Sar Nahi Utha Saka. Captain Babar Azam Aik End Par Kharay To Thay Laikin Kharay Hi Reh Gaey. Wo Babar Jinhon Nay 33 Balls Par Fifty Complete Ki Thi, Un Ka Bat Aisa Khamosh Hua Ke Next 25 Balls Par 25 Runs Hi Bana Saka. 14th Over Mein Aik Four Laganay Kay Baad Babar Next 6 Overs Mein 18 Balls Khel Kar Bhi Aik Boundary Tak Nahi Laga Sakay.
Impressive Start, Horrible End
Innings Kay First 5 Overs Mein 61 Runs Bananay Wala Peshawar Last 5 Overs Mein Sirf 31 Runs Score Kar Saka. Babar 58 Balls Par 75 Runs Bana Kar Maidan Say Wapis Aaey. Wo Khud Bhi Buhat Mayoos Nazar Aaey, Jatay Huay Bat Bhi Phenka Aur Pair Patakhtay Huay Maidan Say Bahar Aaey.
Gusty Gurbaz
157 Runs Chase Kartay Huay Islamabad Ka Start Hi Toofani Tha. Colin Munro Ko To Jald Bazi Lay Doobi Laikin Rahmanullah Gurbaz Aur Rassie Van Der Dussen Match Ko Peshawar Ki Puhanch Say Buhat Door Lay Gaey. Powerplay Mein Hi 80 Runs Ban Chukay Thay, Yani Taqreeban Aadha Target To 6 Overs Hi Mein Poora Ho Gaya.
Gurbaz Lucky Bhi Rahay, Unhain Kuch Chances Milay Aur Unhon Nay Is Ka Poora Poora Faida Bhi Uthaya. Un Ki 31 Balls Par 62 Runs Ki Innings Mein 4 Sixes Aur 7 Fours Shamil Thay. Doosray End Say Van Der Dussen Bhi Acha Khelay Jinhon Nay 29 Balls Par 42 Runs Banaey. Aur Phir Finishing Touch Dia Asif Ali Kay 13 Balls Par 29 Runs Nay.
Points Table Aur Next Matches
Jis Muqablay Say Umeed Thi Kay Last Ball Aur Last Player Tak Jaey Ga, Us Mein United Nay 15th Over Mein Hi Target Poora Kar Dia. Is Jeet Nay Islamabad United Ko Points Table Par 2nd Position Day Di Hay, Laikin Usay Aagay Aur Mehnat Karna Hogi Kyunke Us Kay Next Matches Mein On-Paper Aik Mazboot Team Quetta Gladiators Say, Jo Is Waqt Zakhmi Sher Ban Chuki Hay Aur Phir Defending Champion Lahore Qalandars Say Bhi Khelna Hoga.
Doosri Taraf Peshawar Zalmi Hay, Jo 2 Matches Jeeta Aur 2 Hi Haara Hay Laikin Pareshani Ki Baat Hay Us Ka Net Run Rate Jo Is Waqt Buhat Kam Hay. Usay Lahore Aur Karachi Kay Khilaf Apnay Next Matches Mein Buhat Kuch Karna Hoga.
Pakistan Super League Points Table
23 February 2023
| M | W | L | PT | NRR | |
|---|---|---|---|---|---|
| 🟦 MS | 5 | 4 | 1 | 8 | 1.722 |
| 🟥 IU | 3 | 2 | 1 | 4 | 0.284 |
| 🟩 LQ | 3 | 2 | 1 | 4 | -0.050 |
| 🟨 PZ | 4 | 2 | 2 | 4 | -1.137 |
| 🟦 KK | 5 | 1 | 4 | 2 | 0.364 |
| 🟪 QG | 4 | 1 | 3 | 2 | -1.635 |