Aik Aur Match Aur Babar Azam Phir Ho Gaey Stumped! New Zealand Kay Against One Day Series Kay Teesray Match Mein ‘Kaptaan’ 13 Balls Par Sirf 4 Runs Bana Kar Out Ho Gaey. Jab Michael Bracewell Ki Ball Par Tom Latham Nay Unhain Stumped Kia To Ye Consecutive Third Match Tha Ke Jis Mein Babar Is Tarah Out Huay. Is Series Say Pehlay Wo 238 Innings Mein Sirf 1 Baar Stumped Huay Thay, Laikin Lagta Hay Karachi Unhain Raas Nahi Aaya.
Pakistan New Zealand Cricket Series Kay First Match Mein Jab Pakistan 256 Runs Chase Kar Raha Tha. Babar 81 Balls Par 66 Runs Bananay Kay Bad Innings Ki Raftar Barhanay Kay Chakkar Mein Aagay Barh Kar Khelay Aur Tom Latham Ka Glovework Apna Kaam Kar Gaya. Pakistan Match To Jeeta Laikin Babar Ki Burai Waheen Say Shuru Ho Gai.
2nd ODI Mein Babar Aik Aur Slow Innings Khel Rahay Thay. 114 Balls Par 79 Runs Bana Kar Wo Buhat Controversial Andaz Mein Out Huay. Taqreeban Waisay Hi Jaisay New Zealand Kay Against 2nd Test Mein Sarfaraz Ahmed Huay Thay. Khair, Babar Ki Innings Nay To Phansaya Hi, Un Kay Baad To Pakistan Ka Chase Hi Derail Ho Gaya.
Ab 3rd Aur Decisive ODI Dekhain, Is Mein To Hadd Hi Ho Gai. Babar Sirf 4 Runs Bananay Kay Baad Aik Baar Phir Bracewell Ki Ball Par Stumped Huay. Wo Aagay Barh Kar Khelay Aur Phir Aagay Hi Barh Gaey. Babar Samajh Rahay Thay Ke Ball Turn Ho Kar Un Kay Ballay Par Aaey Gi, Laikin Wo To Seedhi Hi Nikal Gai Aur Kaptaan Dekhtay Hi Reh Gaey!
Najanay Kyun Aisa Lag Raha Hay Ke Babar Spin Read Nahi Kar Pa Rahay. Musalsal 3 Matches Mein Un Ka Youn Stumped Hona Buhat Tashweesh Ki Baat Hay. Phir Consecutive 5 Innings Mein 50+ Scores Kay Baad Is Tarah Out Hona Buhat Say Sawalaat Utha Raha Hay.
Babar Azam Ki Last 10 ODI Innings
| Runs | BF | 4s | 6s | Against | Host | Date |
|---|---|---|---|---|---|---|
| 105* | 115 | 12 | 0 |  AUS | Lahore | 2 Apr '22 |
| 103 | 107 | 9 | 0 |  WI | Multan | 8 Jun '22 |
| 77 | 93 | 5 | 1 | WI | Multan | 10 Jun '22 |
| 1 | 3 | 0 | 0 | WI | Multan | 12 Jun '22 |
| 74 | 85 | 6 | 1 |  NED | Rotterdam | 16 Aug '22 |
| 57 | 65 | 7 | 0 | NED | Rotterdam | 18 Aug '22 |
| 91 | 125 | 7 | 2 | NED | Rotterdam | 21 Aug '22 |
| 66 | 82 | 5 | 1 |  NZ | Karachi | 9 Jan '23 |
| 79 | 114 | 8 | 1 | NZ | Karachi | 11 Jan '23 |
| 4 | 4 | 1 | 0 | NZ | Karachi | 13 Jan '23 |
Waisay Babar Ka Spinners Kay Khilaf Record Itna Bura Nahi Hay. ODIs Mein Dekhain To Pata Chalta Hay Ke Babar Nay 81 Dismissals Mein 53 Baar Pace Bowlers Ko Wicket Di Aur 25 Baar Spinners Ko. T20s Mein Bhi Wo 51 Baar Pacers Kay Haathon Out Huay Aur 24 Baar Spinners Ki Ball Par.
To Kya Ye Aik Ittefaq Hay? Ya Bowlers Nay Waqai Babar Ki Kamzori Pakar Li Hay? Ye To Aanay Wala Waqt Hi Bataey Ga.