England Aur Pakistan Ka First Test Bus Shuru Honay Hi Wala Tha, Leikin Sirf 1 Din Pehlay England Cricket Team Beemar Parr Gai Hay Aur Kaha Ja Raha Hay Ke Match Ko 24 Hours Kay Liay Postpone Kardia Jaey. Laikin Kyun? Kyunke English Squad Kay 13-14 Members Wednesday Ko Achanak Beemar Par Gaey Hain. Pak-England Rawalpindi Test Say Sirf 1 Din Pehlay.
Hua Kya Hay?
17 Saal Baad Pakistan Kay Historic Tour Par Aanay Wali Mehman Team Kay Players Ko Na Covid Hua Hay Aur Na Hi Food Poisoning, Balkay Ye Koi Virus Ya Bug Hay, Jis Say Players Ko Vomiting Aur Diarrhea Ki Shikayat Ho Gai Hay.
Dilchasp Baat Ye Hay Ke English Team Nay Khanay Kay Ma’mlay Mein Buhat Ehtiyat Ki Thi Aur Apnay Sath Famous Chef Omar Meziane Ko Lay Kar Pakistan Aaey Thay. Laikin Yahan Aa Kar To Omar Bhi Beemar Par Gaey Hain.
England Pehlay Hi Mark Wood Kay Zakhmi Honay Ki Waja Say Pareshan Tha, Ab Ye Virus Aa Gaya Hay Aur Lagta Hay Team Ko Aur Museebat Mein Daal Day Ga.
English Team Hay Kahan?
England Cricket Team Is Waqt Islamabad Kay Serena Hotal Mein Reh Rahi Hay. Jahan Pakistani Team Bhi Muqeem Hay.
Ab Kya Hoga?
England Nay Pakistan Say Request Ki Hay Ke Rawalpindi Test Ko 1 Din Kay Liay Postpone Kardia Jaey. Is Waqt Donon Boards Ki Baat-Cheet Chal Rahi Hay Aur Lagta Hay Match 2 December Say Shuru Hoga.
Kya Aisa Pehli Baar Hua Hay?
Nahi! 2019 Mein England Cricket Team South Africa Kay Tour Par Gai Thi. Centurion Mein Pehla Test Khela Gaya, Jis Say Pehlay English Squad Isi Tarah Beemar Par Gaya. Match Mein Hi Kai Players Ko Toilet Istemal Karnay Kay Liay Baar Baar Off The Field Jatay Dekha Gayaj. England Pehli Innings Mein Sirf 181 Par All-Out Hua Aur Phir 376 Runs Chase Kartay Huay 107 Runs Say Haar Gaya. Phir Joe Root To 2018 Mein Bhi Australia Kay Tour Par Beemar Huay Thay.
Is Liay England Ko Darr Hoga Ke Kaheen Pindi Mein Bhi Centurion Wali Kahani Repeat Na Ho Jaey.