Qatar Kay Baad Canada FIFA World Cup 2022 Say Bahar Honay Wali Doosri Team Ban Gaya Hay. Laikin Us Say Pehlay History Zaroor Bana Di. Croatia Kay Khilaf Match Mein Alphonso Davies Nay 67 Seconds Mein Hi Goal Score Kar Dia. Ye Is FIFA World Cup Ka Fastest Goal Tha.
Canada Nay 1986 Kay Mexico World Cup Kay Baad Pehli Baar FIFA World Cup Khela. Laikin Belgium Kay Khilaf Jaan Laranay Aur Phir Croatia Kay Against Start Hi Mein Lead Milnay Kay Bawujood Canada Jeet Nahi Saka. Croatia Nay Zabardast Comeback Kia Aur Ye Match 4-1 Say Jeeta.
Khair, Canada Nay FIFA World Cup History Mein Apna Pehla Goal To Score Kia. Laikin Sawal Ye Paida Hota Hay Ke Kya Ye FIFA World Cup Ka Fastest Goal Tha? Shayad Aap Surprise Hon Ke Ye To History Kay Top 10 Fastest Goals Mein Bhi Shamil Nahi.
Ye Record Turkey Kay Striker Hakan Sukur Kay Paas Hay. Unhon Hain FIFA World Cup 2002 Mein Mezban South Korea Kay Khilaf 11 Seconds Mein Hi Goal Kar Dia Tha. Sukur Nay Korean Defender Ki Mistake Ka Poora Faida Uthaya Tha, Aur Jab Ball Opponent Kay Net Mein Puhanchi To Sirf 11 Seconds Huay Thay.
Is List Mein to Top 5 Fastest Goals Sab 30 Seconds Kay Andar Kiay Gaey.
Sukur Kay Baad Czechoslovakia Kay Vaclav Masek Ka Naam Aata Hay. FIFA World Cup 1962 Mein Unhon Nay Mexico Kay Khilaf 15 Seconds Mein Goal Kar Dia Tha.
3rd Number Par Hain Germany Kay Ernest Lehner. 1934 Mein Khelay Gaey 2nd FIFA World Cup Mein Unhon Nay Austria Kay Against Match Mein 24 Seconds Mein Goal Daagh Dia Tha.
Top 5 Mein England Kay Bryan Robson Ka 1982 World Cup Mein 28 Seconds Mein Aur 2014 Mein US Player Clint Dempsey Ka Ghana Kay Against 30 Seconds Mein Score Kiay Gaey Goals Shamil Hain.
FIFA World Cup History Kay Fastest Goals
| No. | Player | Country | Vs. | Year | Time |
|---|---|---|---|---|---|
| 1 | Hakan Sukur | Turkey | South Korea | 2002 | 0:11 |
| 2 | Vaclav Masek | Czechoslovakia | Mexico | 1962 | 0:15 |
| 3 | Ernest Lehner | Germany | Austria | 1934 | 0:25 |
| 4 | Bryan Robson | England | France | 1982 | 0:28 |
| 5 | Clint Dempsey | USA | Ghana | 2014 | 0:30 |
| 6 | Bernard Lacombe | France | Italy | 1978 | 0:31 |
| 7 | Arne Nyberg | Sweden | Hungary | 1938 | 0:35 |
| 7 | Emile Veinante | France | Belgium | 1938 | 0:35 |
| 8 | Adalbert Desu | Romania | Peru | 1930 | 0:50 |
| 8 | Seung Zin Pak | North Korea | Portugal | 1966 | 0:50 |
| 9 | Celso Ayala | Paraguay | Nigeria | 1998 | 0:52 |
| 10 | Mathias Jorgensen | Denmark | Croatia | 2018 | 0:55 |
Kisi World Cup Final Mein Kia Gaya Quickest Goal Netherlands Kay Johan Neeskens Ka Hay. Unhon Nay 90 Seconds Mein Penalty Par Score Kia Tha. Laikin Hairat Ki Baat Ye Ke Shuroo Mein Hi Lead Mil Janay Kay Bawujood Netherlands World Cup Nahi Jeet Saka Tha. Balkay Us Kay Baad 1978 Aur 2010 Mein Bhi Final Haara Aur Kabhi Champion Nahi Ban Saka.