Asia Cup Mein Achhi Performance Aur Phir New Zealand Tri-Series Jeetnay Ki Waja Say T20 World Cup Mein Pakistan Say Buhat Expectations Theen. Laikin Start Utna Hi Horrible Raha. India Say Haara Aur Phir Zimbabwe Kay Hathon Shocking Defeat Khai.
Ab Pakistan Ki Semi-Final Mein Jaga Bhi Buhat Mushkil Nazar Aa Rahi Hay. Team Pakistan Ki Sari Tareef Tanqeed Mein Badal Chuki Hay. Har Taraf Say Babar Azam Aur Team Management Par Criticism Ho Raha Hay. Sarhad Paar Say Bhi.
India Kay Former Captain Sunil Gavaskar Bhi Pakistan Ki Team Selection Par Tanqeed Kar Rahay Hain. Kehtay Hain India Kay Against Pakistan Ka 2 Spinners Khilana Samajh Nahi Aaya.
“Pakistan Ka Middle Order Settled Nahi. Fakhar Zaman Final Xi Mein Shamil Nahi. Shan Masood Runs To Bana Rahay Hain, Laikin Mein Unhain Achhi Selection Nahi Samajhta.”
Gavaskar Nay Mazeed Kaha Ke Pakistan Nay India Kay Khilaf Match Mein Mohammad Wasim Junior Ka Istamal Nahi Kia. Australia Ki Conditions Mein Mohammad Wasim Jaisay Seam-Up Bowlers Zyada Kaam Aatay Hain.
“Wo Hardik Pandya Jaisa Player Hay, Jo Kuchh Achhay Over Kara Sakta Hay Aur Shot Bhi Mar Sakta Hay. Laikin Usay Khilaya Nahi.”
Wasim Nay Zimbabwe Walay Match Mein 24 Runs Day Kar 4 Wickets Li Thee Aur 2 Boundaries Kay Sath 13 Runs Bhi Banaey Thay.
Pakistan Ab Agla Match Sunday 30th October Ko Netherlands Kay Khilaf Khelay Ga. Is Match Mein Hi Nahi Balke Is Kay Baad Next Donon Matches Mein Bhi Jeet Lazmi Hay.