Bowling Action, Cricket Ki Ye Terminology Suntay Hi Hamaray Dimagh Mein Aik Hi Naam Aata Hay: Shoaib Akhtar. Aaj Ki Fast & Furious Cricket Mein Jitni Lambi Boundaries Hain, Us Say Bhi Lamba To ‘Rawalpindi Express’ Ka Run Up Hota Tha. Phir Aik Smooth And Sharp Bowling Action, Jis Kay Baad Aata Aik Deadly Yorker Ya Tabahi Bouncer! Soch Kar Hi Rongtay Kharay Ho Rahay Hain.
Ho Sakta Hay Aap Kay Aur Meray Khayal Mein Sab Say Khubsurat Bowling Action Yahi Ho, Laikin Aur Bhi Bowlers Thay Jin Kay Bowling Action Dekhnay Laiq Thay, Laikain Hamara Sawal Ye Nahi. Kam-Az-Kam Aaj 20 January Kay Din To Ye Sawal Banta Bhi Nahi, Kyunke Aaj Us Bowler Ka Janam Din Hay Jis Kay Bowling Action Ko Kaheen Say Bhi Khubsurat Nahi Keh Saktay, Hum Baat Kar Rahay Hain Paul Adams Ki. Aik Aisay Bowler Jin Kay Bowling Action Nay Unhain Dunya Mein Mash’hoor, Ya Badnaam, Kia.
Adams Nay 1995 Say 2004 Kay Beech South Africa Kay Liay 45 Test Aur 24 One Day International Matches Khelay, Jin Mein Unhon Nay Total 163 Wickets Leen. Laikin Is Mein Un Ki Spin Ka ‘Jadu’ Kam Aur Ugliest Bowling Action Ka ‘Chamatkaar’ Zyada Tha.
Paul Adams: Bowling Career
| Format | Mat | Wkts | BBM | Ave. | 5w |
|---|---|---|---|---|---|
| Test | 45 | 134 | 10/106 | 32.87 | 4 |
| ODI | 24 | 29 | 3/26 | 28.10 | 0 |
Waisay Aik Mazedar Baat Ye Hay Ke Paul Adams Ka Nickname “Gogga” Tha. Yaqeen Karain, Wo Pakistan Mein Hotay To Is Bowling Action Par Unhain “Gogga” Hi Kaha Jata۔ 🤭
Khair, To “Gogga” Nay Career Kay Start Mein Bari Wickets Leen. Aik Aam Bowler To Ball Release Honay Tak Batsman Say Nazar Nahi Hatata, Laikin Adams Kisi Aur Hi Khet Ki Mooli Thay, Wo To Bowling Stride Mein Jatay Hi Batsman Say Nazrein Chura Laitay Thay. Aisay Ke Bowl Phenktay Waqt Un Ki Aankhein Kaheen Aur Hoti Theen.
Pehli Baar Is Bowling Action Ka Saamna Karnay Wala To Ghabra Jata Thay Ke “Ya Allah! Ye Kaun Si Bala Aa Gai?” Aur Phir Spin Hoti Hui Ball Par Apni Wicket Day Kar Chala Jata. Laikin Aahista Aahista Ye Khauf Kam Hota Gaya. Yahan Tak Ke Apnay Career Kay Last Year Mein Paul Adams Nay 2 Test Matches Mein 146 Kay Average Say Sirf 2 Wickets Leen Aur ODIs Mein Bhi 37 Say Zyada Ka Average Say Sirf 6 Shikar Hi Kar Sakay. Yahi Waja Hay Ke Hamesha Kay Liay Bahar Ho Gaey, Sirf 27 Saal Ki Umar Mein.
Khair, Ugliest Bowling Action Rakhnay Walon Mein Aur Bhi Naam Hain, Jin Ka Zikar Phir Kabhi.