Aik Taraf Government Hay Jo Economy Ko Bachanay Kay Liay Desperate Measures Utha Rahi Hay To Doosri Janib Pakistan Cricket Board Kay Halaat Bhi Mukhtalif Nahi. Test Kay Baad New Zealand Kay Against ODI Series Kay Liay Team Selection Mein Yahi Desperation Saaf Nazar Aa Rahi Hay.
New Setup Nay Aatay Hi Aisay “Toofani Iqdamaat” Uthaey, Jaisay Sub Kuch Badal Jaey Ga. Badla To Kuch Nahi Laikin Policy Ka “Aik Qadam Aagay, 2 Qadam Peechay” Jana Zarur Samnay Aa Gaya Hay.
Lala Ka U-Turn
Chief Selector Shahid Afridi Nay New Zealand Kay Khilaf 3 ODI Matches Kay Liay 16-Player Squad Ka Ailan Kardia Hay, Jis Mein Wo Bhi Hain Jo 22 Probables Mein Bhi Nahi Thay. Phir Wo Nahi Hain, Jin Ki Wapsi Tarzan Ki Tarah Hui Thi. Jee Haan! Sharjeel Khan Final Squad Mein Nahi Hain, Aur Fakhar Zaman Aa Gaey Hain. Yani Lala Ka 'U-TURN'.
Yahi Nahi, Squad Mein Haris Sohail Bhi Shamil Hain, Jinhain Pakistan Kay Liay Last ODI Khelay Huay 2 Saal Say Zyada Ho Chukay Hain. Haris Ko Quaid-E-Azam Trophy Aur Pakistan Cup Ki Umda Performance Ki Waja Say Bulaya Gaya Hay.
Decisive Factor: Social Media
Aisa Lag Raha Hay Economy Say Cricket Tak Sab Kuch Social Media Trends Par Chal Raha Hay. Pehlay Test Series Kay Liay Sarfraz Ahmed Aur Mir Hamza Kay Haq Mein Campaign Chali To Foran Unhain Bula Lia Gaya, Aur Ab Fakhar, Jo Probables Mein Hi Nahi Thay, Un Ko Shamil Na Karnay Par Social Media Par Zara Si Tanqeed Kya Hui, Lala Ki Committee Dhair Ho Gai.
Aik Achi Baat
Laikin, Is Squad Ki Achi Baat Ye Hay Ke Is Mein Pakistan Cup Kay Top Performers Shamil Hain.
National One-Day Tournament Mein Sub Say Zyada Runs Bananay Walay Batsman Tayyab Tahir Kay Ilawa Best Bowler Usama Mir Bhi Bula Liay Gaey Hain. Tayyab Nay Ki Is Tournament Mein 1 Century, 5 Fifties Aur Most Runs Unhain National Team Tak Lay Aaey Hain. Un Kay Ilawa 6 Innings Mein 435 Runs Bananay Walay Kamran Ghulam Bhi Qaumi Team Main Hain.
Pakistan Cup 2022-23 Kay Top Scorers
| Inns | Runs | HS | Ave. | SR | 50+ | |
|---|---|---|---|---|---|---|
| Tayyab Tahir | 12 | 573 | 139 | 47.75 | 99.65 | 6 |
| Haseebullah Khan | 12 | 551 | 123 | 45.91 | 89.59 | 5 |
| Saim Ayub | 10 | 461 | 102 | 46.10 | 107.20 | 4 |
| Kamran Ghulam | 6 | 435 | 123* | 145.00 | 101.16 | 4 |
| Imran Butt | 12 | 426 | 83 | 38.72 | 84.18 | 4 |
To Naujawan Performers Ko Laina Acha Hay, Laikin Yahi Karna Tha To Pehlay 22-Members Squad Ka Ailan Karnay Ki Zarurat Kyat Thi? Keh Daitay Ke Team Ka Ailan Pakistan Cup Kay Baad Hoga. Laikin, Stunts Bhi Aik Cheez Hotay Hain.
Rauf Fit To Shadab Zakhmi
Khair, Team Mein Mohammad Rizwan Aur Haris Rauf Bhi Shamil Hain, Jo Abhi Test Series Nahi Khel Rahay. Haris To Zakhmi Thay Laikin Sarfaraz Ko Test Khilanay Kya Liay Out-Of-Form Rizwan Ko Bahar Bithaya Gaya Tha. Laikin, Shaheen Afridi Ab Bhi Fit Nahi Huay, Phir Shadab Khan Bhi Big Bash League Mein Zakhmi Ho Gaey Hain, Jo Pakistan Kay Liay Aik Bara Dhachka Hoga.
Pak-New Zealand ODI Series 9th January Say Shuru Hogi Aur Last One Day International 13th January Ko Khel Jaey Ga. Tamam Matches Karachi Kay National Stadium Mein Hon Gay.
Pakistan vs New Zealand ODI Series 2023 Kay Liay Pakistan Ka 16-Player Squad:
Babar Azam (Captain), Fakhar Zaman, Haris Rauf, Haris Sohail, Imam-ul-Haq, Kamran Ghulam, Mohammad Hasnain, Mohammad Nawaz, Mohammad Rizwan, Mohammad Wasim, Naseem Shah, Salman Ali Agha, Shahnawaz Dahani, Shan Masood, Tayyab Tahir Aur Usama Mir.