Influence Har Qisam Ka Hota Hay. Famous Magazine Financial Times Har Saal Apna Women Of The Year Issue Jari Karta Hay Aur Is Saal Is Nay Dunya Ki Most Influential Women Ki List Jari Ki Hay. Is Mein 3 Categories Banai Gai Hain: Leaders, Heroes Aur Creators.
Sab Say Pehlay Hain Dunya Ki Khwateen Leaders Ki, Jin Main Pakistan Ki Climate Change Ki Minister Sherry Rehman Bhi Shamil Hain.
Influential Leaders
Oleksandra Matviychuk
Wakeel, Ukraine Main Jangi Jaraim Kay Khilaaf Aik Buland Awaaz
Oleksandra Aur Un Ki Company Nay Russia Ki Taraf Say Ukraine Main Honay Walay 27,000 Jangi Jaraim Record Kiye. In Ki Organization Ko Nobel Prize Bhi Mila. Unhain Modern World Ka Hero Bhi Kaha Jata Hay.
Ketanji Brown Jackson
US Supreme Court Main Pehli Black Judge
Ketanji America Ki 230 Sala Tareekh Main Supreme Court Ki Judge Ban’nay wali Pehli Black Khatoon Hain. Wo US Aur Pori Dunya Main Rehnay wali Khwateen Kay Liye Aik Misaal Bhi Hain.
Francesca Bellettini
2013 Yves Saint Laurent Ki CEO
Dunya Kay Aik Baray Fashion Brand Saint Laurent Ko Pichlay Taqreeban 10 Baras Say Chalanay Wali Khatoon Hain. Jo Fashion Trends Say Lay Kar Company Kay Stock Tak, Har Cheez par Nazar Rakhti Hain.
Jane Fraser
Citigroup Ki CEO
Jane Fraser 2021 Main Dunya Kay Baray Banks Main Say Aik CITI Bank Ki CEO Baneen. Unhon Nay Management Ko Naya Style Dia. Wo Pink Suits And Pholon walay Libaas Pehnti Hain. Un Kay Mutabiq Narmi Say Baat Karna Kamzori Nahi Balkay Aik Competitive Edge Hay.
Karen Lynch
CVS Health Ki CEO
America Ki Sab Say Bari Healthcare Company Ki CEO, Jinhon Nay Aik Mareez, Aik Care Karnay Wali Khatoon Kay Taur Par Company Chalanay Ka Faisla Kia Aur Mulk Main Healthcare Ko Nai Shakal Day Di.
Sanna Marin
Finland Ki Wazeer-e-Azaam
Dunya Ki Youngest Muntakhib Wazeer-e-Azam Sanna Marin Nay Jab Ye Uhda Sanbhala To In Ki Age 34 Years Thi. Wo Is Say Pehlay Transport Minister Rah Chuki Hain. Sanna Marin Apni Zati Zindagi Aur Prime Ministership Ko Buhat Achay Tareeqay Say Chala Rahi Hain.
Francia Elena Márquez Mina
Colombia Ki Naib Saddar
Junubi America Kay Mulk Colombia Ki Naib Sadar Francia Elena Márquez Mina Chahti Hain Kay Unko Pooray Naam Say Pukara Jaye, Takay Dunya Ko Unka Aur Unkay Khandaan Ka Bhi Pata Chalay. Wo Youth Ki Popular Leader Hain.
Mia Mottley
Barbados Ki Prime Minister
Mia Nay January Main Landslide Victory Hasil Ki Uski Waja Unkay Mulk Main Jamhuriat Kay Liye Jidd-o-Jahad Hay. Mia London School Of Economics Ki Law Graduate Hain Aur Apnay Watan Main Qanoon Aur Insaaf Ki Umeed Bhi.
Sherry Rehman
Pakistan Ki Climate Minister
Inhon Nay Pakistan Main Sailab Ki Tabahi Kay Baad Egypt Main Honay Wali COP27 Conference Main Pakistan Ka Muqaddma Bohat Achay Tareeqay Say Paish Kia.
Heroes
Is Kay Baad Baat Kartay Hain Fahrist Main Maujood Heroes Ki, Jin Mein Sab Say Pehla Naam Hay:
Serena Williams
Tennis player
1995 Say 2022 Kay Dauran Aik Black Khatoon Tennis Court ka Munfarid Husn Rahin. America Say Taaluq Rakhnay Wali Serena 7 Australian Open, 3 French Open, 7 Wimbledon Aur 6 US Open kay Sath 73 Titles Jeet Chuki Hain.
Amanda Blanc
Aviva Ki CEO
Amanda UK Ki Sab Say Bari Life Insurance Company Aviva Ki CEO Hain. Wo Khwateen Ki Top Management Main Shamuliat Ki Bohat Bari Hami Hain. Is Kay Ilawa Unhoon Nay Climate Change Conference Main Gender Equality Kay Targets Ko Climate Change Ki Financial Commitments Ka Hissa Bananay Par Zoar Dia.
Jamie Fiore Higgins
Author, Teller of Uncomfortable Truths
Dunya Kay Dusray Baray Investment Bank Goldman Sachs Ki Sabiq MD Jamie Fiore Nay Jab Sach Likhna Shuru Kia, Bolna Shuru Kia To Investment Banking Say Jurri Hazaroon Khwateen Ki Awaaz Ban Gayeen. Unhon Nay Apnay Qalam Say Investment Aur Banking Main Kaam Karnay Wali Khwateen Kay Masail Ko Buhat Khubsurti Say Highlight Kia.
Rebecca Gomperts
Doctor, Defender of Women Medical Rights
Rebecca Gomperts America Main Aik Doctor Aur Social worker Kay Taur Par Mashhoor Hain, Jin Ka Ziada Kaam Abortion Rights Par Hay.
Rina Gonoi
Sabiq Fauji, Zulam Kay Khilaaf Bari Awaaz
Japan, Jahan Ki Fauj Main Sainkaron Khwateen Kay Sath Jinsi Ziadati Kay Cases Samany Aye Hain, Wahan Is Ki Kahani Bhi Utni He Dukh Bhari Hay. Rina Kay Seniors Nay Sharab Kay Nashay Main In Kay Sath Ziadati Ki. 23 Saal Ki Rina Nay Khamosh Rehnay Ki Bajaye Dhamkion Kay Shor Main Awaaz Buland Karna Behtar Samjha, Aur Ziadati Karnay Walon Ko Saza Dilwai.
Mahsa Amini
Izhaar Ki Alam-bardar
Iran Main Khwateen Ko Mazhab Kay Naam Par Kai Kisam Ki Pabadion Ka Samna Hay. 22 Sala Mahsa Amini Kay Qatal Nay Iran Ki Aurat Ko Kharay Honay Par Majboor Kar Dia. Jis Nay Khauf, Darr Aur Pabadion Kay Khilaaf Aisi Awaaz Uthai Kay Sari Dunya Is Main Shamil Ho Gai.
Paula Khumbu
Conservationist, Janwaron Ki Awaaz
Kenya Main Hathi Aur Dosray Janwar Jin Ki Nasal Ko Khatraat Lahaq Hain Un Ki Zindagian bachanay Aur In Ki Illegal Trade Kay Khilaf Paula Ka Kaam Bohat Ehaam Hay. America Say PhD Karnay Kay Baad Kenya Wapis Aien Aur Apnay Janwaroon Ki Awaaz Ban Gain.
MacKenzie Scott
Ghareeb Ka Sochnay Wali Ameer
Mackenzie Amazon Kay Malik Jeff Bezos Ki Sabiq Biwi Hain. 33 Arab Dollar Kay Assets Kay Sath Yeh Dunya Kay Ameer Tareen Logon Main 35th Number Par Hay. In Kay Amazon Main 4% Share Hain. Mackenzie Nay 2020 Main 1.7 Billion Dollar Ki Khairaat 116 NGOs Ko Di.
Sarina Wiegman
England Women's Football Team Ki Head Coach
Sarina England Kay Bahir Say Khwateen Team Ki Head Coach Ban’nay Wali Pehli Khatoon Hain. Unka Apna Mulk Netherlands Hay. August 2020 Main Ye England Team Ki Manager Baneen Aur Aik Saal Baad Head Coach Ban Gain.
Creators
Ab Baat Kartay Hain Dunya Bhar Ki Baa-Asar Creator Khwateen Ki:
Michelle Yeoh
Actor, Real-life Superhero
Tomorrow Never Dies Say Shuhrat Ki Bulandion Tak Puhanchnay Wali Michelle Malaysia Say Hain. 1983 Main Miss Malaysia Baneen Aur Jackie Chan Kay Sath Aik Commercial Karnay Kay Baad Acting Ki Dunya Main Qadam Rakha Aur Kai Filmon Main Kaam Kia. Michelle Zati Zindagi Main Aik Naram Mizaj Khatoon Hain Jo Co-Workers Ka Bohat Khiayal Rakhti Hain.
Tsitsi Dangarembga
Author And Activist
Zimbabwe Say Nikal Kar English Literature Par Chha Janay Wali Ye Hain Tsiti. Ya Apnay Mulk Ki Wahid Khatoon Hain Jin Kay English Ko Is Satah Ki Recognition Mili hay. Un Ki Kitab This Mournable Body Ko Bookers Prize 2020 Kay Liye Shortlist Bhi Kia Gaya. Zimbabwe Main Political Reforms Ki Khatir Wo Jail Bhi Jaa Chuki Hain.
Billie Eilish
Singer Aur Musician
American Singer, Ziada Tar Apna Likha Gati Hain. Inka Ziada Kaam Apnay Bhai Finneas O'Connell Kay Sath Hay Jo Aik Producer Hain. Eilish Ka Pehla Album When We All Fall Asleep, Where Do We Go? 2019 Main Aya.
Annie Ernaux
Author, Jazbaat KI Malka
2022 Main Literature Main Nobel Prize Jeetnay Wali Annie Ka Ta'a'luq France Say Hay.1974 Main Likhna Shuru Kia Aur Kamal Likha. Unhoon Nay Zaati Zindagi Kay Tajrubaat Ko Aisay Bayan Kia Kay Dusroon Kay Liye Sabaq Ban Jaye.
Anne Imhof
Visual Artist
France Say Ta’luq Rakhany Wali Anne Ka Ziada Kaam Visual Art, Choreography Hay. Ziada Tar Paris Aur Frankfurt Main Hi Perform Kia. In Ko Ziada Shuhrat Endurance Art Ki Waja Say Mili.
Meghan Markle
Podcaster, Bartania Ki Shahi Khandaan Ki Bahu
6 March 2018 Ko Bartanvi Shahi Khandaan Ki Bahu Baneen, Aur Phir Zaati Ikhtalafat Pare Miyan Bivi Shahi Khandaan Ko Chhor Kar Chaly Gaye. Prince Harry Aur Meghan Hamesha News Main Rahay. Shayad Isi Liye Meghan Nay Podcaster Kay Taur Par Kaam Shuru Kia.
Harry & Meghan Kay Naam Say In Ki Docuseries Netflix Par Daikhi Ja Sakti Hain.
Domee Shi
Director Animator
Chinese Domee America Main Aik Bari Animation Director Kay Taur Par Jani Jati Hain. 2011 Say Pixar Animations Studio Kay Sath Kaam Kar Rahi Hain. Bao Unki Famous Animated Short Hay Is Kay Ilawah Inside Out, Incredible 2, Toy Story 4, Onward, Soul, Luca Aur Turning Red Jaisay Projects Par Bhi Par Kaam Kia.