Pakistan Cricket Board Mein Chairman Badla, Selection Committee Farigh Hui, Coach Ki Kahani Bhi Jald Khatam Honay Wali Hay. To Kaptan Ka Kia Hoga? Haan! Is Waqt Sub Say Bara Khatra Hay Babar Azam Ki Kaptani Ko.
King Babar Waisay To Bach Jatay Laikin Home Ground Par Aik Kay Baad Doosri Haar Nay Kaam Kharab Kar Dia Hay. Last Year Ka Home Season Dekain: 
West Indies Aur 
Australia Ko ODI Series Harai Aur Bus! Phir To Bus Haar Hi Haar Nazar Aai. 
England Say T20 Series Haray, Test Mein Clean Sweep Khaya. Phir 
New Zealand Kay Khilaf Bari Mushkil Say Test Barabar Kiay Aur ODIs Mein Lead Lay Kar Bhi Series Haar Gaey.
Plan 'A'
Ye Aik Kay Baad Milnay Wali Doosri Haar Hay Jo Babar Kay Liay Bara Khatra Hay! Kitna Bara? Aik Jhalak Hamain PCB Kay Is Faislay Mein Hi Nazar Aati Hay Jis Kay Mutabiq Shan Masood Ko Vice Captain Bana Dia Gaya Hay, Wo Bhi Babar Ko Bataey Baghair 🤦🏽♂️. Shan Taqreeban 4 Saal Baad ODI Squad Mein Wapis Aaey, Aur Aatay Hi Anda Khaya Aur Sara Plan Chaupatt Kar Gaey.
Kya Ye Aasan Hoga?
To Kya Babar Ko Hatana Aasan Hoga? Bilkul Nahi, Babar Ki Kaptaani Par Criticism Apni Jaga Laikin Unhain Hatana Har Giz Aasan Nahi Hoga. Kyunke Un Kay Paas Individual Performance Bhi Hay, Aur Player Power Bhi. Babar Acha Khasa Influence Rakhtay Hain Team Par, Aur Hum Dekh Bhi Chukay Hain Kis Tarah Kuch Haftay Pehlay ‘Sochna Bhi Mana Hai’ Wali Campaign Chali Thi.
Filhaal, Babar Ko Har Format Say Hatana Mumkin Bhi Nahi. Zyada Say Zyada Ye Ho Sakta Hay Ke Un Say Test Format Lay Liay Jaey. T20 Mein To Pakistan Ki Performance Shandaar Hay! 1 World Cup Ka Semi Final Aur Phir Asia Cup Aur Last World Cup Ka Final Bhi Khela. To Yahan Tak Puhanchanay Wala Captain Kaisay Hataya Ja Sakta Hay?
Is Liay Kaptaan Badalna Aasan To Bilkul Nahi Hoga, Board Kay Liay Bhi, Aur New Captain Kay Liay Bhi. Jaisay PDM Nay Khushi Khushi No Confidence Motion Kay Baad Government Sanbhali Thi, Aur Ab Usay Samajh Nahi Aa Rahi Kay Karay To Karay Kya? Kuch Yahi Haal New Captain Ka Bhi Ho Sakta Hay. Kyunke 2023 Pakistan Cricket Kay Liay Aik Buhat Mushkil Saal Hoga.
2023, Aik Mushkil Saal
2023 Pakistan Cricket Kay Liay Aik Khatarnaak Saal Hay. Pakistan Ki Ab Koi Home Series Nahi. Is Saal Pakistan Nay Asia Cup Khelna Hay, Phir ODI World Cup Aur Sab Say Barh Kar Australia Ka Tour. To Ye To Babar Kay Liay Behtar Hoga Ke Itnay Bari Campaigns Say Pehlay Kaptaani Ka Bojh Un Kay Kahdhon Say Hat Jaey.
2023: Pakistan Ka Schedule
| Host | vs | Matches | |
|---|---|---|---|
| April-May |  Pakistan | New Zealand | 5 T20s 5 ODIs |
| July |  Sri Lanka | Pakistan | 2 Test |
| August |  Afghanistan | Pakistan | 3 ODIs |
| September | Sri Lanka | Asia Cup | 13 ODIs |
| October-November |  India | ICC World Cup | 48 ODIs |
| December | Australia | Pakistan | 3 Test |
Syasi Pehlu?
Is Puray Mu’amlay Ka Aik Syasi Pehlu Bhi Hay. PDM Government Har ‘Imrani Nishani’ Mitanay Par Tuli Hui Hay Aur Cricket Team Par Bhi Khan Sahib Ki Chhap Buhat Gehri Hay. Long March Kay Dauran Jab Imran Khan Par Qatilana Hamla Hua To Us Kay Baad Babar Azam Nay Bhi Aik Tweet Kia, Jis Mein Unhon Nay Imran Khan Ko ‘Kaptaan’ Qarar Dia Tha. To Jo Khan Sahib Ko Apna Kaptan Maanay, Wo Bhala Najam Sethi Setup Ko Kaisay Bhala Lag Sakta Hay?