Hum To Samajh Rahay Thay Ke Quetta Kuchal Day Ga, Khatam Kar Day Ga, Rond Dalay Ga, Laikin ‘Momin Ho To Bey-Tegh Bhi Larta Hay Sipahi'. PSL 2023 Kay MS v QG Muqablay Mein Multan Nay Sabit Kardia Ke Wo Waqai Sultans Hain.
Aik Nail-Biter Opening Match Mein Shikast Kay Baad Multan Sultans Ko Bara Dhachka Laga Jab Strike Bowler Shahnawaz Dahani Injured Ho Kar Season Say Hi Out Ho Gaey Thay. Shayad Isi Liay Quetta Ki Mighty Batting Line Nay Multan Ko Halka Lia Aur Phir Out Of Syllabus Ihsanullah Aa Gaey!
Ihsanullah Nay Sirf 12 Runs Day Kar Quetta Ki 5 Wickets Lay Leen. Aur Wickets Bhi Kin Ki? Sarfaraz Ahmed, Jason Roy, Iftikhar Ahmed, Umar Akmal Aur Aakhir Mein Naseem Shah. Ihsan Ki Tabahi Bowling Ki Waja Say Quetta Sirf 111 Runs Par All Out Ho Gaya.
Pakistan Super League 2023
Multan Sultans vs Quetta Gladiators
15 February 2023
Multan Cricket Stadium, Multan, Pakistan
Result: Multan 9 Wickets Say Jeet Gaya
| 🟪 QG | 110 | |
|---|---|---|
| Jason Roy | 27 (18) | |
| Mohammad Hasnain | 22 (20) |
| MS Bowling | O | M | R | W |
|---|---|---|---|---|
| Ihsanullah | 4 | 1 | 12 | 5 |
| Sameen Gul | 3 | 0 | 20 | 2 |
| 🟦 MS | (T:111) | 111-1 |
|---|---|---|
| Rilee Rossouw | 78* (42) | |
| Mohammad Rizwan | 28 (34) |
| QG Bowling | O | M | R | W |
|---|---|---|---|---|
| Nuwan Thushara | 2 | 0 | 21 | 1 |
| Naseem Shah | 2 | 0 | 6 | 0 |
Mighty Batting Line Collapse
Quetta Ki Nakaami Ka Aghaz 2nd Over Mein Martin Guptill Kay Out Honay Say Hua. Wo Sameen Gul Ki 1st Wicket Banay. Phir Abdul Wahid Bangalzai Abbas Afridi Ka Nishana Ban Kar Chal Diay. Is Kay Baad Har Taraf Ihsan Hi Ihsan Hogai. Sarfaraz Un Ka Pehla Shikar Banay, Jinhon 0 Par Chance Bhi Mila Tha Laikin Phir Bhi Saifi Ki Innings 2 Runs Say Aagay Nahi Barh Saki. Ihsan Ki 150+ Kmph Ki Ball Unhain Clean Bowled Kar Gai.
Turning Point
Ihsanullah Apnay Next Over Mein Hi Match Ka Turning Point Lay Aaey. Unhon Nay Pehlay Jason Roy Ko David Miller Kay Hathon Catch Out Karwaya Aur Next Ball Par Hi Iftikhar Ahmed Ko LBW Kardia. #Iftimania PSL Mein Nahi Chal Saka.
Us Kay Baad Umar Akmal Aur Mohammad Hafeez Jaisay Experienced Players Ko Chance Mila Kay Apna Impact Sabit Kar Sakain, Laikin Aisa Kuch Nahi Hua. Umar 17 Balls Par Sirf 11 Aur Hafeez 15 Balls 18 Runs Kay Sath Out Huay.
Rossouw Ka Show
Sirf 111 Runs Chase Kartay Huay Multan Sultans Ki 1 Wicket Start Hi Mein Giri, Bus! Shan Masood Nuwan Thushara Ki PSL Mein First Ball Par Hi LBW Ho Gaey. Aur Ye Pehli Aur Aakhri Wicket Hi Sabit Hui.
Phir Rilee Rossouw Nay Wo Kia, Jo Wo Opening Match Mein Nahi Kar Sakay Thay. 42 Balls Par 78 Runs Ki Jaandar Innings Dekhnay Laiq Thi. Multan Nay 14th Over Mein Unhi Kay Consecutive Sixes Kay Sath Match Khatam Kar Dia.
Rossouw Ki To Quetta Say Bari Purani Dushmani Hay. 2020 Mein To Unhon Nay Gladiators Kay Khilaf Hundred Bana Di Thi. Aaj Bhi Kar Detay, Bus Itna Target Hi Nahi Tha.
Waisay Multan Nay Quetta Kay Against Apni Dominance Sabit Kardi Hay. Ye PSL Mein Un Ki Gladiators Kay Against Consecutive 4th Victory Hay. Ye Jeet To 14th Over Mein Hi Hasil Ki Hay, Yahi Waja Hay Ke Multan Sultans Ko Net Run Rate Mein Bhi Zabardast Faida Hoga. Jabke Quetta Ki Performance Par Aik Baar Phir Sawal Khara Ho Gaya Hay.