Surprise Day Par Lahore Qalandars Nay Islamabad United Ko Aisa Surprise Dia Hay Ke Sub Hairan Hain. LQ v IU Muqablay Mein Fakhar Zaman Nahi Chalay To Kya Hua? Shaheen Afridi Nay First Over Mein Wicket Nahi Li, Tab Bhi To Koi Masla Nahi. Lahore Phir Bhi 200 Runs Banaey Ga Aur 110 Runs Kay Bhari Margin Say Jeetay Ga.
Ye Aik Aur Full House Gaddafi Stadium Tha, Jis Nay Qalandars Ko Apni Peak Par Dekha. Mazay Ki Baat Ye Ke Lahore Ki Innings Mein Kisi Nay Fifty Tak Nahi Banai, Abdullah Shafiq 45 Runs Kay Sath Top Scorer Rahay, Laikin Baqi Saray Players Ka Chhota Mota Contribution Aisa Raha Ke 20 Overs Mein 200 Runs Tak Puhanch Gaya.
Pakistan Super League 2023
Lahore Qalandars vs Islamabad United
27 February 2023
Gaddafi Stadium, Lahore, Pakistan
Result: Lahore 110 Runs Say Jeet Gaya
| 🟩 LQ | 200-7 | |
|---|---|---|
| Abdullah Shafiq | 45 (24) | |
| Fakhar Zaman | 36 (23) |
| IU Bowling | O | M | R | W |
|---|---|---|---|---|
| Tom Curran | 4 | 0 | 34 | 3 |
| Shadab Khan | 4 | 0 | 34 | 2 |
| 🟥 IU | (T:201) | 90 |
|---|---|---|
| Rahmanullah Gurbaz | 23 (17) | |
| Colin Munro | 18 (14) |
| LQ Bowling | O | M | R | W |
|---|---|---|---|---|
| David Wiese | 3 | 0 | 17 | 3 |
| Sikandar Raza | 1.5 | 0 | 6 | 2 |
Abhi Aik Din Pehlay Hi To Qalandars Nay Peshawar Zalmi Ko 241 Runs Maray Thay, Aur Aaj Phir 200 Tak Puhanchna, Wo Bhi Kisi Batsman Ki Bari Innings Kay Baghair. Ye Zahir Karta Hay Ke Lahore Is Waqt Red Hot Form Mein Hay Aur Sirf Defending Champion Hi Nahi, Balke Title Kay Liay Favourite Bhi Hay.
Shaheen Say Bacha, Wiese Mein Phansa
Islamabad United Aaj Toss Say Lay Kar Aakhir Tak Sub Kuch Hi Haara. Wahid Kamyabi Shaheen Afridi Kay First Spell Mein Apni Wicket Bacha Laina Thi. Powerplay Kay Last Over Tak Islamabad 1 Wicket Par 54 Runs Bana Chuka Tha. Laikin Phir Jo Hua Wo #Sherus Kay Liay Heartbreaking Tha.
Shaheen Aur Haris Rauf Kuch Khaas Na Kar Sakay To Kya Hua, Baqi Qalandars Kisi Say Kam Hain Kya? David Wiese Aaey Aur Aatay Hi Chha Gaey. Unhon Nay Colin Munro, Shadab Khan Aur Azam Khan Ki Qeemti Wickets Haasil Keen Aur Islamabad Ki Batting Line Ki Kamar Torr Di.
Doosray End Say Haris Rauf Nay Rassie Van Der Dussen Ki Soorat Mein Apni Din Ki Wahid Laikin Barri Wicket Haasil Ki. Rashid Khan Nay Asif Ali Ko Thikanay Lagaya Aur Phir Aai Wiese Ki Decisive Strike, Azam Khan Gaey, Samjhain Kahani Khatam!
LQ v IU: Welcome To Lahore
Islamabad 14th Over Mein Sirf 90 Runs Par All Out Ho Gaya. Is Tarah Ke 3 Balls Par Last Teenon Wickets Gir Gaeen. Yani Team Hat-trick.
Pooray Season Mein Sirf Aik Match Haarnay Wali "United" Team Ka Lahore Mein Aisa Welcome? Kisi Nay Socha Bhi Nahi Tha. Wo Team Jis Nay Zalmi Kay Khilaf 157 Runs Ka Target 15th Over Hi Mein Haasil Kar Lia Tha, Quetta Ko 63 Runs Say Haraya Tha, Lahore Kay Khilaf Us Ka Koi Waar Nahi Chala.
Lahore On The Top
Is Shikast Nay Islamabad United Kay Qeemti Points Say Mehroom To Kia Hi, Run Rate Ko Bhi Bara Nuqsan Puhanchaya Hay. Jo +1.049 Say Gir Kar -0.334 Ho Gaya Hay.
Jabke Lahore Qalandars Donon Matches Dominant Style Mein Jeet Kar Sabit Kar Top of the Table Aa Chukay Hain. Zalmi Kay Khilaf Unhon Nay Apni Batting Power Saabit Ki Thi, Aur Ab Islamabad Kay Against Apni Bowling Might, Wo Bhi Shaheen Aur Haris Ki Kisi Special Performance Kay Baghair. To Kya Is Saal Bhi Lahore Hi Title Jeetay Ga?
Pakistan Super League Points Table
27 February 2023
| M | W | L | PT | NRR | |
|---|---|---|---|---|---|
| 🟩 LQ | 5 | 4 | 1 | 8 | 1.470 |
| 🟦 MS | 6 | 4 | 2 | 8 | 0.844 |
| 🟥 IU | 5 | 3 | 2 | 6 | -0.334 |
| 🟦 KK | 6 | 2 | 4 | 4 | 0.862 |
| 🟨 PZ | 5 | 2 | 3 | 4 | -1.332 |
| 🟪 QG | 5 | 1 | 4 | 2 | -1.977 |