Shahid Khan Afridi Officially Shaheen Shah Afridi Kay Father-In-Law Ban Gaey Hain. Fast Bowler Ka Nikkah Karachi Main Friday Ko Hoa Jis Main Dono Taraf Say Close Relatives Nay Shirkat Ki. Shaheen Ko Pakistan Cricket Ka Future Super Star Kaha Jata Hay Aur “Lala” Ka Damaad Ban'nay Kay Baad Un Ki Star Value Mazeed Ooper Jaey Gi.
Shaheen Afridi Ki Dulhan Ansha Afridi Ko Lala Kai Fans Bachpan Say Jantay Hain. Apnay Baba Kay Sath Ansha Stadium Main Aya Kerti Theen. Crunch Matches Main Lala Aur Pakistan Team Kay Liye Duayein Mangtay Hoay Aqsa Aur Ansha Ko Kai Baar Dekha Gaya. Afridi Ki Dono Betiyan Cricket Dekhnay Ki Shoqeen Thein Mager Us Waqt Andaza Nahi Tha Kay Shahid Afridi Kay Damaad Bhi Cricketer Hongay.
Former Test Cricketer Shahid Afridi Ki 5 Betiyan Hain Aur Afridi Un Say Buhat Muhabaat Kertay Hain. Aqsa Afridi Ka Nikkah Last Month Karachi Main Naseer Nasir Khan Say Hoa Tha. Khabrain Hain Kay Dono Behanon (Aqsa Aur Ansha) Ki Rukhsati Kuch Arsay Baad, Aik Hi Taqreeb Main Hogi.
Ansha Kay Nikkah Reception Main Current Cricketers Nay Bhi Shirkat Ki. Babar Azam, Sarfaraz Ahmed, Mir Hamza, Mohammad Hafeez Bhi Event Main Moujoud Thay. Former CEO PCB Waseem Khan Aur Squash Legend Jahangir Khan Bhi Event Main Aaey Thay.
Shaheen Afridi Knee Injury Ki Waja Say Cricket Say Door Hain. Tahaam Fit Honay Kay Baad Unhonay Dobara Training Ka Aghaz Kerliya Hay.
Crickets Fans Ko Umeed Hay Kay Shaheen Afridi Pakistan Super League Kay 8th Edition Main Lahore Qalandars Ko Lead Kertay Dikhai Dain Gay. Qalandars Kay Players Nay Apni Team Kay Captain Ko Video Message Kerkay Mubarak Baad Paish Ki Hay.