Ye Aik Historic Series Thi, Jo Ab Aik Tareekhi Shikast Mein Badal Chuki Hay. Pakistan England Kay Hathon Apnay Home Ground Par Hi Clean Sweep Ho Gaya Hay. Aisa Aakhri Baar Kab Hua Tha? Kabhi Nahi! Ye Aizaz Pehli Martaba Mila Hay Babar Azam Ko, Jin Ki Kaptaani Mein Pakistan Home Ground Par Consecutive 4 Test Matches Haara Hay, For The First Time Ever. Isi Liay Babar Par Ab Khul Kar Tanqeed Ho Rahi Hay. Jo Baat Pehlay Dabay Lafzon Mein, Dhakay Chhupay Ho Rahi Thi, Band Kamron Mein Thi, Ab Har Chai Kay Dhabay Aur Paan Kay Khokhay Par Hay. Nasser Hussain Jaisa Expert Bhi Kehta Hay Ke Babar Buhat Orthodox Aur One-Dimensional Captain Hain.
Laikin Yahi Baat Hum Karain To Jawab Mein Babar Azam Kay "Stats" Samnay Rakh Diay Jatay Hain Ke Ye Dekho, Wo Dekho! Phir Ye Bhi Kaha Jaey Ga Ke Babar Azam Ki Kaptani Mein Pakistan 2021 T20 World Cup Kay Semi-Final Mein Puhancha, Asia Cup Ka Final Khela Aur Phir 2022 Mein To T20 World Cup Mein Bhi Runner Up Raha. Laikin Haqeeqat Kuch Aur Hay, Jo Kehti Hay Ke Kaptani Babar Ko Individually To Raas Aai Hay Laikin As A Team Pakistan Ko Nahi.
Babar Azam - Test Stats
| Inns | Runs | HS | Ave | 100s | 50s | |
|---|---|---|---|---|---|---|
| Is Captain | 28 | 1425 | 196 | 52.77 | 3 | 11 |
| Is Not Captain | 53 | 2045 | 143 | 45.44 | 5 | 15 |
Babar Azam Captaincy Mein Pakistan 16 Test Khela Hay Aur 8 Jeeta Hay. Agar Hum Start Mein South Africa Kay Against 2 Victories Nikaal Dein To Phir Kuch Nahi Bactha, Siwaey Zimbabwe, West Indies, Bangladesh Aur Sri Lanka Kay Kuch Kamyabion Kay. Jahan Australia Aur England Jaisay Muqabil Aaey, Home Ground Par Bhi Dher Ho Gaey.
Pakistan Ki Test Performance
Babar Azam Ki Kaptani Mein
| vs | Mat | Won | Lost | Draw |
|---|---|---|---|---|
 South Africa | 2 | 2 | 0 | 0 |
 Zimbabwe | 2 | 2 | 0 | 0 |
 West Indies | 2 | 1 | 1 | 0 |
 Bangladesh | 2 | 2 | 0 | 0 |
 Australia | 3 | 0 | 1 | 2 |
 Sri Lanka | 2 | 1 | 1 | 0 |
 England | 3 | 0 | 3 | 0 |
| Total | 16 | 8 | 6 | 2 |
2022, Aik Bhayaanak Saal
Saal 2022 To Pakistan Kay Liay Buhat Kharab Raha Hay. Pooray Saal Mein Pakistan Sirf Aik Test Match Jeet Saka, Wo Bhi Sri Lanka Kay Tour Par. Us Say Hatt Kar Dekhain To Sirf Haara Hi Hay. Is Table Mein Haal Dekh Lain.
Saal 2022 Aur Test Teams Ki Performance
| Mat | Won | Lost | Draw | |
|---|---|---|---|---|
| England | 15 | 8 | 3 | 3 |
| Australia | 10 | 6 | 1 | 3 |
| South Africa | 10 | 6 | 4 | 0 |
 India | 6 | 3 | 3 | 0 |
| Sri Lanka | 8 | 3 | 4 | 1 |
| West Indies | 7 | 3 | 2 | 2 |
 New Zealand | 7 | 2 | 5 | 0 |
| Bangladesh | 9 | 1 | 7 | 1 |
 Pakistan | 8 | 1 | 4 | 2 |
Australia Kay Khilaf To Phir Bhi 2 Test Draw Kar Liay Aur Kuch Unforgettable Moments Bhi Milay, Laikin England Kay Muqablay Mein To Green Shirts Tabah De!
Rawalpindi Test Ben Stokes Ki Brave Captaincy Ki Waja Say Zinda Hua Aur England Jeeta. Phir Multan Mein Bhi England Nay Pakistan Ko 26 Runs Say Haraya Aur Karachi Test Mein Bhi Shikast Hi Naseeb Hui. Wo Maidan Jahan Pakistan 45 Saal Tak Undefeated Raha, Aur Is Test Say Pehlay 45 Matches Mein Bhi Sirf 2 Haara Tha, Wahan Itni Buri Tarah Shikast? Ye Hazam Nahi Ho Raha Boss!
Asal Masla Shikast Nahi
Phir Masla Sirf Shikast Ka Bhi Nahi Hay, Asal Problem Hay Captaincy Kay Hawalay Say Attitude Ka. Wohi Masla Jis Ki Taraf Nasser Hussain Nay Ishara Kia Hay. Hamain To Ye Problem Har Format Mein Nazar Aa Raha Hay. Babar Azam Ki Kaptani Mein Kuch Aisay Faults Hain Ke Un Kay Aik Faislay Say Match Pakistan Kay Haath Say Nikal Jata Hay.
Karachi Test Hi Dekh Lain. Jab Faheem Ashraf Ko Select Kia Gaya Tha To Kya Unhain Sirf 8th Number Par As A Batsman Samjha Gaya Tha? Kyunke Un Say To First Innings Mein 1 Aur Second Innings Mein 2 Overs Hi Karwaey Gaey Hain.
Phir Kuchh Players To Aisay Hain Jinhain Musalsal Azmaya Ja Raha Hay Aur Performance Mein Koi Behtari Na Aanay Par Bhi Un Ko Replace Nahi Kia Ja Raha. Muhammad Rizwan Ko Hi Lay Lain. Australia Kay Against Karachi Test Mein Century Bananay Kay Baad 10 Innings Mein Aik Baar 50 Tak Nahi Bana Sakay. Sri Lanka Kay Tour Par 4 Innings Mein Sirf 120 Aur Ab England Kay Against Is Series Mein Only 141 Runs. Aakhir Aisa Kab Tak Chalay Ga?
Rizwan England Kay Khilaf Series Mein
| Runs | Balls | vs | Venue | Date |
|---|---|---|---|---|
| 29 | 44 | England | Rawalpindi | Dec 2022 |
| 46 | 92 | England | Rawalpindi | Dec 2022 |
| 10 | 43 | England | Multan | Dec 2022 |
| 30 | 43 | England | Multan | Dec 2022 |
| 19 | 24 | England | Karachi | Dec 2022 |
| 7 | 16 | England | Karachi | Dec 2022 |
Phir Mohammad Nawaz Hain, Asia Cup 2022 Kay Final Mein Mohammad Nawaz Ko Bowling Tak Nahi Di Gai Jabke Pakistan Ko Sakht Zarurat Thi. Aur Last Match Kay Baad Hi Kaha Gaya Tha "Nawaz! Tu Mera Match Winner Hay!".
Phir Asif Ali Hain, Jo Fan Favourite Kay Ilawa "Bobby Ki Pasand" Bhi Hain, Halanke Un Ki Performance Sab Kay Samnay Hay. Chalay To Chand Tak, Warna……
Defensive Approach?
Pakistan Babar Azam Ki Kaptani Mein T20 World Cup 2022 Kay Final Tak Zarur Puhancha, Laikin Defensive Approach Ki Waja Say Haar Bhi Gaya Tha.
Aur Ye Koi Nai Baat, Yeh Kahani Buhat Purani Hay. Yaad Hay Pakistan Super League Ka 7th Season? Babar Ki Qayadat Mein Karachi Kings Consecutive 8 Matches Haara Tha Aur 10 Matches Kay Season Mein Hasil Ki Thi Sirf 1 Kamyabi. Wo Karachi Jo Imad Wasim Ki Kaptani Mein 2020 Mein Champion Bana Tha, Aur Hamesha At Least Top 4 Mein To Aaya Hi Hay. Is Haal Ko Puhancha Kab? Babar Ki Kaptani Mein. Ab Allah Peshawar Zalmi Ki Kher Karay!